ນັກວິທະຍາສາດຊາວອູແກຣນ ສະແດງຜົນງານການປະດິດຖ່ານສາກ (ແບດເຕີຣີ) ຮຸ່ນພິເສດ ເຊິ່ງອ້າງຄຸນສົມບັດໃຊ້ໄດ້ດົນນານເຖິງ 12 ປີ ແຕ່ຂະໜາດນ້ອຍ ເທົ່າກັບໄມ້ຂີດໄຟ.
ເປັນທີ່ຮູ້ກັນດີວ່າແບດເຕີຣີຕ່າງໆທີ່ເຮົາເຄີຍຮູ້ຈັກ ແລະ ໃຊ້ກັນເປັນປະຈຳຢູ່ທຸກວັນນັ້ນ ຍ່ອມມີອາຍຸການໃຊ້ງານຂອງມັນ ເຊິ່ງຈະຍາວ ຫຼື ສັ້ນນັ້ນ ກໍຂຶ້ນຢູ່ກັບປະເພດ ແລະ ການໃຊ້ງານຕາມແຕ່ລະຮູບແບບ ແຕ່ໃຜຈະໄປຄາດຄິດວ່າຈະມີແບດເຕີຣີທີ່ມີອາຍຸການໃຊ້ງານຫຼາຍເປັນສິບໆປີ ຊະນິດທີ່ວ່າສາມາດໃຊ້ງານໄດ້ດົນນານຈົນລືມວ່າຈະຕ້ອງສາກໄຟໄປເລີຍ.
ເວັບໄຊ Oddity Central ໄດ້ເປີດເຜີຍເລື່ອງນະວັດຕະກຳສຸດຍອດຂອງນັກວິທະຍາສາດຊາວອູແກຣນ ນາມວ່າ ວະລາດິສລາຟ ຄິເຊເລຟ (Vladislav Kiselev) ໂດຍເຂົາໄດ້ຄິດຄົ້ນປະດິດແບດເຕິຣີຊະນິດໜຶ່ງຂຶ້ນມາ ຊຶ່ງມີຄຸນສົມບັດສາມາດໃຫ້ພະລັງງານກັບອຸປະກອນຕ່າງໆ ເຊັ່ນ: ໂທລະສັບມືຖື ຫຼື ລວມເຖິງແບດເຕີຣີລົດໃຫຍ່ ໄດ້ນານເຖິງ 12 ປີ ໂດຍບໍ່ຕ້ອງສາກໄຟຊ້ຳ.
ທ່ານ ວະລາດິສລາຟ ນັກວິໄຈອາວຸໂສຂອງສະຖາບັນເຄມີອິນຊີເຊິງຊີວະພາບ ແລະ ປິໂຕຣເຄມີ ໃນເມືອງກີແອັບ ແລະ ສາສະດາຈານ ປະຈຳສະຖາບັນສຶກສາວິທະຍາສາດແຫ່ງຊາດອູແກຣນ ໄດ້ເປີດຕົວສິ່ງປະດິດຕົ້ນແບບຊິ້ນນີ້ ໃນການແຂ່ງຂັນໂຄງການວິໄຈລະດັບນານາຊາດ (Sikorsky Challenge 2016) ໂດຍຈະເຫັນວ່າ ມັນມີຂະໜາດນ້ອຍພຽງເທົ່າກັບໄມ້ຂີດໄຟ ເຖິງແມ່ນລັກສະນະພາຍນອກນັ້ນ ເບິ່ງແລ້ວບໍ່ໜ້າສົນໃຈຫຼາຍພໍເທົ່າໃດ ເນື່ອງຈາກເບິ່ງເໝືອນເປັນການຕໍ່ວົງຈອນໄຟຟ້າແບບທົ່ວໆໄປ ແຕ່ທ່ານ ວະລາດິສລາຟ ເປີດ ເຜີຍວ່າ ແບດເຕີຣີປະດິດຊິ້ນນີ້ສາມາດຈ່າຍພະລັງງານໃຫ້ກັບອຸປະກອນໄຟຟ້າໄດ້ຢ່າງຕໍ່ເນື່ອງດົນນານເຖິງ 1 ປີ 4 ເດືອນ ແລະ ຈະເຮັດເຊັ່ນນີ້ໄດ້ເລື້ອຍໆໄປອີກ 11 ປີ ລວມທັງສິ້ນກວ່າ 12 ປີ ໂດຍບໍ່ຕ້ອງມີການສາກໄຟຊ້ຳນັ້ນ ກໍເປັນເພາະແບດເຕີຣີຂອງເຂົາບໍ່ ໄດ້ໃຊ້ວິທີກັກເກັບພະລັງງານແບບແບດເຕີຣີທົ່ວໆໄປ ແຕ່ໃຊ້ວິທີຜະລິດພະລັງງານແທນ.
ເຖິງແມ່ນໃນຄວາມເປັນຈິງແລ້ວ ຜູ້ຜະລິດ ແລະ ນັກວິໄຈແບດເຕີຣີທົ່ວໂລກພະຍາຍາມແຂ່ງຂັນສຶກສາ ແລະ ພັດທະນາແບດເຕີຣີຢ່າງຫຼວງຫຼາຍ ແຕ່ກໍບໍ່ສາມາດສ້າງແບດເຕີຣີທີ່ມີອາຍຸການໃຊ້ງານໄດ້ເຖິງ 12 ປີເຊັ່ນນີ້ໄດ້ ແຕ່ທ່ານ ວະລາດິສລາຟ ໄດ້ອ້າງວ່າ ເຂົາໃຊ້ປະໂຫຍດຈາກຄຸນສົມບັດຫຼັກຂອງທຣິທຽມ (tritium) ທີ່ສາມາດປ່ອຍເອເລັກຕຣອນ ເຊັ່ນດຽວກັບບໍລິສັດ City Labs ໃນສະຫະລັດອາເມຣິກາ ແຕ່ຕ່າງກັນບ່ອນທີ່ບໍລິສັດນັ້ນໃຊ້ ທຣິທຽມ ຮ່ວມກັບພະລັງງານແສງຕາເວັນ ແຕ່ທ່ານ ວະລາດິສລາຟ ໃຊ້ວິທີເພີ່ມເຊລໄຟຟ້າເຄມີ ເຮັດໃຫ້ແບດເຕີຣີມີພະລັງງານຫຼາຍກວ່າ 1,000 ເທົ່າ ເຊິ່ງແບດເຕີຣີຂອງບໍລິສັດນັ້ນ ຖືກນຳໄປໃຊ້ກັບອຸປະກອນທາງການແພດ ແລະ ອຸປະກອນເຊັນເຊີຕ່າງໆ ສ່ວນແບດເຕີຣີປະດິດຂອງທ່ານ ວະລາດິສລາຟ ນີ້ ສາມາດນຳໄປໃຊ້ກັບອຸປະກອນເອເລັກໂຕຣນິກ ຫຼື ທັງລົດໃຫຍ່ກໍໄດ້.
ທັງນີ້ ຫຼັງຈາກເປິດຕົວຕົ້ນແບບແບດເຕີຣີປະດິດທີ່ງານດັ່ງກ່າວ ທ່ານ ວະລາດິສລາຟ ເປີດເຜີຍວ່າ ມີນັກທຸລະກິດຈາກຕວັກກີ ແລະ ຈີນ ໃຫ້ຄວາມສົນໃຈມາຕິດຕໍ່ຂໍເປັນຜູ້ຜະລິດແບດເຕີຣີຂອງເຂົາ ທີ່ສາມາດໃຊ້ງານກັບໂທລະສັບມືຖື.