ກະຊວງເຕັກໂນໂລຊີ ແລະ ການສື່ສານ (ຕສ) ສະເໜີປັບປຸງບາງເນື້ອໃນຂອງກົດໝາຍວ່າດ້ວຍ ໂທລະຄົມມະນາຄົມ ຈຳນວນ 46 ມາດຕາ ເພີ່ມໃໝ່ 12 ມາດຕາ ແລະ ຮັກສາເນື້ອໃນໄວ້ 4 ມາດຕາ ເພື່ອຄຸ້ມຄອງວຽກງານໂທລະຄົມມະນາຄົມໃຫ້ມີປະສິດທິຜົນກວ່າເກົ່າ ແລະ ສາມາດເຊື່ອມໂຍງກັບສາກົນ ໃນການຫັນເປັນດີຈີຕອນຂອງຍຸກອຸດສະຫະກໍາ 4.0 ທີ່ເປັນທ່າອຽງລວມຂອງໂລກໃນປັດຈຸບັນ ແລະ ອະນາຄົດ.
ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງ ຕສ ໄດ້ສະເໜີຮ່າງກົດໝາຍວ່າດ້ວຍໂທລະຄົມມະນາຄົມ ຕໍ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ໃນຕອນບ່າຍວັນທີ 10 ພະຈິກ ພາຍໃຕ້ການເປັນປະທານຂອງທ່ານ ສົມມາດ ພົນເສນາ ຮອງປະທານສະພາແຫ່ງຊາດ.
ທ່ານລັດຖະມົນຕີກະຊວງ ຕສ ໄດ້ກ່າວວ່າ: ປັດຈຸບັນ ໂລກໄດ້ເລີ່ມເຂົ້າສູ່ຍຸກເສດຖະກິດ ແລະ ສັງຄົມ ດີຈີຕອນ ສະພາບການພັດທະນາເຕັກໂນໂລຊີໃໝ່ຂອງໂລກມີການຂະຫຍາຍຕົວຢ່າງວ່ອງໄວ ໄດ້ເກີດມີເຕັກໂນໂລຊີການສື່ສານທີ່ທັນສະໄໝ ເຊັ່ນ: ລະບົບສື່ສານ 4G 5G ການໃຫ້ບໍລິການເສີມ (Over The Top ລະບົບປັນຍາປະດິດ (Artificial Inteligence and Data Analysis) ອິນເຕີເນັດຂອງສັບພະສິ່ງ (Internet of thing) ສູນຂໍ້ມູນ (Cloud Computing) ຂໍ້ມູນຂະໜາດໃຫຍ່ (Big Data) ລະບົບອັດຕະໂນມັດ ແລະ ຫຸ່ນຍົນ (Automation and Robotics) ເຕັກໂນໂລຊີ ບລ໊ອກເຊນ (Blockchain) ການພິມສາມມິຕິ (Three dimensional printing) ການພັດທະນາ ອຸປະກອນດ້ານໂທລະຄົມ ກໍມີການປັບປຸງປ່ຽນແປງຫຼາຍອັນ ແລະ ເພື່ອຕອບສະໜອງຕໍ່ການປ່ຽນແປງຂອງເຕັກໂນໂລຊີທີ່ກ່າວມານັ້ນ ຜູ້ໃຫ້ບໍລິການໂທລະຄົມມະນາຄົມ ກໍໄດ້ມີການພັດທະນາການດໍາເນີນທຸລະກິດໃຫ້ມີຫຼາຍຮູບແບບຂຶ້ນ ເຊັ່ນ: ໃຫ້ບໍລິການໂດຍບໍ່ມີເຄືອຂ່າຍເປັນຂອງຕົນເອງ (Mobile Virtual Network) ໃຫ້ບໍລິການສະເພາະແຕ່ໂຄງລ່າງພື້ນຖານໂທລະຄົມມະນາຄົມ ແລະ ຮູບແບບອື່ນໆອີກ ໃນສະພາບແວດລ້ອມສາກົນ ປັດຈຸບັນ ສປປ ລາວ ໄດ້ເຂົ້າເປັນສະມາຊິກຂອງຫຼາຍອົງການຈັດຕັ້ງສາກົນ ແລະ ເປັນຄູ່ຮ່ວມມືທາງດ້ານເສດຖະກິດເຊັ່ນ: ສະຫະພາບໂທລະຄົມມະນາຄົມສາກົນ (International Telecommunication Union) ອົງການໂທລະຄົມມະນາຄົມ ອາຊີ-ປາຊີຟີກ (Asia Pacific Telecommunity), ອົງການການຄ້າໂລກ (World Trade Organization) ສັນຍາຄູ່ຮ່ວມມືທາງເສດຖະກິດຮອບດ້ານລະດັບພາກພື້ນ (Regional Comprehensive Economic Partnership) ການເຂົ້າຮ່ວມເປັນສະມາຊິກຂອງບັນດາອົງການຈັດຕັ້ງສາກົນ ເປັນຄູ່ຮ່ວມມືທາງດ້ານເສດຖະກິດ ເປັນການເປີດກວ້າງການຮ່ວມມື ແລະ ດຶງດູດການລົງທຶນ.
ແຕ່ຕົວຈິງແລ້ວ ກົດໝາຍວ່າດ້ວຍໂທລະຄົມມະນາຄົມ ສະບັບນໍາໃຊ້ປັດຈຸບັນ ໄດ້ປະກາດໃຊ້ມາໄດ້ 10 ປີແລ້ວ ແມ່ນບໍ່ສາມາດຕອບສະໜອງສະພາບຄວາມເປັນຈິງໃນປັດຈຸບັນ ເປັນຕົ້ນ: ການອະນຸຍາດດໍາເນີນທຸລະກິດ ການຈັດສັນຊັບພະຍາກອນໂທລະຄົມມະນາຄົມ ການກໍານົດມາດຕະຖານເຕັກນິກ ການກວດກາຄຸນນະພາບຂອງການບໍລິການ ການດັດສົມການແຂ່ງຂັນດ້ານໂທລະຄົມມະນາຄົມ ຍັງບໍ່ສອດຄ່ອງກັບລະບຽບການຂອງສາກົນໃນບາງກໍລະນີ ເພື່ອສ້າງເງື່ອນໄຂຄວາມເຊື່ອໝັ້ນໃຫ້ພາກພື້ນ ແລະ ສາກົນ ທີ່ສົນໃຈຈະມາລົງທຶນດ້ານໂທລະຄົມມະນາຄົມຢູ່ລາວ ສະນັ້ນ ຈຶ່ງມີຄວາມຈໍາເປັນຢ່າງຍິ່ງ ຈະຕ້ອງໄດ້ປັບປຸງຄືນ ກົດໝາຍວ່າດ້ວຍໂທລະຄົມມະນາຄົມສະບັບດັ່ງກ່າວ.
ການປັບປຸງກົດໝາຍສະບັບນີ້ ແມ່ນໃຫ້ສອດຄ່ອງກັບແນວທາງນະໂຍບາຍຂອງພັກ ແລະ ລັດ ແຜນພັດທະນາເສດຖະກິດ-ສັງຄົມ ຂອງປະເທດເຮົາໃນໄລຍະໃໝ່ ສອດຄ່ອງກັບລະບຽບການຂອງສາກົນ ສົນທິສັນຍາ ແລະ ສັນຍາສາກົນທີ່ ສປປ ລາວ ເປັນພາຄີ ໃຫ້ສາມາດຄຸ້ມຄອງເຕັກໂນໂລຊີ ແລະ ຮູບແບບການດໍາເນີນທຸລະກິດ ສົ່ງເສີມ ແລະ ດຶງດູດການລົງທຶນເພື່ອຂະຫຍາຍຕາໜ່າງການບໍລິການໂທລະຄົມມະນາຄົມໃຫ້ທົ່ວເຖິງ ສາມາດຄຸ້ມຄອງການດໍາເນີນທຸລະກິດໂທລະຄົມມະນາຄົມ ການຈັດສັນຊັບພະຍາກອນໂທລະຄົມ ການແຂ່ງຂັນດ້ານໂທລະຄົມ ການປົກປ້ອງຜູ້ໃຫ້ ຜູ້ໃຊ້ບໍລິການ ການກໍານົດມາດຕະຖານເຕັກນິກ ການກວດກາຄຸນນະພາບຂອງການບໍລິການ ການຕິດຕັ້ງ ແລະ ນໍາໃຊ້ພື້ນຖານໂຄງລ່າງໃຫ້ມີປະສິດທິພາບ ປະສິດທິຜົນຫຼາຍຂຶ້ນ ແລະ ທຽບເທົ່າກັບສາກົນໄດ້ ໃນກົດໝາຍສະບັບປັບປຸງນີ້ປະກອບມີທັງໝົດ XII ພາກ 5 ໝວດ ແລະ 59 ມາດຕາ ສະເໜີປັບປຸງເນື້ອໃນຈໍານວນ 46 ມາດຕາ ເພີ່ມໃໝ່ 12 ມາດຕາ ຄື: ມາດຕາ 9 10 20 21 26 27 29 30 31 32 33 34 ແລະ ຮັກສາເນື້ອໃນໄວ້ 4 ມາດຕາ.
ທ່ານໄດ້ກ່າວຕື່ມວ່າ: ພາຍຫຼັງທີ່ກົດໝາຍວ່າດ້ວຍການໂທລະຄົມະນາຄົມ (ສະບັບປັບປຸງ) ສໍາເລັດ ແລະ ປະກາດໃຊ້ແລ້ວ ຈະກາຍເປັນນິຕິກໍາພື້ນຖານໃຫ້ແກ່ການຄຸ້ມຄອງວຽກງານໂທລະຄົມມະນາຄົມໃຫ້ມີປະສິດທິຜົນກວ່າເກົ່າ ແນໃສ່ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ແລະ ວິໄສທັດ ແລະ ຍຸດທະສາດການພັດທະນາເຕັກໂນໂລຊີ ແລະ ການສື່ສານຂອງປະເທດເຮົາໃຫ້ປາກົດຜົນເປັນຈິງ ເມື່ອທຽບໃສ່ກົດໝາຍສະບັບເກົ່າ ກົດໝາຍສະບັບປັບປຸງຈະໄດ້ຮັບຜົນປະໂຫຍດຕົ້ນຕໍກໍຄື ມີກົນໄກການຄຸ້ມຄອງການດໍາເນີນທຸລະກິດ ເປັນຕົ້ນແມ່ນການອະນຸຍາດດໍາເນີນທຸລະກິດ ການຄຸ້ມຄອງຊັບພະຍາກອນໂທລະຄົມະນາຄົມ ການນໍາເຂົ້າ ແລະ ສົ່ງອອກອຸປະກອນໂທລະຄົມມະນາຄົມ ການຢັ້ງຢືນມາດຕະຖານ ແລະ ຄຸນນະພາບ ຈະມີຄວາມຊັດເຈນຂຶ້ນກ່ອນເກົ່າ ກົດໝາຍສະບັບນີ້ ຍັງເປັນພື້ນຖານອັນສໍາຄັນໃຫ້ແກ່ການຮ່ວມມືກັບຕ່າງປະເທດ ດ້ານໂທລະຄົມມະນາຄົມ ໃນກອບສອງຝ່າຍ ພາກພື້ນ ສາກົນ ແລະ ການເຂົ້າເປັນພາຄີຂອງສົນທິສັນຍາສາກົນອີກດ້ວຍ.
..# ຂ່າວ – ພາບ : ບຸນມີ