ກອງປະຊຸມດໍາເນີນຊີວິດການເມືອງ ຂອງຄະນະພັກຮາກຖານ ພະແນກກະສິກໍາ ແລະ ປ່າໄມ້ນະຄອນຫຼວງວຽງຈັນ (ກປ ນວ) ຈັດຂຶ້ນໃນວັນທີ 21 ມັງກອນ 2022 ຢູ່ພະແນກດັ່ງກ່າວ ໂດຍການເປັນປະທານຂອງສະຫາຍ ອານຸພາບ ຕຸນາລົມ ເລຂາທິການສູນກາງພັກ ເລຂາຄະນະພັກ ປະທານສະພາປະຊາຊໍົນນະຄອນຫຼວງວຽງຈັນ ມີສະຫາຍ ຫຼ້າສາຍ ນວນທາສິງ ເລຂາຄະນະພັກຮາກຖານ ພະແນກ ກປ ນວ ພ້ອມດ້ວຍສະຫາຍຮອງເລຂາຄະນະພັກຮາກຖານ ແລະ ສະມາຊິກພັກ ເຂົ້າຮ່ວມ.
![](https://v2.vientianemai.net/wp-content/uploads/2022/01/270401461_642358437182696_1378099971410984697_n-1024x683.jpg)
ກອງປະຊຸມ ໄດ້ຮັບຟັງການຜ່ານບົດສະຫຼຸບການຈັດຕັ້ງວຽກງານຊີ້ນໍາ-ນໍາພາຮອບດ້ານຂອງຄະນະພັກຮາກຖານ ພະແນກ ກປ ນວ ປະຈໍາປີ 2021 ແລະ ທິດທາງແຜນການປີ 2022 ຜ່ານບົດສໍາຫຼວດການນໍາພາຂອງຄະນະພັກຮາກຖານ ພະແນກ ກປ ນວ ຜ່ານໃບສໍາຫຼວດເລຂາຄະນະພັກຮາກຖານ ແລະ ຜ່ານໃບສໍາຫຼວດຂອງຄະນະປະຈໍາພັກ.
![](https://v2.vientianemai.net/wp-content/uploads/2022/01/270306007_353841569588072_883537657266849202_n-1024x683.jpg)
ໂອກາດນີ້ ສະຫາຍ ອານຸພາບ ຕຸນາລົມ ກ່າວວ່າ: ຜ່ານການຮັບຟັງລາຍງານບົດສະຫຼຸບ ການຈັດຕັ້ງວຽກງານຊີ້ນໍາ-ນໍາພາຮອບດ້ານ ຂອງຄະນະພັກຮາກຖານພະແນກ ກປ ນວ ປະຈໍາປີ 2021 ແລະ ທິດທາງແຜນການ ປີ 2022 ການປະກອບຄໍາເຫັນຂອງບັນດາສະຫາຍ ເຫັນວ່າໃນໄລຍະຜ່ານມາ ການນໍາພາຂອງຄະນະພັກຮາກຖານ ພະແນກ ກປ ນວ ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VII ຂອງຄະນະພັກຮາກຖານ ແລະ ການປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງ ນວ ກອງປະຊຸມຂອງພວກສະຫາຍສຸດທີ່ມີຄວາມໝາຍຄວາມສໍາຄັນ ມັນເປັນການສະຫຼຸບຕີລາຄາຮອບດ້ານຜົນງານການຊີ້ນໍາ-ນໍາພາ ຂອງຄະນະພັກຮາກຖານພະແນກຂອງພວກສະຫາຍໃນໄລຍະໜຶ່ງປີຜ່ານມາ ກອງປະຊຸມໄດ້ຊອກໃຫ້ເຫັນບັນດາມາດຕະການ ວິທີການຈັດຕັ້ງປະຕິບັດຕົວຈິງທາງດ້ານຕັ້ງຫນ້າ ແລະ ດ້ານອ່ອນ ຂໍ້ຄົງຄ້າງ ຂອງການນໍາພາແຕ່ລະດ້ານ ຈາກນັ້ນ ພວກສະຫາຍກໍໄດ້ກໍານົດທິດທາງແຜນການ ມາດຕະການ ວິທີຈັດຕັ້ງປະຕິບັດ ແລະ ວິທີການແກ້ໄຂບັນດາຂໍ້ຄົງຄ້າງໃນໄລຍະຜ່ານມາ ເພື່ອໃຫ້ຮາກຖານພັກພວກສະຫາຍກ້າວຂຶ້ນໄດ້ຮັບໄຊຊະນະໃໝ່ໃຫຍ່ກ່ວາເກົ່າ ຂ້າພະເຈົ້າຂໍຕີລາຄາສູງຕໍ່ໝາກຜົນແຫ່ງການຊີ້ນໍາ-ນໍາພາ ແລະ ຈິດໃຈບຸກບືນສູ້ຊົນຂອງບັນດາສະຫາຍຄະນະພັກຮາກຖານ ໜ່ວຍພັກ ອົງການຈັດຕັ້ງມະຫາຊົນ.
![](https://v2.vientianemai.net/wp-content/uploads/2022/01/270856339_1565587750474360_5146956228043604214_n-1024x683.jpg)
ບົດສະຫຼຸບການຊີ້ນໍາ-ນໍາພາຮອບດ້ານ ປະຈໍາປີ 2021 ຂອງພວກສະຫາຍ ຍັງໄດ້ຍົກໃຫ້ເຫັນຜົນງານອັນພົ້ນເດັ່ນ ເຊິ່ງເປັນໜ້າພາກພູມໃຈ ທີ່ຄະນະພັກຮາກຖານໄດ້ຮັບຮອງເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ຈໍານວນ 12 ໜ່ວຍພັກ ພາຍໃຕ້ການຊີ້ນໍາ-ນໍາພາຂອງຄະນະພັກຮາກຖານ ໄດ້ນໍາພາສຶກສາ-ອົບຮົມການເມືອງແນວຄິດ ເຮັດໃຫ້ສະຊິກພັກ-ພະນັກງານ ມີຄວາມສະຫງົບໂດຍພື້ນຖານ ມີຄວາມໜັກແໜ້ນທາງດ້ານການເມືອງ ການນໍາພາດ້ານວຽກງານເສດຖະກິດ-ສັງຄົມ ມີຄອບຄົວສ້າງເສດຖະກິດດ້ານການບໍລິການດ້ານການປູກຝັງ ການລ້ຽງສັດ-ການປະມົງ ແລະ ອື່ນໆ ດ້ານວຽກງານວິຊາສະເພາະ ສາມາດຜະລິດເຂົ້າ ພືດຜັກ ໝາກໄມ້ ຊີ້ນ ປາ ກໍສະໜອງໄດ້ໂດຍພື້ນຖານການຜະລິດກະສິກໍາ ແລະ ປ່າໄມ້ ສືບຕໍ່ຂະຫຍາຍຕົວຢ່າງຕໍ່ເນື່ອງ ປະກອບສ່ວນໃຫ້ GDP ຂອງ ນວ ຂະຫຍາຍຕົວ ໂດຍສະເພາະການປະຕິບັດແຜນງານດ້ານການຄ້ໍາປະກັນສະບຽງອາຫານ ເຊັ່ນ:ການຜະລິດເຂົ້ານາປີ ສາມາດປະຕິບັດໄດ້ 99,1% ຂອງແຜນການ ພືດຜັກ ແລະ ການປູກພືດອຸດສາຫະກໍາ ແມ່ນສາມາດຈັດຕັ້ງປະຕິບັດໄດ້ລື່ນຄາດໝາຍ ຖ້າທຽບໃສ່ແຜນການທີ່ວາງໄວ້ ນອກຈາກນີ້ ກໍຍັງມີການລ້ຽງສັດ ງົວ ໝູ ໄກ່ ລ້ຽງປາ ແລະ ການນໍາພາການຜະລິດກະສິກໍາ ແລະ ປ່າໄມ້ ເປັນສິນຄ້າ ເຊິ່ງໄດ້ປະຕິບັດ ຕາມ 8 ໂຄງການທີ່ວາງໄວ້.
ການປົກຫຸ້ມສີຂຽວໃຫ້ໄດ້ 70% ຮອດປີ 2025 ປັດຈຸບັນ ມີເນື້ອທີ່ສີຂຽວປົກຫຸ້ມ 57,7% ແຜນງານພັດທະນາຊົນນະບົດ ແລະ ລຶບລ້າງຄວາມທຸກຍາກ ສໍາເລັດຜົນການເກັບກໍາຂໍ້ມູນວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ ຕາມດໍາລັດ 348/ລບ ຜົນສໍາເລັດທີ່ພວກສະຫາຍຍາດມາໄດ້ ມີລັກສະນະຮອບດ້ານ ມັນແມ່ນໝາກຜົນຂອງການຈັດຕັ້ງປະຕິບັດແນວທາງປ່ຽນແປງໃໝ່ຂອງພັກ ມັນແມ່ນການປະກອບສ່ວນອັນສໍາຄັນຂອງສະມາຊິກພັກ ພະນັກງານ ເຂົ້າໃນຜົນງານລວມຂອງຊາດ ແລະ ເປັນພື້ນຖານໜັກແໜ້ນກ້າວໄປໃນຊຸມປີຕໍ່ໜ້າ.
. # ຂ່າວ – ພາບ : ສີພອນ