ນັບແຕ່ທ້າຍເດືອນທັນວາ 2019 ເຖິງປັດຈຸບັນ ຈຳນວນຄົນເຈັບສະສົມໄຂ້ຍຸງລາຍ (ໄຂ້ເລືອດອອກ) ແມ່ນນັບມື້ເພີ່ມຂຶ້ນ ໂດຍສະເພາະໃນໄລຍະກ້າວເຂົ້າສູ່ລະດູຝົນ ຍິ່ງມີຄວາມສ່ຽງໃນການແຜ່ລະບາດຂອງໄຂ້ຍຸງລາຍສູງຂຶ້ນ ເພື່ອສະກັດກັ້ນພະຍາດດັ່ງກ່າວ ແລະ ຫຼຸດຜ່ອນຈຳນວນຄົນເຈັບທີ່ຈະເກີດຂຶ້ນໃໝ່ ທຸກຄົນຄວນຫັນມາເອົາໃຈໃສ່ປ້ອງກັນ ແລະ ສະກັດກັ້ນແຕ່ຫົວທີ ໂດຍການເອົາໃຈໃສ່ປະຕິບັດຕາມຫຼັກການ 5ປ ທີ່ກະຊວງສາທາລະນະສຸກວາງອອກຢ່າງເຂັ້ມງວດ.
ຂໍ້ມູນຂອງສູນຂ່າວສານການແພດສຸຂະສຶກສາ ກະຊວງສາທາລະນະສຸກ ແຈ້ງໃຫ້ຮູ້ວັນທີ 11 ພຶດສະພາ 2020 ວ່າ: ນັບແຕ່ວັນທີ 28 ທັນວາ 2019-11 ພຶດສະພາ 2020 ມີຜູ້ຕິດເຊື້ອໄຂ້ຍຸງລາຍແລ້ວ 1.069 ກໍລະນີ ເສຍຊີວິດ 1 ຄົນ ໃນນີ້ນະຄອນຫຼວງວຽງຈັນ ພົບຜູ້ຕິດເຊື້ອໄຂ້ຍຸງລາຍ 314 ກໍລະນີ ເສຍຊີວິດ 1 ຄົນ ແຂວງອັດຕະປື 165 ກໍລະນີ ວຽງຈັນ 130 ກໍລະນີ ຄຳມ່ວນ 81 ກໍລະນີ ບໍລິຄຳໄຊ 77 ກໍລະນີ ສາລະວັນ 72 ກໍລະນີ ສະຫວັນນະເຂດ 59 ກໍລະນີ ໄຊຍະບູລີ 54 ກໍລະນີ ເຊກອງ 42 ກໍລະນີ ຫຼວງນ້ຳທາ 28 ກໍລະນີ ອຸດົມໄຊ 22 ກໍລະນີ ຈຳປາສັກ ແລະ ໄຊສົມບູນ ແຂວງລະ 7 ກໍລະນີ ຜົ້ງສາລີ 5 ກໍລະນີ ແລະ ຫຼວງພະບາງ 6 ກໍລະນີ ສ່ວນແຂວງຊຽງຂວາງ ບໍ່ແກ້ວ ແລະ ຫົວພັນ ບໍ່ມີກໍລະນີຜູ້ຕິດເຊື້ອໄຂ້ຍຸງລາຍ.
ສຳລັບຫຼັກການ 5ປ ທີ່ທຸກຄົນ ກໍຄືທຸກຄອບຄົວຕ້ອງປະຕິບັດໃຫ້ໄດ້ເປັນປະຈຳ ປະກອບມີ ປິດຝາພາຊະນະເກັບນ້ຳໃນເຮືອນ ແລະ ນອກເຮືອນ ເພື່ອບໍ່ໃຫ້ຍຸງມາໄຂ່ໃສ່ ປ່ຽນນ້ຳໃນພາຊະນະ ເຊັ່ນ: ເຕົ້າດອກໄມ້ ນ້ຳຮອງຕີນຕູ້ ຖ້ານຮອງຈອກນ້ຳ ປ່ອຍປາຫາງນົກຍຸງເພື່ອກິນໜອນນ້ຳ ປັບປຸງການອະນາໄມ ສິ່ງແວດລ້ອມອ້ອມເຮືອນບໍ່ໃຫ້ມີກະໂປະ ກະປ໋ອງ ຢາງຕີນລົດເກົ່າທີ່ມີນ້ຳຂັງ ປະຕິບັດໃຫ້ເປັນນິໄສປະຈຳທຸກໆອາທິດ ຖ້າເປັນໄຂ້ໃຫ້ໄປພົບແພດໝໍດ່ວນ ຫາກທຸກຄົນປະຕິບັດໄດ້ຕາມ 5ປ ຢ່າງເຂັ້ມງວດ ກໍຈະສາມາດຫຼຸດຜ່ອນ ແລະ ປ້ອງກັນການເຈັບເປັນຈາກພະຍາດດັ່ງກ່າວໄດ້.
# ພາບ & ຂ່າວ: ເພັດສະໝອນ