ວັນທີ 11 ພຶດສະພາ 2020 ອົງການຝຣັ່ງເພື່ອການພັດທະນາ (AFD) ອະນຸມັດເງິນຊ່ວຍເຫຼືອເພີ່ມຕື່ມ 2 ລ້ານເອີໂຣ ຫຼືປະມານ 19,4 ຕື້ກີບ ເພື່ອນຳໃຊ້ໃນໂຄງການ ECOMORE II ທີ່ໄດ້ຮັບການຈັດຕັ້ງປະຕິບັດໂດຍສະຖາບັນ ປັສເຕີ ປະຈຳລາວ ແລະ ຈັດຕັ້ງປະຕິບັດຢູ່ບັນດາປະເທດອ້ອມຂ້າງໃນພາກພື້ນ ມີເປົ້າໝາຍເພື່ອສ້າງຄວາມເຂັ້ມແຂງໃຫ້ລະບົບເຝົ້າລະວັງ ການວິເຄາະ ແລະ ການຕອບໂຕ້ການລະບາດຂອງປະເທດອາຊີຕາເວັນອອກສຽງໃຕ້ ເຊິ່ງເງິນຊ່ວຍເຫຼືອຄັ້ງນີ້ຈະຊ່ວຍໃນການເຊື່ອມໂຍງການສະໜັບສະໜູນໂດຍກົງໃນວຽກງານການລະບາດຂອງພະຍາດ COVID-19 ໃນ 5 ປະເທດຄູ່ຮ່ວມໃນພາກພື້ນ ຄື: ມຽນມາ ກຳປູ ເຈຍ ລາວ ຟີລິບປິນ ແລະ ຫວຽດນາມ.
ທ່ານ ຢາຊີດ ເປັນຊາອີດ ຜູ້ອຳນວຍການໃຫຍ່ອົງການ AFD ປະຈຳພາກພື້ນອາຊີຕາເວັນອອກສຽງໃຕ້ ກ່າວເມື່ອບໍ່ດົນມານີ້ວ່າ: ອົງການ AFD ໄດ້ເຄື່ອນໄຫວຕອບໂຕ້ສະຖານະການສຸກເສີນດ້ານສາທາ ລະນະສຸກຂອງໂລກ ອີງຕາມຂໍ້ລິເລີ່ມຮ່ວມກັນຕ້ານພະຍາດ COVID-19 ເພື່ອສຸຂະພາບຂອງທຸກຄົນ (COVID-19-HEALTH IN COMMON) ທີ່ໄດ້ປະກາດວັນທີ 9 ເມສາ 2020 ໄດ້ມີການອະນຸມັດເງິນຊ່ວຍເຫຼືອເພີ່ມຕື່ມ ວັນທີ 28 ເມສາ ຜ່ານມາ ໃຫ້ໂຄງການທີ່ປະສານງານໂດຍສະຖາບັນປັສເຕີ ເພື່ອສະໜັບສະໜູນຊ່ວຍເຫຼືອບັນດາຫ້ອງວິເຄາະຂອງປະເທດມຽນມາ ກຳປູເຈຍ ລາວ ຟີລິບປິນ ແລະ ຫວຽດ ນາມ ແນໃສ່ສະກັດກັ້ນການລະບາດຂອງພະຍາດ COVID-19 ເຊິ່ງມີຄວາມຈຳເປັນທີ່ຕ້ອງໄດ້ເຮັດໃຫ້ ການລະບາດຂອງພະຍາດນີ້ ໃນພາກພື້ນອາຊີຕາເວັນອອກສຽງໃຕ້ຊ້າລົງໃຫ້ໄດ້ຫຼາຍທີ່ສຸດ ອີງໃສ່ຄຳແນະ ນຳຂອງອົງການອະນາໄມໂລກ ດ້ວຍການໃຫ້ການສະໜັບສະໜູນຊ່ວຍເຫຼືອຜ່ານຫ້ອງວິເຄາະ ນະໂຍບາຍ ແລະ ຍຸດທະສາດຂອງບັນດາປະເທດຄູ່ຮ່ວມ ໃນການຄວບຄຸມການແຜ່ລະບາດຂອງເຊື້ອໄວຣັສ.
7 ຫ້ອງວິເຄາະຂອງບັນດາປະເທດທີ່ກ່າວມາຂ້າງເທິງ ຈະໄດ້ຮັບການຊ່ວຍເຫຼືອໂດຍກົງໃນການຕອບໂຕ້ການລະບາດຂອງພະຍາດດັ່ງກ່າວ ເຊັ່ນ: ເພີ່ມຄວາມສາມາດດ້ານອຸປະກອນ ຊື້ເຄື່ອງກວດວິເຄາະ ເຄື່ອງປ້ອງກັນສຳລັບພະນັກງານວິຊາການ ການເສີມສ້າງຊັບພະຍາກອນມະນຸດ ເຝິກອົບຮົມ ແລະ ຖ່າຍທອດຄວາມຮູ້-ຄວາມສາມາດ ພັດທະນາຍຸດທະສາດການວິເຄາະເຊື້ອພະຍາດ ປະກອບກັບການວິເຄາະໂມເລກຸນທີ່ໃຊ້ໃນປັດຈຸບັນ ສະໜັບສະໜູນວຽກງານປະມວນຂໍ້ມູນ ໂດຍການຮ່ວມມືກັບສະຖາບັນຄົ້ນຄວ້າເພື່ອການພັດທະນາ ເພື່ອຕິດຕາມເຝົ້າລະວັງການລະບາດຂອງເຊື້ອພະຍາດ ສຳລັບ ສປປ ລາວ ສະຖາບັນປັສເຕີລາວ ຈະໄດ້ຮັບການຊ່ວຍເຫຼືອດັ່ງກ່າວ ຕາມການສະເໜີຂອງກະຊວງສາທາລະນະສຸກຂອງລາວ ເພື່ອຕອບໂຕ້ການລະບາດຂອງພະຍາດ COVID-19.
# ພາບ & ຂ່າວ: ເພັດສະໝອນ