ຄະນະພົວພັນຕ່າງປະເທດສູນກາງພັກ (ຄຕພ) ຈັດກອງປະຊຸມສະຫຼຸບການເຄື່ອນໄຫວວຽກງານປະຈໍາປີ 2021 ຂຶ້ນວັນທີ 31 ມັງກອນ 2022 ຢູ່ສູນການຮ່ວມມືສາກົນ ແລະ ເຝີກອົບຮົມ (ICTC) ໂດຍເປັນປະທານຂອງສະຫາຍ ທອງສະຫວັນ ພົມວິຫານ ກຳມະການສູນກາງພັກ ເລຂາຄະນະພັກ ຫົວໜ້າຄະນະພົວພັນຕ່າງປະເທດສູນກາງພັກ ມີຄະນະພັກ-ຄະນະນໍາ ບັນດາກົມ ພະນັກງານອາວຸໂສບໍານານ ແລະ ສະມາຊິກພັກ-ພະນັກງານ ຄຕພ ເຂົ້າຮ່ວມ.
ກອງປະຊຸມໄດ້ຮັບຟັງການສະຫຼຸບຕີລາຄາກ່ຽວກັບການປະຕິບັດວຽກງານຂອງ ຄຕພ ໄລຍະ 1 ປີ ຜ່ານມາ ໂດຍໄດ້ຍົກໃຫ້ເຫັນຜົນງານທີ່ຍາດມາໄດ້ ບາງດ້ານທີ່ຄົງຄ້າງ ແລະ ບົດຮຽນທີ່ຖອດຖອນໄດ້ ພ້ອມນັ້ນ ກອງປະຊຸມຍັງໄດ້ເປີດໂອກາດໃຫ້ບັນດາຜູ້ເຂົ້າຮ່ວມປະກອບຄຳຄິດເຫັນເຂົ້າໃສ່ບົດສະຫຼຸບດັ່ງກ່າວ ເພື່ອໃຫ້ມີເນື້ອໃນຄົບຖ້ວນ ແລະ ເປັນເອກະພາບ ເພື່ອເປັນທິດທາງແຜນການຈັດຕັ້ງປະຕິບັດ ຄາດໝາຍສູ້ຊົນສຳລັບປີ 2022 ໃຫ້ມີຜົນສຳເລັດຍິ່ງຂຶ້ນ.
ໂອກາດນີ້ ສະຫາຍ ທອງສະຫວັນ ພົມວິຫານ ຍັງໄດ້ໃຫ້ກຽດໂອ້ລົມ ໂດຍກ່ອນອື່ນໝົດ ສະຫາຍໄດ້ສະແດງຄວາມຊົມເຊີຍຕໍ່ບັນດາຜົນສຳເລັດ ແລະ ຜົນງານທີ່ພະນັກງານຄະນະພົວພັນຕ່າງປະເທດສູນກາງພັກຍາດມາໄດ້ໃນ 1 ປີ ຜ່ານມາ ໂດຍສະເພາະ ການເຮັດສຳເລັດພາລະບົດບາດ ເປັນເສນາທິການໃຫ້ແກ່ສູນກາງພັກ ໃນການເຄື່ອນໄຫວຕ່າງປະເທດ ດ້ານພັກ ແລະ ການທູດປະຊາຊົນ ອັນໄດ້ເຮັດໃຫ້ບົດບາດອິດທິພົນຂອງພັກ-ລັດເຮົາໄດ້ຮັບການຍົກສູງໃນເວທີພາກພື້ນ ແລະ ສາກົນ ໃນປີ 2021 ເຖິງວ່າຈະມີການແຜ່ລະບາດຂອງພະຍາດໂຄວິດ-19 ແຕ່ກໍໄດ້ມີວິທີການເໝາະສົມໃນການເສີມຂະຫຍາຍການພົວພັນລະຫວ່າງພັກເຮົາກັບຕ່າງປະເທດ ພິເສດ ໃນປີ 2021 ຄະນະພົວພັນຕ່າງປະເທດສູນກາງພັກ ໄດ້ສໍາເລັດການຈັດກອງປະຊຸມໃຫຍ່ສະມາຊິກພັກ ຄັ້ງທີ II ຂອງອົງຄະນະພັກຂອງຕົນຂຶ້ນຢ່າງຈົບງາມ ພ້ອມນັ້ນ ໄດ້ມີຄໍາເຫັນຊີ້ນໍາໃຫ້ພະນັກງານ-ສະມາຊິກພັກ ຄຕພ ທຸກຖ້ວນໜ້າ ສຸມໃສ່ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ມະຕິກອງປະຊຸມໃຫຍ່ ຄັ້ງທີ II ຂອງອົງຄະນະພັກ ຄຕພ ແລະ ແຜນພັດທະນາ ຄຕພ ປີ 2021-2025 ໃຫ້ມີຜົນສຳເລັດເປັນກ້າວໆ.
ສະຫາຍ ທອງສະຫວັນ ພົມວິຫານ ໄດ້ສະແດງຄວາມເຊື່ອໝັ້ນວ່າ ດ້ວຍຈິດໃຈມານະບຸກບືນ ຄວາມສາມັກຄີເປັນເອກະພາບພາຍໃນ ຈະເຮັດໃຫ້ການປະຕິບັດໜ້າທີ່ຂອງຄະນະພົວພັນຕ່າງປະເທດສູນກາງພັກ ສືບຕໍ່ຍາດໄດ້ຜົນສຳເລັດໃຫຍ່ກວ່າເກົ່າ ສືບຕໍ່ສ້າງສະພາບແວດລ້ອມທີ່ອໍານວຍຄວາມສະດວກໃຫ້ແກ່ການປົກປັກຮັກສາ ແລະ ສ້າງສາປະເທດຊາດໃຫ້ຈະເລີນກ້າວໜ້າ.
.# ຂ່າວ & ພາບ : ລັດເວລາ