ກອງປະຊຸມຄະນະຊີ້ນຳໂຄງການຮ່ວມມືດ້ານສະຖິຕິ ລາວ-ລຸກຊຳບວກ ໄລຍະ II ປີ 2021-2026 (LLPS II) ຈັດຂຶ້ນວັນທີ 8 ກຸມພາ 2022 ທີ່ໂຮງແຮມແລນມາກ ນະຄອນຫຼວງວຽງຈັນ ເປັນປະທານຂອງທ່ານ ນາງ ພອນສະຫຼີ ສຸກສະຫວັດ ຫົວໜ້າສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ມີທ່ານ Sam Schreiner ອຸປະທູດລຸກຊຳບວກ ປະຈຳ ສປປ ລາວ ພ້ອມຕາງໜ້າຈາກກະຊວງທີ່ກ່ຽວຂ້ອງ ແລະ ອົງການຈັດຕັ້ງສາກົນເຂົ້າຮ່ວມ.
![](https://v2.vientianemai.net/wp-content/uploads/2022/02/272698199_3279324062300369_6292218163953444841_n-1024x683.jpg)
ໂຄງການຮ່ວມມືລະຫວ່າງລັດຖະບານ ສປປ ລາວ ແລະ ລາຊະອານາຈັກ ລຸກຊໍາບວກ ໄລຍະ II ແມ່ນໂຄງການຊ່ວຍເຫຼືອລ້າດ້ານວິຊາການ ແນໃສ່ເພື່ອສ້າງຄວາມເຂັ້ມແຂງໃຫ້ສູນສະຖິຕິແຫ່ງຊາດ ກໍຄືລະບົບສະຖິຕິແຫ່ງຊາດ ໃນການຜະລິດສະຖິຕິ ແລະ ຕົວຊີ້ບອກ ໃຫ້ໄປຕາມມາດຖານສາກົນ ໃນການປະເມີນເປົ້າໝາຍການພັດທະນາແບບຍືນຍົງປີ 2030 ໂຄງການຮ່ວມມືດ້ານສະຖິຕິນີ້ ແມ່ນເປັນໂຄງການສືບຕໍ່ຈາກໄລຍະ I ທີ່ໄດ້ຈັດຕັ້ງປະຕິບັດໃນປີ 2017-2020 ໂດຍຕາງໜ້າຈາກລັດຖະບານຝ່າຍລາວແມ່ນສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ແລະ ຕາງໜ້າຈາກຝ່າຍລັດຖະບານລຸກຊໍາບວກ ແມ່ນສະຖາບັນຄົ້ນຄວ້າສະຖິຕິ ແລະ ເສດຖະກິດ (STATEC) ເປັນຜູ້ຈັດຕັ້ງປະຕິບັດໂຄງການ.
![](https://v2.vientianemai.net/wp-content/uploads/2022/02/272218198_693368921823713_2581438839843146577_n-1024x683.jpg)
.
. # ຂ່າວ – ພາບ : ຊິລິການດາ