ການກໍ່ສ້າງອຸໂມງກຸລົງຂອງໂຄງການລົດໄຟ ລາວ-ຈີນ ໄດ້ເຈາະທະລຸແລ້ວໃນທ້າຍເດືອນເມສາ ຜ່ານມາ ສຳເລັດກ່ອນແຜນການ 43 ມື້ ພາຍຫຼັງດຳເນີນການກໍ່ສ້າງມາແຕ່ເດືອນມີນາ 2017 ອຸໂມງດັ່ງກ່າວມີຄວາມຍາວ 9.020 ແມັດ ເປັນອຸໂມງທີ່ມີຄວາມຍາວອັນດັບສາມຂອງໂຄງການລົດໄຟລາວ-ຈີນ ຕັ້ງຢູ່ບ້ານກຸລົງ ເມືອງນາໝໍ້ ແຂວງອຸດົມໄຊ.
ທ່ານຜູ້ຮັບຜິດຊອບຂອງບໍລິສັດທາງລົດໄຟລາວ-ຈີນ ລາຍງານໃຫ້ຮູ້ວ່າ: ໃນໄລຍະການແຜ່ລະບາດຂອງເຊື້ອໄວຣັດໂຄວິດ-19 ບໍລິສັດໄດ້ຂະຫຍາຍທີມງານຮັບຜິດຊອບວຽກງານກໍ່ສ້າງ ແລະ ວຽກງານສະ ກັດກັ້ນ ຄວບຄຸມການແຜ່ລະບາດຂອງເຊື້ອພະຍາດພາຍໃຕ້ເງື່ອນໄຂມາດຕະການປ້ອງກັນ ສະກັດກັ້ນ ແລະ ຄວບຄຸມເຊື້ອພະຍາດດັ່ງກ່າວ ຊຶ່ງບໍລິສັດໄດ້ສຸມໃສ່ເຮັດວຽກທັງເວັນທັງຄືນ ເພີ່ມທະວີຄຸນນະພາບຄວາມປອດໄພ ເຮັດໃຫ້ໂຄງການສາມາດດຳເນີນການເປັນປົກກະຕິ ແລະ ສຳເລັດຕາມແຜນການ ມາຮອດວັນທີ 27 ມີນາໂຄງການລົດໄຟ ລາວ-ຈີນ ໄດ້ເລີ່ມດຳເນີນການປູລາງລົດໄຟຢ່າງເປັນທາງການ ແລະ ເສັ້ນທາງລົດໄຟ ຈີນ-ລາວ ຢູ່ເບື້ອງຈີນແມ່ນໄດ້ເລີ່ມດຳເນີນການປູລາງວັນທີ 7 ເມສາ ຊຶ່ງໄດ້ສ້າງພື້ນຖານອັນໜັກແໜ້ນໃຫ້ແກ່ໂຄງການທາງລົດໄຟ ລາວ-ຈີນ ໃຫ້ສາມາດເປີດບໍລິການໄດ້ໃນປີ 2021.
ໂຄງການທາງລົດໄຟ ລາວ-ຈີນ ເປັນເສັ້ນທາງເຊື່ອມຈອດລະຫວ່າງຄຸນໝິງ ສປ ຈີນ ແລະ ນະຄອນຫຼວງວຽງຈັນ ສປປ ລາວ ພາຍຫຼັງການກໍ່ສ້າງສຳເລັດ ຈະເປັນແຮງຊ່ວຍໃນການເພີ່ມທະວີການພົວພັນລະຫວ່າງປະຊາຊົນສອງປະເທດລາວ-ຈີນ ຈີນ-ລາວ ແລະ ມີຄວາມໝາຍຄວາມສຳຄັນຕໍ່ນະໂຍບາຍ “ໜຶ່ງແລວໜຶ່ງເສັ້ນທາງ” ແລະ ຍຸດທະສາດ “ການຫັນປ່ຽນປະເທດທີ່ບໍ່ມີທາງອອກສູ່ທະເລກາຍເປັນປະເທດທີ່ມີທາງເຊື່ອມຈອດ”.
# ຂ່າວ & ພາບ : ໄຊບັນດິດ