ປາກົດການຫຍໍ້ທໍ້ທີ່ເກີດຂຶ້ນໃນສັງຄົມມີຫຼາຍບັນຫາ ແລະ ເກີດຂຶ້ນເປັນປະຈຳ ໃນນັ້ນ ເດັ່ນກວ່າໝູ່ແມ່ນບັນຫາຂີ້ລັກ ທີ່ເກີດຂຶ້ນຢູ່ເຮືອນຂອງປະຊາຊົນທີ່ຢູ່ເຂດນອກ ເຊັ່ນ: ພາຫະນະ ສັດສາວາສິ່ງ ວັດຖຸສິ່ງຂອງທີ່ສາມາດຂາຍໄດ້ ລວມທັງຜົນລະປູກ ເຊິ່ງບັນຫາດັ່ງກ່າວບາງບ່ອນ ບາງບ້ານ ບາງທ້ອງຖິ່ນເກີດຂຶ້ນມາຫຼາຍປີແລ້ວ ແຕ່ຍັງແກ້ໄຂບໍ່ໄດ້ເທື່ອ ສະນັ້ນ ພາກສ່ວນເຈົ້າໜ້າທີ່ໃນຂອບເຂດບ້ານນັ້ນ ຄວນມີມາດຕະການແກ້ໄຂ ແລະ ເອົາຈິງເອົາຈັງຕິດຕາມກວດກາ ເພື່ອນຳເອົາຜູ້ກະທຳຜິດມາສຶກສາອົບຮົມ ຫຼື ດຳເນີນຄະດີຕາມລະບຽບກົດໝາຍ.
ດັ່ງທີ່ພວກເຮົາຮູ້ນຳກັນແລ້ວວ່າ: ໂດຍປະຕິບັດຕາມທິດສາມສ້າງ ຄື: ສ້າງແຂວງເປັນຫົວໜ່ວຍຍຸດທະສາດ ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ຈຶ່ງເຮັດໃຫ້ຫຼາຍບ້ານກາຍເປັນບ້ານແບບຢ່າງ ບ້ານປອດຄະດີ ແຕ່ຄວາມເປັນຈິງແລ້ວເໝາະສົມແລ້ວບໍ່ ຖ້າວ່າຢູ່ພາຍໃນບ້ານນັ້ນ ຍັງມີລູກຫຼານຕິດຢາບ້າ ຂາຍຢາເສບຕິດ ຫຼິ້ນການພະນັນ ກາຍເປັນຄົນຂີ້ລັກງັດແງະ ແລະ ບັນຫານິ້ຍັງຫາວິທີແກ້ໄຂບໍ່ໄດ້ດີເທົ່າທີ່ຄວນ ແຕ່ກົງກັນຂ້າມກໍມີຫຼາຍບ້ານທີ່ສາມາດຈັດຕັ້ງປະຕິບັດໄດ້ດີ ຈົນກາຍເປັນບ້ານປອດຄະດີ 100% ບໍ່ມີຜູ້ຂີ້ລັກງັດແງະ ຈະເປັນແບບຢ່າງທີ່ດີໃຫ້ຫຼາຍບ້ານນຳເອົາໄປເປັນບົດຮຽນ ບັນຫາຂີ້ລັກ ຫຼື ເອົາສິ່ງຂອງທີ່ສາມາດຂາຍໄດ້ ລັກໄດ້ມັນກໍຈະໄປລັກ ເຊັ່ນ: ເຫຼັກ ໝູ ໝາ ເປັດ ໄກ່ ລົດຈັກ ລົດໃຫຍ່ ແລະ ອື່ນໆ.
ບັນຫາດັ່ງກ່າວນີ້ ບາງບ້ານ-ເຮືອນເຄີຍເກີດຊ້ຳແລ້ວ ຊ້ຳອີກ ກໍມີບາງເຮືອນເຖິງວ່າຕິດຕັ້ງກ້ອງວົງຈອນປິດໃສ່ ແຕ່ກໍເຮັດຫຍັງບໍ່ໄດ້ ທັງໆທີ່ຮູ້ວ່າແມ່ນຄົນບ້ານໃກ້ເຮືອນຄຽງມາລັກເອົາໄປ ເຮັດໃຫ້ເກີດບັນຫາລັກແລ້ວ ລັກອີກ ແລະ ມີບາງຄອບຄົວ ໃນເມື່ອລູກຫຼານຂອງຕົນກະທຳຜິດ ຜູ້ປົກຄອງ ຫຼື ພໍ່ແມ່ບໍ່ຍອມຮັບຜິດ ບໍ່ຮັບຜິດຊອບ ປົກປ້ອງວ່າລູກຫຼານຂອງຕົນເປັນຄົນດີ ບໍ່ເຄີຍໄປລັກຂອງໃຜ ເຫດການແບບນີ້ອຳນາດການປົກຄອງບ້ານ ແລະ ໜ່ວຍງານປ້ອງກັນບ້ານນັ້ນຄວນກວດກາຄືນຄວາມເປັນຈິງ ແລະ ແນະນຳຊ່ວຍແກ້ໄຂຕໍ່ກຸ່ມຄົນດັ່ງກ່າວ ຖ້າເວົ້າເຖິງການຂີ້ລັກງັດແງະແມ່ນເກີດມາຈາກຫຼາຍປັດໄຈ ໃນນັ້ນ ກໍມີສ່ວນຍ້ອນຕິດຢາບ້າ ຫຼິ້ນກິນຟຸມເຟືອຍ ຕິດການພະນັນ ແລະ ບໍ່ມີວຽກເຮັດງານທຳ ແລະ ອື່ນໆ.
ສັງລວມແລ້ວເປັນການກະທຳຜິດທາງອາຍາ ທີ່ໄດ້ກຳນົດໄວ້ໃນປະມວນກົດໝາຍອາຍາມາດຕາ 231 ການລັກຊັບ: ບຸກຄົນໃດຫາກໄດ້ເອົາຊັບຂອງຜູ້ອື່ນມາເປັນຂອງຕົນ ໂດຍບໍ່ຖືກຕ້ອງ ຈະຖືກລົງໂທດຕັດອິດສະລະພາບແຕ່ ສາມເດືອນຫາສາມປີ ຫຼື ດັດສ້າງໂດຍບໍ່ຕັດອິດສະຫຼະພາບ ແລະ ຈະຖືກປັບໃໝແຕ່ 1 ລ້ານກີບຫາ 5 ລ້ານກີບ ໃນກໍລະນີຜູ້ກະທຳຜິດຫາກໄດ້ລັກດ້ວຍການງັດແງະ ມ້າງເພຮົ້ວຮາວ ປະຕູ ຫີບ ຕູ້ ແລະ ອື່ນໆ ຈະຖືກລົງໂທດຕັດອິດສະລະພາບ ແຕ່ຫົກເດືອນຫາຫ້າປີ ແລະ ຈະຖືກປັບໄໝແຕ່ 3 ລ້ານກີບ ຫາ 10 ລ້ານກີບ ໃນກໍລະນີທີ່ຜູ້ກະທຳຜິດຫາກໄດ້ການລັກເປັນອາຈີນ ຈັດຕັ້ງເປັນກຸ່ມ ຫຼື ໃນກໍລະນີກໍ່ຄວາມເສຍຫາຍຢ່າງຫຼວງຫຼາຍ ຈະຖືກລົງໂທດຕັດອິດສະຫຼະພາບແຕ່ 3 ປີຫາ 8 ປີ ແລະຈະຖືກປັບໄໝແຕ່ 5 ລ້ານກີບຫາ 15 ລ້ານກີບ.
ເພື່ອເຮັດໃຫ້ບັນຫາການລັກຊັບຫຼຸດໜ້ອຍຖອຍລົງ ແລະ ເພື່ອເປັນການປ້ອງກັນຂອງພວກເຮົາ ກ່ອນອື່ນພວກເຮົາຕ້ອງເປັນເຈົ້າການມີສະຕິຮັກສາຊັບສິນ ວັດຖຸສິ່ງຂອງມ້ຽນມັດໄວ້ໃຫ້ດີ ເກັບໄວ້ບ່ອນທີ່ປອດໄພ ປ້ອງກັນບໍ່ໃຫ້ກາຍເປັນເປົ້າໝາຍຂອງຄົນຂີ້ລັກ ແລະ ສິ່ງສຳຄັນພາກສ່ວນທີ່ກ່ຽວຂ້ອງຂອງບ້ານ ຕ້ອງເອົາໃຈໃສ່ຕິດຕາມກວດກາເວນຍາມໃຫ້ເຂັ້ມງວດຕື່ມ ເພື່ອນຳເອົາຜູ້ກະທຳຜິດມາສຶກສາອົບຮົມ ຫຼືມອບໃຫ້ເຈົ້າໜ້າທີ່ດຳເນີນຄະດີຕາມລະບຽບກົດໝາຍ.