ຕະຫຼອດໄລຍະຜ່ານມາການນຳກະຊວງສຶກສາທິການ ແລະ ກີລາໄດ້ເອົາໃຈໃສ່ພັດທະນາຂະແໜງການຕ່າງໆ ໃນນີ້ວຽກງານອາຊີວະສຶກສາ ແລະ ເຝິກອົບຮົມວິຊາຊີບກໍ່ໄດ້ຮັບການພັດທະນາ ແລະ ມີຜົນສຳເລັດຫຼາຍດ້ານເຊັ່ນ ສຳເລັດການປະກອບອຸປະກອນເຕັກນິກໃຫ້ແກ່ 8 ວິທະຍາໄລ ໃນ 16 ສາຂາວິຊາ ພາຍໃຕ້ໂຄງການສ້າງຄວາມເຂັ້ມແຂງອາຊີວະສຶກສາ ແລະ ເຝິກອົບຮົມວິຊາຊີບ ປະກອບອຸປະກອນເຕັກນິກໃຫ້ແກ່ໂຮງຮຽນເຕັກນິກວິຊາຊີບແຂວງບໍ່ແກ້ວ ບໍລິຄຳໄຊ ແລະ ສະຖາບັນພັດທະນາອາຊີວະສຶກສາໃນ 9 ສາຂາວິຊາຮຽນມູນຄ່າ 1.380.000 ເອີໂຣ ຫຼື ປະມານ 13,38 ຕື້ກີບ ພາຍໃຕ້ໂຄງການຮ່ວມມືລາວ-ເຢຍລະມັນ ຈັດຊື້ອຸປະກອນເຕັກນິກ ແລະ ສາຂາສ້ອມແປງລົດ ຈອດໂລຫະ ໄຟຟ້າຄວບຄຸມ ໄຟຟ້າແສງຕາເວັນໃຫ້ແກ່ 4 ສະຖານອາຊີວະສຶກສາ ພາຍໃຕ້ໂຄງການຣາດຊະບູລີ ສ້າງສື່ ແລະ ພິມປື້ມຄູ່ມືການສອນໄຟຟ້າແສງຕາເວັນຈຳນວນ 1.200 ຊຸດ ເຄື່ອງຈຳລອງພາກປະຕິບັດ 4 ຊຸດ ສ້າງ ແລະ ປັບປຸງຄູ່ມື ເຄື່ອງມື ທົດລອງນຳໃຊ້ເກັບກຳຂໍ້ມູນນັກສຶກສາຮຽນຈົບຈາກສະຖານອາຊີວະສຶກສາພາກລັດ 24 ແຫ່ງ ປັບປຸງກົດໝາຍວ່າດ້ວຍອາຊີວະສຶກສາ.
ເພື່ອເຮັດໃຫ້ວຽກງານອາຊີວະສຶກສາ ແລະ ເຝິກອົບຮົມວິຊາຊີບນັບມື້ເຕີບໃຫຍ່ເຂັ້ມແຂງທັງປະລິມານ ແລະ ຄຸນນະພາບ ສະນັ້ນຈຶ່ງໄດ້ວາງບູລິມະສິດຕົ້ນຕໍຄື ຊຸກຍູ້ການຈັດຕັ້ງປະຕິບັດການຮຽນການສອນຮູບແບບຕ່າງໆ ໃນສະຖານອາຊີວະສຶກສາ ປັບປຸງມາດຕະຖານອາຊີບ ແລະ ຫຼັກສູດໃໝ່ຕາມຄວາມຕ້ອງການຂອງຕະຫຼາດແຮງງານ ໃຫ້ໄດ້ຈຳນວນ 15 ມາດຖານ ສ້າງ ແລະ ພັດທະນາຄູ່ມື ເອກະສານການຮຽນໃຫ້ໄດ້ 28 ວິຊາ ພັດທະນາ ຄົ້ນຄວ້າຄູ່ມືການປະເມີນຫຼັກສູດອາຊີວະສຶກສາ ຮ່ວມມືກັບວິທະຍາໄລເຕັກນິກ-ວິຊາຊີບຂອງ ສປ ຈີນ ເພື່ອສ້າງຫຼັກສູດລະບົບ 2+1 ກ່ຽວກັບເຕັກນິກການລົດໄຟໃຫ້ໄດ້ 2 ຫຼັກສູດ ສ້າງພັດທະນາຫຼັກສູດພາສາອັງກິດທຸລະກິດ ການຕະຫຼາດອອນລາຍ ການສ້າງເວັບໄຊ ການສ້າງຮູບແບບທຸລະກິດຂອງສູນພັດທະນາຜູ້ປະກອບກິດຈະການລາວ-ອິນເດຍ ສ້າງຫຼັກສູດໄລຍະສັ້ນລາຍວິຊາ ການປະກອບກິດຈະການເພື່ອນຳໄປສອນໃນສະຖາບັນການສຶກສາລະດັບຕ່າງໆ ສືບຕໍ່ສ້າງຄູອາຊີວະສຶກສາດ້ານເຕັກນິກການລົດໄຟທີ່ສົ່ງໄປຮຽນຢູ່ ສປ ຈີນ ເພື່ອມາເປັນຄູສອນໃຫ້ແກ່ວິທະຍາໄລເຕັກນິກການລົດໄຟມິດຕະພາບລາວ-ຈີນ ຈຳນວນ 10 ຄົນ ປັບປຸງລະບົບຖານຂໍ້ມູນອາຊີວະສືກສາ ແລະ ເຝິກອົບຮົມວິຊາຊີບ ພັດທະນາເນື້ອໃນເວັບໄຊອາຊີວະສຶກສາສ້າງຝັນ ລະບົບລົງທະບຽນອອນລາຍ ເພື່ອເຊື່ອມໂຍງກັບລະບົບຖານຂໍ້ມູນອາຊີວະສຶກສາ ແລະ ເຝິກອົບຮົມວິຊາຊີບ ຮ່ວມມືກັບພາກເອກະຊົນ ໃນການປັບປຸງໂຄງລ່າງອິນເຕີເນັດຂອງສະຖານອາຊີວະສຶກສາ ສ້າງຄວາມເຂັ້ມແຂງໃຫ້ແກ່ສະຖານອາຊີວະສຶກສາ ກ່ຽວກັບການພັດທະນາເວັບໄຊ ສ້າງຄູ່ມືເພື່ອແນະນຳໃຫ້ຄຳປຶກສາດ້ານອາຊີບ ການຊອກວຽກເຮັດງານທຳ ຕິດຕາມອະດີດນັກສຶກສາອາຊີວະສຶກສາໃນ 3 ສົກຮຽນຜ່ານມາ ສືບຕໍ່ປະສານງານກັບ 8 ວິທະຍາໄລດຳເນີນການສຳຫຼວດຄວາມຕ້ອງການແຮງງານຂອງຜູ້ປະກອບການ ປັບປຸງກົງຈັກການຈັດຕັ້ງ ແລະ ບຸກຄະລາກອນຫ້ອງການສະພາທີ່ປຶກສາອາຊີວະສຶກສາ ໜ່ວຍງານກຸ່ມອາຊີບ ສ້າງຄວາມເຂັ້ມແຂງໃຫ້ແກ່ສະພາທີ່ປຶກສາອາຊີວະສຶກສາຂັ້ນແຂວງ ແລະ ອື່ນໆ.