ຂໍ້ມູນຂອງກົມຕຳຫຼວດຈະລາຈອນ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ແຈ້ງໃຫ້ຊາບວັນທີ 13 ພຶດສະພາ 2020 ວ່າ: ໃນເດືອນເມສາ 2020 ທົ່ວປະເທດມີອຸບັດເຫດເກີດຂຶ້ນ 435 ລາຍ ມີຄົນເສຍຊີວິດ 71 ຄົນ ໂດຍນະຄອນຫຼວງວຽງຈັນ ຍັງຄອງອັບດັບການເກີດອຸບັດຕິເຫດ ແລະ ຄົນເສຍຊີວິດຫຼາຍກວ່າແຂວງອື່ນ.
ການເກີດອຸບັດເຫດແຕ່ລະຄັ້ງ ເຮັດໃຫ້ມີພາຫະນະເປ່ເພ 719 ຄັນ ໃນນີ້ເປ່ເພເລັກໜ້ອຍ 320 ຄັນ ສົມຄວນ 376 ຄັນ ໃຊ້ການບໍ່ໄດ້ 23 ຄັນ ມີຄົນໄດ້ຮັບບາດເຈັບ 557 ຄົນ ໃນນີ້ບາດເຈັບເລັກໜ້ອຍ 243 ຄົນ ສົມຄວນ 227 ຄົນ ສາຫັດ 87 ຄົນ ເສຍຊີວິດ 71 ຄົນ ຍິງ 8 ຄົນ ເຊິ່ງສາເຫດຕົ້ນຕໍຂອງການເກີດອຸບັດເຫດແມ່ນເມົາແລ້ວຂັບ ຂັບຂີ່ໄວເກີດກຳນົດ ບໍ່ເຄົາລົບກົດລະບຽບຈະລາຈອນ ບໍ່ໃຫ້ກຽດກັບຜູ້ໃຊ້ເສັ້ນທາງຮ່ວມກັນ ແຊງຊ້າຍ-ຂວາບໍ່ຮັບປະກັນ ແລະ ອື່ນໆ.
ເພື່ອຫຼຸດຜ່ອນການເກີດອຸບັດເຫດ ກົມຕຳຫຼວດຈະລາຈອນ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ຈຶ່ງຮຽກຮ້ອງໃຫ້ທຸກຄົນຮ່ວມໃຈກັນ ປະຕິບັດກົດລະບຽບການສັນຈອນທາງບົກໃຫ້ເຄັ່ງຄັດ ມີສະຕິໃນການຂັບຂີ່ແຕ່ລະຄັ້ງ ສິ່ງສຳຄັນແມ່ນບໍ່ໃຫ້ປະໝາດ ເມົາແລ້ວຫ້າມຂັບ ຂັບຂີ່ລົດຈັກຕ້ອງໃສ່ໝວກກັນກະທົບ ແລະ ກວດກາສະພາບລົດໃຫ້ມີຄວາມພ້ອມ ແລ້ວຈຶ່ງອອກເດີນທາງ.