ນອກຈາກການແກ້ໄຂຂໍ້ຂັດແຍ່ງດ້ວຍການໄກ່ເກ່ຍແລ້ວ ແຕ່ຫາກຄູ່ກໍລະນີບໍ່ສາມາດຕົກລົງປົງໃຈກັນໄດ້ ກໍຈະນຳໄປສູ່ການແກ້ໄຂທາງດ້ານບໍລິຫານ. ສະນັ້ນເມື່ອມີຂໍ້ຂັດແຍ່ງເກີດຂຶ້ນລະຫວ່າງ ຜູ້ຊົມໃຊ້ ແລະ ຜູ້ສະໜອງ ຄູ່ກໍລະນີ ກໍມີສິດສະເໜີໃຫ້ອົງການຈັດຕັ້ງປະຕິບັດວຽກງານປົກປ້ອງຜູ້ຊົມໃຊ້ ຫຼື ຂະແໜງການທີ່ກ່ຽວຂ້ອງພິຈາລະນາ ແກ້ໄຂທາງດ້ານບໍລິຫານ. ໃນການແກ້ໄຂທາງດ້ານບໍລິຫານນັ້ນ ການຍື່ນຄຳຮ້ອງໃຫ້ປະຕິບັດດັ່ງນີ້: 1. ຜູ້ຊົມໃຊ້ສາມາດຍື່ນຄຳຮ້ອງ ຕໍ່ອົງການຈັດຕັ້ງປະຕິບັດວຽກງານປົກປ້ອງຜູ້ຊົມໃຊ້ຢູ່ຂັ້ນທ້ອງຖິ່ນຂອງຕົນ 2. ຜູ້ຊົມໃຊ້ມີໜ້າທີ່ສະໜອງບັນດາເອກະສານ, ຫຼັກຖານຕ່າງໆດັ່ງນີ້:
– ຫຼັກຖານກ່ຽວກັບການຊື້-ຂາຍກັບຜູ້ສະໜອງ
– ຫຼັກຖານກ່ຽວກັບພຶດຕິກຳ ການລະເມີດສັນຍາຂອງຜູ້ສະໜອງ ຜູ້ສະໜອງທີ່ໄດ້ຮັບຄວາມເສຍຫາຍກໍມີສິດຍື່ນຄຳຮ້ອງເຊັ່ນດຽວກັນ.
ກຳນົດເວລາຂອງການແກ້ໄຂຄຳຮ້ອງຂອງຜູ້ຊົມໃຊ້ໃຫ້ປະຕິບັດດັ່ງນີ້:
– ໃນເວລາ 10 ວັນລັດຖະການ ນັບແຕ່ວັນທີ່ໄດ້ຮັບຄຳຮ້ອງ ຂອງຜູ້ຊົມໃຊ້ເປັນຕົ້ນໄປ ອົງການຈັດຕັ້ງປະຕິບັດວຽກງານປົກປ້ອງຜູ້ຊົມໃຊ້ ຕ້ອງເຊີນຜູ້ສະໜອງມາອະທິບາຍ ຊີ້ແຈງ ກ່ຽວກັບຄຳຮ້ອງຂອງຜູ້ຊົມໃຊ້
– ຜູ້ສະໜອງຕ້ອງໃຫ້ການຊີ້ແຈງ ບໍ່ໃຫ້ກາຍ 7 ວັນນັບແຕ່ວັນໄດ້ຮັບການເຊີນຈາກອົງການຈັດຕັ້ງປະຕິບັດວຽກງານປົກປ້ອງຜູ້ຊົມໃຊ້ເປັນຕົ້ນໄປ
– ໃນກຳນົດເວລາບໍ່ເກີນ 30 ວັນນັບແຕ່ວັນໄດ້ຮັບຄຳຊີ້ແຈງ ຂອງຜູ້ສະໜອງເປັນຕົ້ນໄປ ອົງການຈັດຕັ້ງປະຕິບັດວຽກງານປົກປ້ອງຜູ້ຊົມໃຊ້ ຕ້ອງອອກຂໍ້ຕົກລົງ ເພື່ອແກ້ໄຂຄຳຮ້ອງດັ່ງກ່າວ
– ໃນກໍລະນີ ຫາກມີຄວາມຈຳເປັນອົງການຈັດຕັ້ງປະຕິບັດວຽກງານປົກປ້ອງຜູ້ຊົມໃຊ້ ອາດເຊີນຄູ່ກໍລະນີມາຊີ້ແຈງຕື່ມ ຫຼື ເຊີນຂະແໜງການ ຫຼື ຊ່ຽວຂານທີ່ກ່ຽວຂ້ອງມາຮ່ວມຄົ້ນຄວ້າແກ້ໄຂນຳກັນກໍໄດ້. ເພື່ອເຮັດໃຫ້ການແກ້ໄຂຂໍ້ຂັດແຍ່ງລະຫວ່າງຜູ້ສະໜອງ ແລະ ຜູ້ຊົມໃຊ້ດຳເນີນໄປ ຕາມຂອບເຂດສິດ ແລະ ໜ້າທີ່ຂອງອົງການຈັດຕັ້ງປະຕິບັດວຽກງານປົກປ້ອງຜູ້ຊົມໃຊ້ນັ້ນ ກົດໝາຍຈຶ່ງໄດ້ກຳນົດໄວ້ດັ່ງນີ້:
– ຂັ້ນເມືອງ ມີສິດພິຈາລະນາແກ້ໄຂຄຳຮ້ອງ ກ່ຽວກັບສິນຄ້າ ແລະ ການບໍລິການທີ່ມີມູນຄ່າຕ່ຳກວ່າໜຶ່ງຮ້ອຍລ້ານກີບລົງມາ
– ຂັ້ນແຂວງ ມີສິດພິຈາລະນາແກ້ໄຂຄຳຮ້ອງ ກ່ຽວກັບສິນຄ້າ ແລະ ການບໍລິການທີ່ມີມູນຄ່າແຕ່ໜຶ່ງຮ້ອຍລ້ານກີບ ຂຶ້ນໄປ
ສຳລັບເນື້ອໃນຂໍ້ຕົກລົງ ໃນກໍລະນີທີ່ຜູ້ສະໜອງເປັນຜູ້ລະເມີດ ປະກອບດ້ວຍເນື້ອໃນຕົ້ນຕໍດັ່ງນີ້:
1. ໃຫ້ຜູ້ສະໜອງ ປະຕິບັດພັນທະຂອງຕົນຕໍ້ຜູ້ຊົມໃຊ້ຕາມສັນຍາ
2. ໃຫ້ຜູ້ສະໜອງທົດແທນຄ່າເສຍຫາຍແກ່ຜູ້ຊົມໃຊ້
3. ໃຫ້ຜູ້ສະໜອງ ປົວແປງຜົນກະທົບຕໍ່ຜູ້ຊົມໃຊ້ເມື່ອມີການລະເມີດ.
ຂໍ້ຕົກລົງແກ້ໄຂຄຳຮ້ອງຂອງຜູ້ຊົມໃຊ້ ໃນກໍລະນີທີ່ຜູ້ສະໜອງບໍ່ເປັນຜູ້ລະເມີດ ກໍໃຫ້ຍົກເລີກ ຄຳຮ້ອງຂອງຜູ້ຊົມໃຊ້ ພ້ອມຊີ້ແຈງເຫດຜົນ.
ຂໍ້ຕົກລົງແກ້ໄຂຄຳຮ້ອງຂອງຜູ້ສະໜອງ ກໍໃຫ້ປະຕິບັດຕາມທີ່ໄດ້ສະເໜີມາຂ້າງເທິງນີ້ ເຊັ່ນດຽວກັນ. ແຕ່ເຖິງຢ່າງໃດກໍຕາມຫາກຂໍ້ຂັດແຍ່ງທີ່ເກີດຂຶ້ນບໍ່ສາມາດແກ້ໄຂດ້ວຍການໄກ່ເກ່ຍ ຫຼື ທາງບໍລິຫານໄດ້ ຄູ່ກໍລະນີກໍມີສິດສະເໜີໃຫ້ອົງການແກ້ໄຂຂໍ້ຂັດແຍ່ງທາງດ້ານເສດຖະກິດ ພິຈາລະນາແກ້ໄຂ ຕາມລະບຽບກົດໝາຍ. ນອກຈາກນີ້ ຄູ່ກໍລະນີກໍມີສິດ ຮ້ອງຟ້ອງຕໍ່ສານປະຊາຊົນ ເພື່ອພິຈາລະນາຕັດສິນຕາມລະບຽບກົດໝາຍໄດ້. ຕົວຢ່າງ ທ້າວ ອົດ ໄດ້ຊື້ລົດຈັກຢູ່ ຮ້ານຂາຍລົດແຫ່ງໜຶ່ງຂອງ ທ້າວ ລ້ຽວ ຊຶ່ງເຈົ້າຂອງຮ້ານກໍຮັບປະກັນວ່າ ລົດຈັກຄັນດັ່ງກ່າວເປັນລົດໃໝ່ ຂີ່ດີ ເປັນລົດຍັງແຮງດີ ພໍທ້າວ ອົດເອົາໄປຂີ່ນຳບໍ່ພໍເທົ່າໃດເດືອນ ລົດຈັກກໍຫັກ ແລະ ຂາດເຄິ່ງ ທ້າວ ອົດຈຶ່ງກັບໄປຫາ ທ້າວ ລ້ຽວເພື່ອໃຫ້ທ້າວ ລ້ຽວສ້ອມແປງ ຫຼື ປ່ຽນລົດຈັກຄັນໃໝ່ໃຫ້ ບັນຫາກໍເກີດຂຶ້ນ ດຳເນີນການປານິປານອມ, ດຳເນີນການແກ້ໄຂດ້ວຍການໄກ່ເກ່ຍກໍບໍ່ຕົກລົງປົງໃຈກັນໄດ້ ຈຶ່ງໄດ້ສະເໜີໃຫ້ໜ່ວຍງານພາກລັດ ໂດຍສະເພາະ ໜ່ວຍງານທີ່ກ່ຽວຂ້ອງຂອງຫ້ອງການອຸດສາຫະກຳ ແລະ ການຄ້າເມືອງເພື່ອຊ່ວຍແກ້ໄຂໃຫ້ຕາມກົດໝາຍ ແລະ ລະບຽບການເພື່ອນຳເອົາຄວາມຍຸຕິທຳມາໃຫ້ທັງ 2 ຝ່າຍ.