ຕາມຂໍ້ມູນຈາກ Vietnam News Agency ໃນວັນທີ 5 ພຶດສະພາ ເຫັນວ່າ ທ່ານ ຫງວຽນ ຊວນ ຟຸກ (Nguyen Xuan Phuc) ນາຍົກລັດຖະມົນຕີແຫ່ງ ສສ ຫວຽດນາມ ກ່າວໃນກອງປະຊຸມຄະນະລັດຖະບານຫວຽດ ນາມ ທີ່ຈັດຂຶ້ນໃນນະຄອນຫຼວງຮ່າໂນຍ ໃນວັນທີ 5 ພຶດສະ ພາ ວ່າ: ການສຸມໃສ່ບັນດາກິດຈະກຳໃນການຟື້ນຟູ ແລະ ການພັດທະນາເສດຖະກິດ-ສັງຄົມ ຫຼັງຈາກມີການລະບາດຂອງ COVID-19 ເປັນບັນຫາທີ່ສຳຄັນຂອງປະເທດຊາດ ກໍຄື ປະຊາຊົນຫວຽດນາມ.
ທ່ານໄດ້ເນັ້ນເຖິງສະພາບເສດຖະກິດໂລກທີ່ຕິດລົບນັບແຕ່ເດືອນມັງກອນ-ເມສາ 2020 ເຊິ່ງເປັນໄລຍະຂອງການລະບາດຂອງພະຍາດດັ່ງກ່າວ ເຊິ່ງໃນໄລຍະດັ່ງກ່າວ ລັດຖະບານຫວຽດນາມ ໃຫ້ຄວາມສຳຄັນໃນການປະຕິບັດງານສອງດ້ານ ກໍຄື ເອົາໃຈໃສ່ຕໍ່ສຸຂະພາບຂອງໄປຊາຊົນ ໄປພ້ອມກັນການພັດທະນາດ້ານເສດຖະກິດ ເຊິ່ງລັດຖະບານໄດ້ອອກຄຳສັ່ງຫຼາຍສະບັບໃນການແກ້ໄຂບັນຫາໃຫ້ກັບຜູ້ປະກອບການ ເພື່ອສ້າງຄວາມໝັ້ນໃຈກ່ຽວກັບນະໂຍບາຍທາງດ້ານສະຫວັດດີການ ລະບຽບການທາງດ້ານສັງຄົມ ແລະ ຄວາມປອດໄພ ດ້ວຍສາເຫດດັ່ງກ່າວ ເຮັດໃຫ້ເສດຖະກິດມີການຂະຫຍາຍ ຕົວປີຕໍ່ປີຢູ່ໃນລະດັບ 3,82%.
ທ່ານ ຫງວຽນ ຊວນ ຟຸກ ກ່າວຕື່ມວ່າ: ກອງທຶນການເງິນສາກົນ ຫຼື IMF ໄດ້ປະເມີນເສດຖະກິດຂອງວຽກນາມຈະເຕີບໃຫຍ່ຂະຫຍາຍຕົວກວ່າບັນດາປະເທດໃນພາກພື້ນອາຊຽນໃນປີນີ້ ຄາດວ່າຈະຢູ່ໃນລະດັບ 2,7% ຢ່າງໃດກໍຕາມພວກເຮົາຍັງໄດ້ຕັ້ງເປົ້າໝາຍການເຕີບໃຫຍ່ໃນລະດັບສູງ ເນື່ອງຈາກວ່າພາກທຸລະກິດໄດ້ກັບຄືນມາດຳເນີນກິດຈະ ການ ໄປພ້ອມໆກັບການປະຕິບັດມາດຕະການຕ່າງໆຢ່າງເຂັ້ມງວດ.
ພ້ອມນັ້ນທ່ານຍັງໄດ້ຮຽກຮ້ອງໃຫ້ຄະນະລັດຖະບານ ເຮັດໃຫ້ບັນລຸຕາມເປົ້າໝາຍທີ່ວາງໄວ້ ເພາະມັນມີຄວາມຈຳເປັນທີ່ຈະເຮັດໃຫ້ອັດຕາເງິນເຟີ້ຫຼຸດລົງຕ່ຳກວ່າ 4% ໃນຂະ ນະທີ່ການພັດທະນາທຸລະກິດ ແລະ ການສົ່ງເສີມການກໍ່ສ້າງດ້ານພື້ນຖານໂຄງລ່າງ ໂດຍສະເພາະແມ່ນບັນດາໂຄງການພັດທະນາພື້ນຖານໂຄງລ່າງດ້ານຄົມມະນາຄົມຂົນສົ່ງ ຕ້ອງໄດ້ມີການປັບປ່ຽນຈາກການຖືຫຸ້ນລະຫວ່າງພາກລັດ ແລະ ທຸລະກິດ ມາເປັນການລົງທຶນຂອງລັດ.