ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ໃນວັນທີ 4 ພະຈິກ 2021 ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຊີ້ແຈງຂໍ້ຊັກຖາມຂອງສະພາແຫ່ງຊາດ ຕິດພັນກັບວຽກງານຂອງຂະແໜງອຸດສາຫະກຳ ແລະ ການຄ້າ ທ່ານກ່າວວ່າ: ພາຍຫຼັງມີແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ໃຫ້ປິດຊົ່ວຄາວ ບັນດາໂຮງງານທີ່ມີຜູ້ຕິດເຊື້ອພະຍາດໂຄວິດ-19 ພາຍໃນໂຮງງານ ສຳລັບໂຮງງານທີ່ຢູ່ໃນເຂດແດງ ໄດ້ຮັບອະນຸຍາດໃຫ້ເປີດ ມີ: ໂຮງງານຜະລິດສິນຄ້າບໍລິໂພກ ໂຮງງານຜະລິດຢາປິ່ນປົວພະຍາດ ອຸປະກອນການແພດ ແລະ ເຄື່ອງປ້ອງກັນການລະບາດ ແລະ ໂຮງງານປະເພດອື່ນໆທີ່ນຳໃຊ້ພະນັກງານ-ກຳມະກອນຢູ່ຫໍພັກພາຍໃນໂຮງງານເທົ່ານັ້ນ ແຕ່ຕ້ອງປະຕິບັດມາດຕະການປ້ອງກັນທີ່ຄະນະສະເພາະວາງອອກຢ່າງເຂັ້ມງວດ ແລະ ຕ້ອງໄດ້ຮັບປະເມີນ ໂດຍອີງໃສ່ 10 ເງື່ອນໄຂການປະຕິບັດ ແລະ 35 ຕົວຊີ້ວັດ ທີ່ກະຊວງສາທາລະນະສຸກກຳນົດໃຫ້ ຮອດວັນທີ 28 ຕຸລາ 2021 ສະເພາະຢູ່ນະຄອນຫຼວງວຽງຈັນ ມີໂຮງງານສະເໜີຂໍເປີດຄືນ 108 ແຫ່ງ ໃນນີ້ ໂຮງງານທີ່ໄດ້ຮັບອະນຸຍາດໃຫ້ເປີດຄືນມີ 66 ແຫ່ງ.
![](https://v2.vientianemai.net/wp-content/uploads/2021/11/251159975_249827867165681_4730522103936231421_n-1024x768.jpg)
ສຳລັບຜົນກະທົບຕໍ່ໂຮງງານທີ່ມີຜູ້ຕິດເຊື້ອ ແລະ ຖືກຢຸດເຊົາການດຳເນີນທຸລະກິດຊົ່ວຄາວນັ້ນ ບໍ່ທັນສາມາດປະເມີນໄດ້ເປັນຕົວເລກທີ່ແນ່ນອນໃນເວລານີ້ ເຖິງຢ່າງໃດກໍຕາມ ຜ່ານການລາຍງານຂອງສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ບາງສະມາຄົມທຸລະກິດ ເຫັນວ່າຫຼາຍໂຮງງານ ໂດຍສະເພາະຂະໜາດນ້ອຍ ແລະ ກາງ ພົບຄວາມຫຍຸ້ງຍາກດ້ານການເງິນ ເຊິ່ງມີຄວາມສ່ຽງທີ່ບາງແຫ່ງອາດຖືກຍົກເລີກສັ່ງຊື້ສິນຄ້າ ຫຼື ຕ້ອງປິດຕົວລົງ ແລະ ກ້າວໄປສູ່ການເລີກຈ້າງ ນີ້ຈະກະທົບຕໍ່ການດຳລົງຊີວິດຂອງພະນັກງານ-ກຳມະກອນ ເຊິ່ງອີກດ້ານໜຶ່ງ ຍັງໄດ້ຮັບຜົນກະທົບຈາກການອ່ອນຄ່າຂອງເງິນກີບ.
ຕໍ່ກັບໂຮງງານທີ່ປິດກິດຈະການຊົ່ວຄາວ ກໍໄດ້ມີມາດຕະການຊ່ວຍເຫຼືອກຳມະກອນເຊັ່ນ: ຮັບຜິດຊອບຕໍ່ບ່ອນພັກເຊົາ ແລະ ອາຫານການກິນຂອງພະນັກງານ-ກຳມະກອນ ໂຮງງານບາງແຫ່ງຢູ່ນະຄອນຫຼວງວຽງຈັນ ແມ່ນໄດ້ຈ່າຍຄ່າແຮງງານ 50% ຂອງເງິນເດືອນພື້ນຖານ ແລະ ຈຳນວນໜຶ່ງແມ່ນຈ່າຍຄ່າແຮງງານເຕັມ 100% ບັນດາແຮງງານຕ່າງໆ ແມ່ນໄດ້ເອົາໃຈໃສ່ຈັດການສັກຢາວັກຊິນປ້ອງກັນພະຍາດໂຄວິດ-19 ເພື່ອໃຫ້ພະນັກງານ-ກຳມະກອນໄດ້ຮັບວັກຊິນຄົບໂດສ ແລະ ສາມາດດຳເນີນທຸລະກິດເປັນປົກກະຕິ.
# ຂ່າວ & ພາບ : ຊິລິການດາ