ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ໄດ້ຕາງໜ້າໃຫ້ລັດຖະບານລາວ ຮັບເຄື່ອງຊ່ວຍເຫຼືອຈາກສູນກາງແນວລາວສ້າງຊາດ ຮ່ວມກັບມູນນິທິວີເລີບຢູນານາຊາດ (The International WeLoveU Foundation) ບໍລິສັດ Olive tree ບໍລິສັດລາວ-ຊິນຊູຈຳກັດຜູ້ດຽວ ວັນທີ 11 ພຶດສະພາ 2020 ຢູ່ສຳນັກງານສູນກາງແນວລາວສ້າງຊາດ.
ສຳລັບເຄື່ອງທີ່ໄດ້ຮັບຄັ້ງນີ້ ປະກອບມີ COVID-19 Detection Kit ຜ້າອັດປາກ-ດັງ ເຄື່ອງກວດເບົາຫວານ ແຜ່ນກວດເບົາຫວານ ລວມມູນຄ່າ 1.163.000.000 ກີບ ເຊິ່ງຕາງໜ້າມອບໂດຍທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ແລະ ຮັບໂດຍທ່ານ ບຸນກອງ ສີຫາວົງ ເຊິ່ງການຂົນສົ່ງເຄື່ອງຊ່ວຍເຫຼືອຄັ້ງນີ້ ໄດ້ຮັບການອຳນວຍສະດວກຈາກລັດວິສາຫະກິດການບິນລາວ ສະຖານ ທູດລາວປະຈຳ ສ ເກົາຫຼີ ສະຖານທູດລາວປະຈຳລາຊະອານາຈັກໄທ.
ທ່ານລັດຖະມົນຕີກະຊວງສາທາລະນະສຸກ ໄດ້ສະແດງຄວາມຂອບໃຈຕໍ່ສູນກາງແນວລາວສ້າງຊາດ ແລະ ພາກສ່ວນຕ່າງໆທີ່ກ່ຽວຂ້ອງ ທີ່ໄດ້ປະກອບສ່ວນໃນການຕ້ານການແຜ່ລະບາດຂອງພະຍາດ COVID-19 ຢູ່ລາວ ພ້ອມທັງຢືນຢັນວ່າຈະນຳເອົາເຄື່ອງທີ່ມາຊ່ວຍເຫຼືອທັງໝົດ ໄປນຳໃຊ້ໃຫ້ເກີດຜົນປະ ໂຫຍດສູງສຸດ.
# ຂ່າວ & ພາບ: ສົມສະຫວັນ