ການແຜ່ລະບາດເຊື້ອພະຍາດ COVID-19 ເຮັດໃຫ້ຫຼາຍປະເທດ ລວມທັງ ສປປ ລາວ ໄດ້ຮັບຜົນກະທົບໃນຫຼາຍຂະແໜງ ການ ສະເພາະຂະແໜງການທ່ອງທ່ຽວ ນັກທ່ອງທ່ຽວເຂົ້າມາລາວນັບມື້ຫຼຸດລົງ ແລະ ບໍ່ມີນັກທ່ອງທ່ຽວເຂົ້າມາເລີຍ ເນື່ອງຈາກຫຼາຍປະເທດກໍມີການແຜ່ລະບາດຂອງພະຍາດ COVID-19 ເຊັ່ນກັນ ເຮັດໃຫ້ລັດຖະບານໄດ້ປິດທຸກເສັ້ນທາງການສັນຈອນໄປ-ມາ ເພື່ອຄວບຄຸມການແຜ່ລະບາດພະຍາດດັ່ງກ່າວ.
ທ່ານ ພູວຽງ ໂພທິສານ ຜູ້ອຳນວຍການກອງວິຊາການພິພິທະພັນສະຖານບູຮານ ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ໃຫ້ສຳພາດວັນທີ 8 ພຶດສະພາ 2020 ວ່າ: ນັບແຕ່ເດືອນມັງກອນ-ກຸມພາ 2020 ສະພາບການບໍລິການທ່ອງທ່ຽວຢູ່ ສປປ ລາວ ໂດຍສະເພາະພິພິທະພັນພະທາດຫຼວງວຽງຈັນ ຫໍພະແກ້ວ ແລະ ພິພິທະພັນວັດສີສະເກດ ນັກທ່ອງທ່ຽວພາຍໃນ ແລະ ຕ່າງປະເທດກຳລັງເຂົ້າມາທ່ອງທ່ຽວນັບມື້ນັບເພີ່ມຂຶ້ນ ແລະ ນັບແຕ່ວັນທີ 1 ມີນາເປັນຕົ້ນມາ ພະຍາດ COVID-19 ໄດ້ມີການແຜ່ລະບາດ ແລະ ແຜ່ລາມໄປຍັງປະເທດຕ່າງໆທົ່ວໂລກ ໂດຍສະເພາະປະເທດເຮົາກໍພົບເຊື້ອຜູ້ເປັນພະຍາດດັ່ງກ່າວ ພັກ-ລັດຖະບານຈຶ່ງໄດ້ປິດທຸກເສັ້ນທາງຂອງການສັນຈອນ ເປັນຕົ້ນທາງບົກ ແລະ ທາງອາກາດ ພ້ອມທັງອອກມາດຕະການເຝົ້າລະວັງ ສະກັດກັ້ນການແຜ່ລະບາດພະຍາດ COVID-19 ຢ່າງເຂັ້ມງວດ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ກໍຄືພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ໄດ້ໃຫ້ທິດຊີ້ນຳ ພ້ອມອອກແຈ້ງການໃຫ້ປິດການບໍລິການແຫຼ່ງທ່ອງທ່ຽວສະຖານບູຮານ ແຕ່ວັນທີ 1 ເມສາ ເປັນຕົ້ນມາ (ພິພິທະພັນພະທາດຫຼວງວຽງຈັນ ຫໍພະແກ້ວ ແລະ ພິພິທະພັນວັດສີສະເກດ) ເຖິງວ່າຈະປິດ ພວກເຮົາກໍໄດ້ມີການແບ່ງພະນັກງານປະຈຳການເປັນປົກກະຕິທຸກວັນ ບໍ່ຍົກເວັ້ນວັນເສົາ-ອາທິດ ເພື່ອບູລະນະ ປົກປັກຮັກສາສະຖານທີ່ດັ່ງກ່າວໃຫ້ມີຄວາມສວຍງາມ ແລະ ຄົງຢູ່ໃນສະພາບເດີມ.
ປັດຈຸບັນພັກ-ລັດຖະບານ ກໍຄືຄະນະສະເພາະກິດຄວບຄຸມພະຍາດ COVID-19 ໄດ້ມີມາດຕະການຜ່ອນຜັນບາງຫົວໜ່ວຍທຸລະກິດ ແຕ່ສະຖານທີ່ທ່ອງທ່ຽວສະຖານບູຮານຍັງບໍ່ທັນໄດ້ເປີດໃຫ້ບໍລິການເທື່ອ ແຕ່ປະຊາຊົນພາຍໃນນະຄອນຫຼວງວຽງຈັນ ທີ່ມີຈຸດປະສົງຢາກເຂົ້າສັກກະລະບູຊາ ກໍສາມາດເຂົ້າໄປບູຊາໄດ້ ແຕ່ຕ້ອງໄດ້ປະຕິບັດມາດຕະການທີ່ຄະນະສະເພາະກິດວາງອອກຢ່າງເຂັ້ມງວດ.
ທ່ານ ພູວຽງ ໂພທິສານ ກ່າວຕື່ມອີກວ່າ: ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມ ສະຖານທີ່ທ່ອງທ່ຽວບູຮານສະຖານຂອງພວກເຮົາ ພາຍຫຼັງທີ່ສະພາບກັບຄືນສູ່ປົກກະຕິແລ້ວ ກໍຈະໄດ້ເອົາໃຈໃສ່ເຮັດຄວາມສະອາດ ສືບຕໍ່ວຽກງານແຜນວຽກຈຸດສຸມທີ່ຍັງຄົງຄ້າງ ແລະ ຂໍທິດຊີ້ນຳຈາກຂັ້ນເທິງຕື່ມອີກ.
# ພາບ & ຂ່າວ: ຂັນທະວີ