ນັບແຕ່ປະເທດເຮົາໄດ້ມີລາຍງານຜູ້ຕິດເຊື້ອໂຄວິດ-19 ທຸກໝ່ວຍງານທັງພາກລັດ ແລະ ເອກະຊົນໄດ້ມີສ່ວນຮ່ວມໃນການຕ້ານ ແລະ ສະກັດກັ້ນການແຜ່ລະບາດຢ່າງເປັນຂະບວນການ ໃນນັ້ນຄະນະບໍລິຫານງານຊາວໜຸ່ມເມືອງສີໂຄດຕະບອງ ນະຄອນຫຼວງວຽງຈັນ ກໍໄດ້ເອົາໃຈໃສ່ປະກອບສ່ວນ ໂດຍໄດ້ສົມທົບກັບຄະນະສະເພາະກິດຂັ້ນເມືອງ ພ້ອມກັນເປັນເຈົ້າການຈັດຕັ້ງປະຕິບັດຄຳສັ່ງຂອງນາຍົກລັດຖະ ມົນຕີ ສະບັບເລກທີ 06/ນຍ ແລະ ແຈ້ງການຕ່າງໆຂອງຂັ້ນເທິງວາງອອກ.
ທ່ານ ນາງ ສີສຸດາ ເພັງພົງສະຫວັດ ເລຂາຄະນະບໍລິຫານງານຊາວໜຸ່ມເມືອງສີໂຄດຕະບອງ ໃຫ້ສຳພາດວັນທີ 7 ພຶດສະພາ 2020 ວ່າ: ພາຍຫຼັງທີ່ມີຄຳສັ່ງຂອງນາຍົກລັດຖະມົນຕີສະບັບເລກທີ 06/ນຍ ວ່າດ້ວຍການເພີ່ມທະວີມາດຕະການສະກັດກັ້ນ ແລະ ຄວບຄຸມການແຜ່ລະບາດພະຍາດ COVID-19ຄະນະປະຈຳພັກເມືອງໄດ້ແຕ່ງຕັ້ງຄະນະກຳມະການສະເພາະກິດຂັ້ນເມືອງສີໂຄດຕະບອງຂຶ້ນ ເຊິ່ງຄະນະບໍລິຫານງານຊາວໜຸ່ມເມືອງໄດ້ປະກອບໃນຄະນະກຳມະການສະເພາະກິດຂັ້ນເມືອງເຊັ່ນດຽວກັນ ໂດຍໄດ້ຕັ້ງຈຸດກວດກາຄົນເຂົ້າ-ອອກເມືອງ 7 ຈຸດໃຫຍ່ໃນທົ່ວເມືອງ ໃນນີ້ຄະນະບໍລິຫານງານຊາວໜຸ່ມເມືອງພ້ອມດ້ວຍຄະນະຊາວໜຸ່ມຮາກຖານບ້ານໄດ້ເຂົ້າຮ່ວມຕາມຈຸດດັ່ງກ່າວເປັນຈຳນວນ 834 ຄົນ ຍິງ 108 ຄົນ ລວມທັງໝົດ 2.845 ເທື່ອຄົນ ຍິງ 777 ເທື່ອຄົນ.
ການຈັດຕັ້ງປະຕິບັດວຽກງານຕົວຈິງແມ່ນໄດ້ເຄື່ອນໄຫວຕາມຈຸດຕ່າງໆ ໃນນີ້ກວດກາລົດເຂົ້າ-ອອກເມືອງ ພ້ອມທັງວັດແທກອຸນຫະພູມຂອງຜູ້ໂດຍສານ ແລະ ໃຫ້ຄຳແນະນຳກ່ຽວກັບຜົນຮ້າຍ ວິທີປ້ອງກັນຕົນເອງຈາກການລະບາດຂອງພະຍາດໂຄວິດ-19 ໃນກໍລະນີຜ່ານການກວດເຫັນວ່າຜູ້ບໍ່ມີຈຸດປະສົງຈຳເປັນແທ້ໆໃຫ້ກັບເຮືອນກັບບ້ານ ໃນກໍລະນີທີ່ມີຄວາມຈຳເປັນຈຶ່ງໃຫ້ຜ່ານເຊັ່ນ: ໄປໂຮງໝໍ ເຈັບເປັນ ໄປຕະຫຼາດຊື້ອາຫານການກິນ ແລະ ໄປປະຈຳການ ແຕ່ຕ້ອງມີໜັງສືຂໍ້ຕົກລົງຈາກກົມກອງ ຫຼື ອຳນາດການປົກຄອງບ້ານຈຶ່ງຈະໃຫ້ໄປ ສ່ວນຜູ້ທີ່ລົງມາກວດ ຖ້າວ່າບໍ່ມີຜ້າອັດປາກ-ອັດດັງ ຄະນະສະເພາະກິດໄດ້ແຈກຢາຍໃຫ້ ນອກນັ້ນແລ້ວ ສູນກາງຊາວໜຸ່ມໄດ້ສົມທົບກັບຊາວໜຸ່ມນະຄອນຫຼວງວຽງຈັນລົງມາຊຸກຍູ້ເປັນຕົ້ນ ເຈວລ້າງມື ຜ້າອັດປາກ-ອັດດັງ ນ້ຳຢາຂ້າເຊື້ອຕ່າງໆມອບໃຫ້ສູນກັກກັນແຮງງານລາວຂອງເມືອງ (ໂຮງຮຽນມັດທະຍົມຕອນປາຍມິດຕະພາບວຽງຈັນ-ໂຮ່ຈີມິງ) ນອກນີ້ຍັງມອບໃຫ້ 4 ບ້ານເປົ້າໝາຍທີ່ຕິດເຊື້ອໂຄວິດ-19 ຄື: ບ້ານໜອງດ້ວງທົ່ງ ໜອງສະໂນຄຳ ຈຳປາ ແລະ ບ້ານຫ້ວຍຫ້ອມ ມູນຄ່າ 15 ລ້ານກີບ ໃນການປະກອບສ່ວນຄັ້ງນີ້ເຫັນວ່າຊາວໜຸ່ມມີຄວາມເອົາໃຈໃສ່ຫ້າວຫັນຕັ້ງໜ້າປະກອບສ່ວນຢ່າງເຕັມທີ່.
ປັດຈຸບັນພັກ ແລະ ລັດຖະບານໄດ້ມີມາດຕະການສືບຕໍ່ຄວບຄຸມການແຜ່ລະບາດເຊື້ອພະຍາດໂຄວິດ-19 ພ້ອມທັງມີນະໂຍບາຍຜ່ອນຜັນໃຫ້ບາງຫົວໜ່ວຍທຸລະກິດເປີດໃຫ້ບໍລິການ ແລະ ປະຊາຊົນສາມາດອອກເຮືອນໄດ້ ແຕ່ຕ້ອງເປັນເຈົ້າການປ້ອງກັນຕົນເອງຢ່າງເຂັ້ມງວດ ສະນັ້ນການຕັ້ງດ່ານຈຶ່ງໄດ້ຢຸດ ແຕ່ກໍຂໍຮຽກຮ້ອງມາຍັງປະຊາຊົນທຸກທົ່ວໜ້າໃຫ້ປະຕິບັດມາດຕະການປ້ອງກັນຕົນເອງຢ່າງເຂັ້ມງວດ ເພື່ອພ້ອມກັນປາສະຈາກເຊື້ອພະຍາດໂຄວິດ-19.
# ຂ່າວ & ພາບ : ຂັນທະວີ