ບົດຮຽນດີໆທີ່ເລືອກມາໃຫ້ອ່ານໃນບົດນີ້ ລວມມີມາດຕະການປ້ອງກັນຜູ້ໂດຍສານເພດຍິງ ຈາກການຖືກລວນລາມທາງເພດຢູ່ອິນໂດເນເຊຍ ແລະ ໂຄງການພາຄົນຂີ້ເມົາກັບໃຫ້ເຖິງເຮືອນຢູ່ຫວຽດນາມ.
ທີ່ ອິນໂດເນເຊຍ: ບັນຫາການລວນລາມທາງເພດຕໍ່ເພດຍິງ ໃນເວລາໃຊ້ລົດໂດຍສານສາທາລະນະ ໃນປະເທດອິນໂດເນເຊຍ ໄດ້ກາຍເປັນເລື່ອງກັງວົນໃຈສຳລັບກຸ່ມປົກປ້ອງສິດທິຂອງແມ່ຍິງ ດັ່ງນັ້ນ ຈຶ່ງເກີດມີກະແສຮຽກຮ້ອງໃຫ້ມີວິທີແກ້ໄຂປາກົດການຫຍໍ້ທໍ້ດັ່ງກ່າວ
ຂ່າວໜັງສືພິມ The Nation (ເດິ ເນເຊິນ) ສະບັບວັນທີ 23 ເດືອນເມສາ ປີ 2018 ໃຫ້ຮູ້ວ່າ: ບໍລິສັດໂດຍສານລົດໄຟຟ້າ (KCI) ໄດ້ເຮັດການປຸກລະດົມໃຫ້ຜູ້ຮ່ວມໂດຍສານທຸກຄົນ ຮີບຮ້ອນລາຍງານໃຫ້ທາງບໍລິສັດຮູ້ ເມື່ອເວລາພົບເຫັນກໍລະນີລວນລາມທາງເພດຢູ່ໃນລົດ.
ທ່ານນາງ ອີວາ ໄຈຣຸນນິສາ (Eva Chairunnisa) ໂຄສົກຂອງ KCI ໄດ້ແຈ້ງໃຫ້ຊາບວ່າ: ໃນໝົດປີ 2017 ນັ້ນ ທາງ KCI ໄດ້ຮັບລາຍງານກ່ຽວກັບການລວນລາມທາງເພດພາຍໃນລົດ ຈຳນວນ 11 ຄັ້ງ ແລະ 3 ຄັ້ງໃນໄຕມາດຕົ້ນປີ 2018 ທ່ານນາງ ອີວາ ໄດ້ໃຫ້ທັດສະນະວ່າ: ຜູ້ທີ່ຕົກເປັນເຫຍື່ອຂອງການລວນລາມນັ້ນ ບໍ່ຄ່ອຍຢາກລາຍງານໃຫ້ເຈົ້າໜ້າທີ່ຕຳຫຼວດຊາບ ຍ້ອນເຫດຜົນສ່ວນຕົວ ແລະ ດ້ວຍເຫດນີ້ເອງທາງ KCI ຈຶ່ງຮຽກຮ້ອງ ແລະ ຊຸກຍູ້ໃຫ້ຜູ້ໂດຍສານທຸກຄົນທີ່ເຫັນເຫດການ ຮີບຮ້ອນລາຍງານໃຫ້ພະນັກງານຮັກສາຄວາມປອດໄພພາຍໃນລົດ ແລະ ເຂົ້າຫ້າມປາມຜູ້ກະທຳຜິດໂດຍທັນທີ ທາງ KCI ເຊື່ອວ່າ ຖ້າຜູ້ຮ່ວມໂດຍສານທຸກຄົນໃນລົດ ໃຫ້ຄວາມຊ່ວຍເຫຼືອຜູ້ຖືກລວນລາມ ແນ່ນອນຜູ້ຕົກເປັນເຫຍື່ອກໍຈະມີຄວາມກ້າຫານພໍ ທີ່ຈະລາຍງານໃຫ້ເຈົ້າໜ້າທີ່ຕຳຫຼວດຊາບກ່ຽວກັບເຫດການທີ່ເກີດຂຶ້ນກັບຕົນ ການລວນລາມທາງເພດທີ່ເກີດຂຶ້ນກັບແມ່ຍິງນັ້ນ ມັກມາໃນຮູບສວຍໂອກາດແຕະຕ້ອງບ່ອນສະຫງວນຂອງຮ່າງກາຍຂອງເຫຍື່ອ ໂດຍພວກເປັນພະຍາດມືໄວໃຈກ້າໜ້າດ້ານສັນດານບໍ່ດີທັງຫຼາຍ.
ທີ່ ຫວຽດນາມ: ບັນຫາເມົາ ແລະ ຂັບນັ້ນມີຄວາມສ່ຽງທີ່ສຸດ ທີ່ຈະກໍ່ໃຫ້ເກີດອຸບັດເຫດຕາມຖະໜົນ ເຊິ່ງທຸກໆປະເທດຕ່າງກໍຊອກວິທີແກ້ໄຂ ສຳລັບຢູ່ຫວຽດນາມນັ້ນ ກໍມີຂ່າວທີ່ຄວນຖອດໄວ້ເປັນບົດຮຽນ ເພາະມັນເປັນອີກທາງເລືອກໜຶ່ງ ເພື່ອຫຼຸດອຸບັດເຫດທີ່ເກີດຈາກເມົາແລ້ວຂັບ.
ຂ່າວຕ່າງປະເທດໃນຕົ້ນເດືອນກຸມພາ 2015 ໃຫ້ຮູ້ວ່າ: ທາງການຂອງປະເທດນີ້ໄດ້ເປີດໂຄງການໃໝ່ ເພື່ອແກ້ໄຂບັນຫາຄົນຂັບລົດພາຍໃນອິດທິພົນຂອງນ້ຳຕາຜີເຜດ ໂດຍທາງໂຄງການໄດ້ຂໍຮ້ອງໃຫ້ບັນດາຮ້ານອາຫານ ຮ້ານບາ ເຄື່ອງດື່ມ ແລະ ຮ້ານບັນເທີງຮັບຜິດຊອບພາລູກຄ້າທີ່ມີອາການມຶນເມົາກັບຮອດເຮືອນ ຂ່າວບອກວ່າ: ໂຄງການນີ້ແມ່ນຜົນງານການຮ່ວມມືລະຫວ່າງ ກຳມະການຄວາມປອດໄພດ້ານການຈະລາຈອນແຫ່ງຊາດ ແລະ ສະມາຄົມເບຍ-ເຫຼົ້າ ແລະ ເຄື່ອງດື່ມຫວຽດນາມ.
ການປະຕິບັດງານຂັ້ນທົດລອງເບື້ອງຕົ້ນນັ້ນ ເລີ່ມຂຶ້ນຢູ່ນະຄອນຫຼວງຮາໂນ້ຍ ນະຄອນໂຮ່ຈີມິງ ແລະ ນະຄອນດານັງ ຈາກນັ້ນ ຈຶ່ງຂະຫຍາຍໄປທົ່ວປະເທດ ໜຶ່ງໃນບັນດາຮ້ານອາຫານທີ່ເຂົ້າຮ່ວມໂຄງການນີ້ ກໍແມ່ນຮ້ານອາຫານຈາງອັນ ຕັ້ງຢູ່ແຄມທາງສ່ວນໜຶ່ງຂອງນະຄອນຫຼວງຮ່າໂນ້ຍ ທາງຮ້ານໄດ້ຈັດການເຝິກອົບຮົມພະນັກງານຮ້ານ ກ່ຽວກັບວິທີຈັດສົ່ງຄົນເມົາໃຫ້ເຖິງເຮືອນດ້ວຍຄວາມປອດໄພ ໂດຍເລີ່ມຈາກທັກສະໃນການເຈລະຈາຊັກຊວນໃຫ້ຄົນເມົາຍອມໃຫ້ເມືອສົ່ງ ເພາະຕາມສັນດານຄົນເມົາແລ້ວ ຍິ່ງເມົາແຮ່ງຍິ່ງໂອຫັງ ບັງອາດວ່າຕົນເກ່ງກ້າສາມາດກັບຄືນເຮືອນເອງໄດ້ ຢູ່ລາວພວກເຮົາຖ້າມີໂຄງການແບບນີ້ຄົງຈະດີບໍ່ແມ່ນຂອງຢອກ.