ນວ ກຽມພ້ອມວຽກງານຕ້ານແລ້ງ-ຕ້ານຖ້ວມ ເພື່ອຮັບປະກັນການຜະລິດລະດູຝົນ

ເພື່ອຮັບປະກັນໃຫ້ການການຜະລິດລະດູຝົນ ໂດຍສະເພາະການຜະລິດເຂົ້ານາປີ 2020 ບັນລຸຕາມຄາດໝາຍທີ່ວາງໄວ້ ຂະແໜງການກ່ຽວຂ້ອງ ກໍໄດ້ກະກຽມຄວາມພ້ອມທຸກດ້ານ ເພື່ອຕ້ານແລ້ງ-ຕ້ານຖ້ວມແຕ່ຫົວທີ ໃນນີ້ ຂະແໜງຊົນລະປະທານ ພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ (ນວ) ໄດ້ສຸມໃສ່ການກະກຽມຄວາມພ້ອມຮອບດ້ານ ໃນການຕ້ານແລ້ງ-ຕ້ານຖ້ວມໃນລະດູຝົນປີນີ້ ເພື່ອຮັບປະກັນໃຫ້ມີນ້ຳພຽງພໍເພື່ອເນື້ອທີ່ການຜະລິດ.

ທ່ານ ບຸນຖະໜອມ ທຸມມະວົງ ຮອງຫົວໜ້າຂະແໜງຊົນລະປະທານ ພະແນກກະສິກຳ ແລະ ປ່າໄມ້ ນວ ໃຫ້ສຳພາດວັນທີ 12 ພຶດສະພາ 2020 ວ່າ: ເດືອນສິງຫາ 2019 ໄດ້ເກີດມີສະພາບນ້ຳຖ້ວມຂັງຢູ່ຫຼາຍເມືອງຄື: ໄຊທານີ ປາກງື່ມ ນາຊາຍທອງ ແລະ ຫາດຊາຍຟອງ ສ້າງຄວາມເສຍຫາຍໃຫ້ການຜະລິດລະດູຝົນ ໃນນີ້ນາປີເນື້ອທີ່ 2.557 ເຮັກຕາ ໜອງປາ 70 ເຮັກຕາ ຟາມໄກ່ 80.000 ໂຕ ຊົນລະປະທານ 10 ສະຖານີ ລວມມູນຄ່າເສຍຫາຍ 43,75 ຕື້ກີບ ສະເພາະປີ 2020 ກໍເກີດມີສະພາບໄພແຫ້ງແລ້ງ ພະແນກກະສິກຳ ແລະ ປ່າໄມ້ ນວ ຈຶ່ງໄດ້ອອກແຈ້ງການລົງວັນທີ 8 ພຶດສະພາ 2020 ເຖິງຫົວໜ້າຫ້ອງການກະສິກຳ ແລະ ປ່າໄມ້ 9 ເມືອງ ໂຄງການ ສູນ ສະຖານນີອ້ອມຂ້າງ ເພື່ອກະກຽມຕ້ານແລ້ງ-ຕ້ານຖ້ວມ ປີ 2020 ເຊິ່ງວຽກຕ້ານແລ້ງໄດ້ມອບໃຫ້ຂະແໜງຊົນລະປະທານ ສົມທົບກັບຫ້ອງການກະສິກຳ ແລະ ປ່າໄມ້ເມືອງ ໂຄງການ ສູນ ສະຖານີ ລົງກວດກາລະບົບຫົວງານສູບນ້ຳອ່າງເກັບນ້ຳ ເປັນຕົ້ນກວດກາໂປມກະແລັດ ລະບົບໄຟຟ້າປະຕູນ້ຳ ເພື່ອໃຫ້ມີຄວາມພ້ອມໃນການເກັບກັກນ້ຳຮັບໃຊ້ການຜະລິດ ໂດຍປີນີ້ ເນື້ອທີ່ແຜນການວາງໄວ້ 52.000 ເຮັກຕາ ສ່ວນເນື້ອທີ່ຂອບເຂດຊົນລະປະທານ 84 ແຫ່ງ ທີ່ສະມາດສະໜອງນ້ຳໃຫ້ທີ່ປະມານ 20.000 ເຮັກຕາ ແລະ ເນື້ອທີ່ທີ່ເຫຼືອນັ້ນ ໄດ້ປຸກລະດົມໃຫ້ປະຊາຊົນຕັນຫ້ວຍຮ່ອງຄອງບຶງ ຂຸດໜອງສະ ເພື່ອເກັບກັກນ້ຳໃຊ້ຈັກນ້ຳມັນດູດນຳໃສ່ເນື້ອທີ່ການຜະລິດຂອງໃຜລາວ.

ສຳລັບປີ 2020 ນີ້ ໄດ້ຮັບເງິນຮ່ວງໄພພິບັດ 7 ໂຄງການ ຄື: ໂຄງການຟື້ນຟູສ້ອມແປງປະຕູນ້ຳຫ້ວຍໃໝ່ ບ້ານໝາກນາວ ແລະ ໂຄງການສ້ອມແປງລະບົບຈັກສູບນ້ຳຕ້ານແລ້ງ 6 ແຫ່ງ ຄື: ໂຄງການສ້ອມແປງຈັກສູບນ້ຳຢູ່ບ້ານນາລ້ອງ 2 ເມືອງຫາດຊາຍຟອງ ໂຄງການສ້ອມແປງຈັກສູບນ້ຳບ້ານໂນນຊາຍ ເມືອງປາກງື່ມ ໂຄງການສ້ອມແປງຈັກສູບນ້ຳບ້ານໄຮ່ ໂຄງການສ້ອມແປງຈັກສູບນ້ຳບ້ານເວີນຄຳ ໂຄງການສ້ອມແປງຈັກສູບນ້ຳບ້ານຫາດວຽງຄຳ ແລະ ໂຄງການສ້ອມແປງຈັກສູບນ້ຳບ້ານນາແຖ ເມືອງໄຊທານີ ໂດຍໂຄງການດັ່ງກ່າວໄດ້ຈັດຕັ້ງປະຕິບັດມາໄດ້ 1 ເດືອນແລ້ວ ແລະ ຈະໃຫ້ສຳເລັດໃນເດືອນກໍລະກົດ 2020 ນອກນີ້ ຍັງໄດ້ຮັບເງິນຈາກກອງທຶນສິ່ງແວດລ້ອມ 80 ລ້ານກີບ ລວງຮ່ອງລະບາຍນ້ຳບຶງທາດຫຼວງ ແຕ່ສູນການຄ້າອາຊຽນມໍ-ຂົວໜອງໜ່ຽງ ຍາວ 3.800 ແມັດ ໂດຍຂະແໜງຊົນລະປະທານຮ່ວມກັບຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ຈັດຕັ້ງປະຕິບັດສຳເລັດ ນອກນີ້ຍັງໄດ້ສົມທົບກັບອຳນາດການປົກຄອງປຸກລະດົມກຸ່ມຜູ້ນຳໃຊ້ນ້ຳ ແລະ ປະຊາຊົນອະນາໄມລວງຄອງເໝືອງ ປະຕູນ້ຳ ຈຸດອຸດຕັນຕື້ນເຂີນ ແລະ ກວດກາປະຕູນ້ຳເຂດເລາະນ້ຳຂອງ ນ້ຳງື່ມ ເພື່ອໃຫ້ນ້ຳໄຫຼສະດວກໃນລະດູຝົນ ໂດຍຂະແໜງຊົນລະປະທານ ໄດ້ມີມາດຕະການຈັດຕັ້ງປະຕິບັດຢ່າງເຂັ້ມງວດ ເພື່ອມີຄວາມຮັບປະກັນໃນການຕ້ານແລ້ງ-ຕ້ານຖ້ວມ.