ໃນບົດປະຈຳວັນນີ້ ມີຂ່າວກ່ຽວກັບມາດຕະການຂອງຣັດເຊຍ ເພື່ອຊ່ວຍເຫຼືອຜູ້ໄດ້ຮັບຜົນກະທົບຈາກໂຄວິດ-19 ແລະ ເລື່ອງຄະດີອູ້ມບຸນຢູ່ກຳປູເຈຍ.
ທີ່ ຣັດເຊຍ: ຕໍ່ໜ້າໄພພິບັດຈາກໂລກລະບາດໂຄວິດ-19 ທ່ານປະທານາທິບໍດີ ວະລາດີເມຍ ປູຕິນ ແຫ່ງ ສະຫະພັນຣັດເຊຍ ໄດ້ປະກາດນະໂຍບາຍຫຼາຍຢ່າງ ເພື່ອບັນເທົາຜົນກະທົບຂອງການລະບາດທີ່ມີຕໍ່ບຸກຄົນ ແລະ ຂະແໜງການຕ່າງໆ ໃນນັ້ນ ລວມທັງນະໂຍບາຍໃຫ້ຊາວຣັດເຊຍທັງໝົດພັກການ ແຕ່ໄດ້ຮັບເງິນເດືອນ-ຄ່າແຮງງານຕາມເດີມ ນັບແຕ່ທ້າຍເດືອນມີນາປີນີ້ເປັນຕົ້ນມາ ສ່ວນສຳນັກງານອົງການທີ່ມີຄວາມຈຳເປັນ ເຊັ່ນ: ໂຮງພະຍາບານ ຮ້ານຂາຍຢາປິ່ນປົວ ຮ້ານຄ້າ ທະນາຄານ ຂະແໜງຂົນສົ່ງ ແລະ ໜ່ວຍງານຂອງລັດທຸກໆຂັ້ນນັ້ນ ຈະຍັງສືບຕໍ່ປະຕິບັດງານຕາມເດີມ.
ນອກຈາກນັ້ນ ທ່ານປະທານາທິບໍດີ ຍັງໄດ້ສະເໜີໃຫ້ໂຈະບັ້ນຢັ່ງຫາງສຽງປະຊາມະຕິ ເພື່ອປັບປຸງລັດຖະທຳມະນູນທີ່ກຳນົດຈະມີຂຶ້ນ ໃນວັນທີ 22 ເດືອນເມສາປີນີ້ ສ່ວນວ່າຈະປ່ຽນໃສ່ເວລາໃດນັ້ນ ຈະຕ້ອງໄດ້ປຶກສາຫາລືກັບບັນດາຊ່ຽວຊານສະເພາະການກ່ອນ ທ່ານປະທານາທິບໍດີໄດ້ຮຽກຮ້ອງໃຫ້ບັນດານາຍຈ້າງ ຮັບປະກັນສະຖຽນລະພາບຂອງຕະຫຼາດແຮງງານ ແລະ ປ້ອງກັນບໍ່ໃຫ້ມີສະພາບວ່າງງານສູງຂຶ້ນ ນອກຈາກນັ້ນ ທ່ານຍັງໄດ້ສະເໜີໃຫ້ເພີ່ມເງິນຊົດເຊີຍໃຫ້ພວກວ່າງງານ ແລະ ເງິນອຸດໜູນບັນດາແມ່ທີ່ມີລູກນ້ອຍອີກດ້ວຍ.
ທີ່ ກຳປູເຈຍ: ໃນຕົ້ນເດືອນພະຈິກ ປີ 2016 ທາງການກຳປູເຈຍ ໄດ້ເລີ່ມປະຕິບັດມາດຕະການ ຫ້າມແມ່ຍິງກຳປູເຈຍຖືພາມານ ໃນລັກສະນະການຄ້າໃຫ້ຄູ່ຜົວເມຍອື່ນທີ່ຕ້ອງການມີລູກ ການຖືພາມານແທນກັນນີ້ ເອີ້ນກັນວ່າ ອູ້ມບຸນ ມາດຕະການຫ້າມນີ້ ມີຂຶ້ນພາຍຫຼັງການຈັບກຸມຍິງຊາວອົດສະຕຣາລີຄົນໜຶ່ງມີຊື່ວ່າ ນາງ ແທມມີ ເດວິດຊາກ ອາຍຸ 49 ປີ ທີ່ເຄື່ອນໄຫວເປັນນາຍໜ້າ ວ່າຈ້າງໃຫ້ແມ່ຍິງກຳປູເຈຍ ຖືພາມານແທນຄູ່ຜົວເມຍຕ່າງປະເທດທີ່ຕ້ອງການມີລູກ ແຕ່ບໍ່ສາມາດຖືພາມານເອງ ຫຼື ຍ້ອນຂີ້ຄ້ານອູ້ມທ້ອງເອງ.
ນາງ ແທມມີ ຄົນນີ້ ຍ້າຍມາເຄື່ອນໄຫວຢູ່ກຳປູເຈຍ ແຕ່ປີ 2015 ແລະ ໄດ້ຕິດຕໍ່ແມ່ຍິງກຳປູເຈຍ ຈຳນວນ 23 ຄົນ ໃຫ້ອູ້ມບຸນແທນຄູ່ຜົວເມຍຢູ່ໃນອົດສະຕຣາລີ ຂ່າວບອກວ່າ: ຄູ່ຜົວເມຍທີ່ຕ້ອງການ ການບໍລິການຂອງນາງຕ້ອງໄດ້ຈ່າຍເງິນຈຳນວນ 50.000 ໂດລາສະຫະລັດ ໃນເວລາຂ່າວນີ້ພວມໂດ່ງດັງຂຶ້ນນັ້ນ ຍິງກຳປູເຈຍທີ່ອູ້ມບຸນນັ້ນ ໄດ້ເກີດລູກແລ້ວ 5 ຄົນ ແມ່ຍິງກຳປູເຈຍທີ່ເຮັດໜ້າທີ່ຖືພາມານແທນນັ້ນ ໄດ້ເງິນຄ່າເມື່ອຍລະຫວ່າງ 10-12 ພັນໂດລາສະຫະລັດ ຕໍ່ການອູ້ມບຸນໜຶ່ງຄັ້ງ.
ແຈ້ງການທີ່ເຊັນໂດຍລັດຖະມົນຕີ ສາທາລະນະສຸກ ໃນອາທິດທີ 2 ເດືອນພະຈິກ ປີ 2016 ນັ້ນ ໄດ້ຮຽກຮ້ອງໃຫ້ຜູ້ປະກອບອາຊີບແພດໝໍທຸກຄົນ ປະຕິບັດຕາມແຈ້ງການ ຫ້າມການອູ້ມບຸນທີ່ມີລັກສະນະການຄ້າຢ່າງເດັດຂາດ ໃນເວລານັ້ນ ສະຖິຕິຊີ້ບອກວ່າ ໃນກຳປູເຈຍມີນາຍໜ້າປະມານ 50 ຄົນ ທີ່ຂົນຂວາຍວ່າຈ້າງໃຫ້ແມ່ຍິງກຳປູເຈຍອູ້ມບຸນ ຫຼື ຖືພາມານແທນຄົນອື່ນ.
ໃນເມື່ອກ່ອນຂະບວນການອູ້ມບຸນນີ້ ໄດ້ແຜ່ລະບາດຢູ່ໃນອິນເດຍ ແລະ ໄທ ຕໍ່ມາໄທ ແລະ ອິນເດຍ ອອກກົດໝາຍກຳນົດໃຫ້ການອູ້ມບຸນ ໃນທາງການຄ້າເປັນການກະທຳຜິດກົດໝາຍ ດັ່ງນັ້ນ ຂະບວນການດັ່ງກ່າວ ຈຶ່ງເຄື່ອນເຂົ້າໄປກຳປູເຈຍ.
ນາງ ແທມມີ ທີ່ສວຍໃຊ້ອາຊີບນາງພະຍາບານຂອງຕົນເປັນສາກບັງໜ້າ ເພື່ອເຄື່ອນໄຫວແບບຜິດກົດໝາຍຢູ່ກຳປູເຈຍ ໄດ້ຖືກສົ່ງຕົວຂຶ້ນສານກຳປູເຈຍ ໂທດສຳລັບການກະທຳຜິດສະຖານນີ້ນັ້ນມີ ກໍຄື ຕິດຄຸກສູງສຸດເປັນເວລາ 2 ປີ (ແຫຼ່ງຂ່າວຈາກໜັງສືພິມ ເດິເນເຊິນ 21/11/2016).