ອີງຕາມຂໍ້ມູນຈາກສະຫະພັນບານເຕະແຫ່ງຊາດລາວ ແຈ້ງໃຫ້ຊາບວ່າ: ດັ່ງທີ່ຮູ້ກັນແລ້ວວ່ານັບແຕ່ໄລຍະຕົ້ນປີຈົນຮອດປັດຈຸບັນຢູ່ໃນໄລຍະຢຸດພັກການແຂ່ງຂັນລາຍການຕ່າງໆຊົ່ວຄາວ ເນື່ອງຈາກໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19 ໂດຍສະເພາະລາຍການເປບຊີລາວລີກ 1 ລະດູການ 2020 ກໍຕ້ອງເລື່ອນວັນເປີດການແຂ່ງຂັນ ເຊິ່ງຕາມກຳນົດເວລາເດີມແມ່ນວັນທີ 25 ເມສາ 2020 ອອກໄປຈົນກວ່າສະພາບການລະບາດຂອງພະຍາດໂຄວິດ-19 ຈະສາມາດຄວບຄຸມ ແລະ ສະພາບການກັບສູ່ພາວະປົກກະຕິ.
ຢ່າງໃດກໍຕາມເຖິງຍັງຫາວັນເວລາເປີດການແຂ່ງຂັນທາງການບໍ່ໄດ້ ເມື່ອບໍ່ດົນມານີ້ສະຫະພັນບານເຕະແຫ່ງຊາດລາວໄດ້ປະກາດປ່ຽນຊື່ລາຍການແຂ່ງຂັນຈາກລາຍການເດີມ ລາຍການເປບຊີລາວພຣີເມຍລີກ ປ່ຽນມາເປັນລາຍການເປບຊີລາວລີກ 1 ໃນລະດູການ 2020 ນອກນັ້ນຍັງປ່ຽນຊື່ ລາຍການເຕະບານຄອນມານໂດ ສາຍ ກ ມາເປັນ ຄອນມານໂດລາວລີກ 2 ນຳອີກດ້ວຍ.
ສຳລັບການແຂ່ງຂັນເປບຊີລາວພຣີເມຍລີກ 2019 ມີ 6 ທີມເຂົ້າຮ່ວມແຂ່ງຂັນ ໂດຍແຂ່ງຂັນ 3 ຮອບສ່ວນເປບຊີລາວລີກ 1 ປັດຈຸບັນມີ 7 ສະໂມສອນ ແຈ້ງເຈດຈຳນົງເຂົ້າຮ່ວມຊີງໄຊເປັນທີ່ຮຽບຮ້ອຍແລ້ວ ປະກອບມີ: ສະໂມສອນ ລາວໂຕໂຢຕ້າ ເອັຟຊີ ດີກຣີແຊັມ 4 ສະໄໝມາດເຕີ 7 ເອັຟຊີຊ້າງນ້ອຍ ເອັຟຊີປກສ ເອັຟຊີວຽງຈັນ ເອັຟຊີ (ຈາກແຂວງວຽງຈັນ) ວຽງຈັນ ເອັຟທີ ແລະ ເອສຣາ ເອັຟຊີ ສ່ວນຮູບແບບການແຂ່ງຂັນແມ່ນຈະນຳໃຊ້ລະບົບຂອງປີຜ່ານມາ ໂດຍແຂ່ງຂັນແບບພົບກັນໝົດ 3 ຮອບ.