ເລີ່ມແຕ່ເດືອນມີນາຫາເດືອນພຶດສະພາຂອງທຸກໆປີ ທົ່ວນະຄອນຫຼວງວຽງຈັນ ມັກຈະເກີດມີເຫດໄຟໄໝ້ຢູ່ຫຼາຍແຫ່ງ ເຊັ່ນ: ທີ່ພັກອາໃສຫົວໜ່ວຍທຸລະກິດ ການຜະລິດ ຕະຫຼາດ ປ່າຫຍ້າ ປ່າໄມ້ ແລະ ເຂດຊຸມຊົນ ເຊິ່ງມັນໄດ້ສ້າງຜົນເສຍຫາຍເຖິງແກ່ຊີວິດ ຊັບສິນຂອງລັດ ລວມໝູ່ ເອກະຊົນ ແລະ ຂອງບຸກຄົນເປັນຈຳນວນຫຼາຍ ສາເຫດໄຟໄໝ້ສ່ວນໃຫຍ່ແມ່ນຍ້ອນການເລີນເລີ້ ຂາດສະຕິ ຂາດຄວາມຮັບຜິດຊອບ ຄວາມຮູ້ເທົ່າບໍ່ເຖິງການ ແລະ ການກວດກາບໍ່ຮອບຄອບ ເປັນຕົ້ນແມ່ນການໃຊ້ໄຟເຂົ້າໃນການຜະລິດ ການດຳເນີນທຸລະກິດ ການດຳລົງຊີວິດປະຈຳວັນ ການຈູດຂີ້ເຫຍື້ອ ຈູດປ່າ ຈູດໄຮ່ ໄຕ້ທູບທຽນບູຊາ ແລະ ອື່ນໆ.
ພະແນກຕຳຫຼວດສະກັດກັ້ນ ແລະ ຕ້ານອັກຄີໄພ ນະຄອນຫຼວງວຽງຈັນ ໃຫ້ຮູ້ວ່າ: ໃນເດືອນເມສາ 2020 ຜ່ານມາ ທົ່ວນະຄອນຫຼວງວຽງຈັນ ມີອັກຄີໄພເກີດຂື້ນທັງໝົດ 7 ຄັ້ງ ໃນນີ້ ໄໝ້ເຮືອນ 3 ຄັ້ງ ໄໝ້ລົດ 1 ຄັ້ງ ແລະ ໄໝ້ປ່າຫຍ້າ 3 ຄັ້ງ ມູນຄ່າຄວາມເສຍຫາຍ ເງິນກີບ 265 ລ້ານກວ່າກີບ ໂດລາ 10 ພັນໂດລາ ເຊິ່ງສາເຫດຂອງການເກີດອັກຄີໄພແມ່ນມາຈາກໄຟຟ້າຊ໋ອດ 2 ຄັ້ງ ໃຕ້ທຽນບູຊາ 1 ຄັ້ງ ໄຟຊ໋ອດສາຍມັດລົດ 1 ຄັ້ງ ແລະ ຈູດປ່າຊະຊາຍ 3 ຄັ້ງ.
ສະນັ້ນ ມັນຈຶ່ງຮຽກຮ້ອງໃຫ້ພໍ່ແມ່ປະຊາຊົນທົ່ວສັງຄົມ ຈົ່ງເພີ່ມທະວີເອົາໃຈໃສ່ໃນການສະກັດກັ້ນ ແລະ ປ້ອງກັນອັກຄີໄພຢ່າງເຂັ້ມງວດ ໂດຍສະເພາະແມ່ນ ໃຫ້ເອົາໃຈໃສ່ກວດກາລະບົບໄຟຟ້າພາຍໃນເຮືອນຂອງຕົນໃຫ້ປົກກະຕິ ພ້ອມດຽວກັນນີ້ ໃຫ້ເອົາໃຈໃສ່ເປັນພິເສດໃນການຈູດຂີ່ເຫຍື່ອ ຈູດປ່າ ເພື່ອບໍ່ໃຫ້ແຜ່ລາມໄປໄໝ້ເຮືອນຊານຂອງປະຊາຊົນບໍລິເວນຢູ່ໃກ້ຄຽງ ເພາະໄລຍະນີ້ອາກາດແຫ້ງແລ້ງ ອົບເອົ້າ ອາດມີຄວາມສ່ຽງເຮັດໃຫ້ເກີດໄຟໄໝ້ໄດ້ງ່າຍ.
ໃນປີ 2019 ທົ່ວນະຄອນຫຼວງວຽງຈັນ ມີອັກຄີໄຟເກີດຂຶ້ນທັງໝົດ 80 ຄັ້ງ ທຽບໃສ່ປີ 2018 ເພີ່ມຂຶ້ນເຖິງ 40 ຄັ້ງ ໃນນີ້ ໄໝ້ໃຫຍ່ 2 ຄັ້ງ ໄໝ້ນ້ອຍ 78 ຄັ້ງ ຜົນເສຍເຫຍໄໝ້ ເປັນຫ້ອງ 25 ຫ້ອງ ເປັນສາງ ເຄື່ອງ 1 ສາງ ເປັນຫຼັງ 36 ຫຼັງ ປ່າຫຍ້າ 12 ໄລ່ ຫ້ອງແຖວ 3 ຫ້ອງ ລົດຈັກ 6 ຄັນ ຮ້ານຂາຍເຄື່ອງ 26 ຮ້ານ ໄໝ້ເຄື່ອງຢາງທີ່ເປັນປະຣາສະຕິກ 10 ໂຕນ ແລະ ອື່ນໆ ລວມມູນຄ່າຄວາມເສຍຫາຍເປັນເງິນກີບ 12.8 ຕື້ກີບ ເງິນບາດ 3 ແສນບາດ ແລະ ເງິນໂດລາສະຫະລັດ 50 ພັນໂດລາ.
ເພື່ອຮັບມືຈາກບັນຫາທີ່ຈະເກີດຂຶ້ນນັ້ນ ທາງພະແນກຕຳຫຼວດສະກັດກັ້ນ ແລະ ຕ້ານອັກຄີໄພ ນະຄອນຫຼວງວຽງຈັນ ຈະສືບຕໍ່ເຝິກແອບ ເຝິກຊ້ອມ ບົວລະບັດຮັກສາພາຫະນະອຸປະກອນໃຫ້ມີຄວາມພ້ອມໃຊ້ງານ ສືບຕໍ່ຂຶ້ນແຜນກວດກາ ແລະ ລົງກວດກາຄວາມປອດໄພທາງດ້ານອັກຄີ ໄຟໃຫ້ກັບບັນດາກິດຈະການກໍ່ສ້າງໃໝ່ ສຳນັກງານ ໂຮງແຮມ ບໍລິສັດຕ່າງໆຢູ່ຕາມພື້ນຖານ ສືບຕໍ່ຂຶ້ນແຜນລົງໂຄສະນາ ແລະ ເຝິກອົບຮົມກ່ຽວກັບວຽກງານສະກັດກັ້ນ ແລະ ຕ້ານອັກຄີໄຟ ກູ້ໄພ ໃຫ້ບັນດາໂຮງແຮມ ເຮືອນພັກ ໂຮງງານ ສຳນັກງານ ບໍລິສັດຕ່າງໆຕາມແຜນການ ເພື່ອເຮັດໃຫ້ກຸ່ມຄົນເຫຼົ່ານັ້ນຮັບມືກັບເຫດການໄຟໄໝ້.