ປັດຈຸບັນ ກະສິກຳອິນຊີ ບໍ່ວ່າຈະເປັນພືດ ຜັກ ໝາກໄມ້ຊະນິດຕ່າງໆ ກຳລັງເປັນທີ່ຕ້ອງການຂອງຜູ້ບໍລິໂພກ ເນື່ອງຈາກວ່າໄດ້ສົ່ງຜົນດີຕໍ່ຜູ້ຜະລິດ ຜູ້ບໍລິໂພກ ແລະ ສິ່ງແວດລ້ອມ ເຮັດໃຫ້ເສດຖະກິດຂອງຄອບຄົວດີຂື້ນ ປະຢັດຕົ້ນທຶນ ກະສິກຳອິນຊີ ເປັນການຜະລິດທີ່ບໍ່ນຳໃຊ້ສານເຄມີທຸກຢ່າງ ໃຊ້ນ້ຳໝັກຊີວະພາບ ໃຊ້ຝຸ່ນບົ່ມເພື່ອປັບປຸງດິນໃຫ້ດິນງາມ ແລະ ໃຊ້ນ້ຳສະອາດ.
ນາງ ໜັ່ນ ບ້ານທ່າຊ້າງ ເມືອງປາກງື່ມ ນະຄອນຫຼວງວຽງຈັນ ໃຫ້ສຳພາດວ່າ ຄອບຄົວຂອງຕົນເລີ່ມປູກກະສິກຳອິນຊີມາປະມານ 2 ປີ ໂດຍປູກຫອມປ້ອມ ຫອມບົ່ວ ຜັກກາດ ຫົວກະລົດ ແລະ ອື່ນໆ ໃນເນື້ອທີ່ປະມານ 1 ໄລ່ ສາມາດສ້າງລາຍຮັບໄດ້ 1 ລ້ານກວ່າກີບ ລວມທັງຕົ້ນທຶນ ອາທິດໜຶ່ງຂາຍ 2 ຄັ້ງ ກ່ອນໜ້ານີ້ແມ່ນຖືອາຊີບເຮັດນາ ເນື່ອງຈາກວ່າການເຮັດນາບໍ່ໄດ້ດີເທົ່າທີ່ຄວນ ບາງປີຖືກນ້ຳຖ້ວມ ບາງປີແຫ້ງແລ້ງ ດັ່ງນັ້ນຈຶ່ງຕັດສິນໃຈມາປູກພືດກະສິກຳອິນຊີແທນ ເຊິ່ງການປູກຜັກແມ່ນໄດ້ຂາຍຕະຫຼອດປີ ພາຍຫຼັງທີ່ຫັນມາປູກພືດຜັກປອດສານພິດ ເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນເປັນກ້າວໆ ພ້ອມນີ້ຍັງດີຕໍ່ສຸຂະພາບຂອງຜູ້ປູກ ແລະ ຜູ້ບໍລິໂພກອີກດ້ວຍ.
ຄຽງຄູ່ກັນນີ້ ການປູກຜັກກະສິກຳອິນຊີ ມີສິ່ງທ້າທາຍຫຼາຍຢ່າງ ເປັນຕົ້ນແມ່ນສັດຕູພືດທຳລາຍ ໂດຍສະເພາະແມ່ນລະດູຝົນ ການກະກຽມດິນ ການກ້າເບ້ຍຕ່າງໆ ນັບແຕ່ພຶດສະພານີ້ໄປຫາເດືອນກັນຍາ ພືດຜັກປູກຍາກຂຶ້ນ ປູກຫຼາຍໄດ້ໜ້ອຍ ຕ້ອງໄດ້ດຸໝັ່ນອົດທົນພະຍາຍາມໃນການບົວລະບັດຮັກສາ ສະນັ້ນ ສິນຄ້າບາງປະເພດຈຶ່ງມີລາຄາແພງຂຶ້ນເລັກໜ້ອຍ.
# ຂ່າວ & ພາບ: ອົ່ນ ໄຟສົນທອງ