ເພື່ອຮັບປະກັນການຈັດຕັ້ງປະຕິບັດ ມາດຕະການຜ່ອນຜັນຄຳສັ່ງຂອງທ່ານນາຍົກລັດຖະມົນຕີ ສະບັບເລກທີ 06/ນຍ ລົງວັນທີ 29 ມີນາ 2020 ໃຫ້ມີປະສິດທິຜົນ ແລະ ປ້ອງກັນການແຜ່ລະບາດຂອງພະຍາດໂຄວິດ-19 ກະຊວງໂຍທາທິການ ແລະ ຂົນສົ່ງ ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ອອກຄຳແນະນຳ ເພື່ອອະນຸຍາດໃຫ້ດຳເນີນການບໍລິການຂົນສົ່ງໂດຍສານ ຢູ່ພາຍໃນນະຄອນຫຼວງວຽງຈັນ ແລະ ຢູ່ພາຍໃນບັນດາແຂວງ ເຊິ່ງລວມມີລົດເມ ລົດຕູ້ ລົດຮັບສົ່ງພະນັກງານ ລົດຮັບສົ່ງກຳມະກອນ ລົດແທັກຊີ ລົດສອງແຖວ ແລະ ລົດຕຸກໆ-ຈຳໂບ້ ເລີ່ມວັນທີ 4 ພຶດສະພາ 2020 ເປັນຕົ້ນໄປ ຈາກຢຸດບໍລິການມາໄດ້ເປັນເວລາເດືອນກວ່າ ສ່ວນລົດໂດຍສານລະຫວ່າງແຂວງ ຍັງບໍ່ທັນອະນຸຍາດໃຫ້ບໍລິການເທື່ອ.
ໂດຍໃຫ້ຈັດຕັ້ງປະຕິບັດຕາມມາດຕະການ ເປັນຕົ້ນແມ່ນຢູ່ສະຖານີລົດຂົນສົ່ງຜູ້ໂດຍສານ ແລະ ບ່ອນລໍຖ້າລົດເມ ຕ້ອງຈັດສັນບ່ອນນັ່ງ ຫຼືຢືນລໍຖ້າ ໂດຍໃຫ້ຮັກສາໄລຍະຫ່າງຢ່າງໜ້ອຍ 1 ແມັດຂຶ້ນໄປ ຕ້ອງມີການວັດແທກອຸນຫະພູມ ເຈວລ້າງມື ຫຼື ເຫຼົ້າສຳລັບຂ້າເຊື້ອຢູ່ໃນສະຖານີ ຕ້ອງມີສະບູລ້າງມື ແລະ ເຈ້ຍເຊັດມື ຢູ່ໃນຫ້ອງນ້ຳຂອງສະຖານີ ຕ້ອງໃຫ້ມີຖັງໃສ່ຂີ້ເຫຍື້ອທີ່ມີຝາປິດ ແລະ ເໝາະສົມກັບປະລິມານຂອງຂີ້ເຫຍື້ອ ຕ້ອງມີການອະນາໄມຂ້າເຊື້ອກ່ອນໃຫ້ການບໍລິການປະຈຳວັນໃນສະຖານີ ໂດຍການສີດຢາຂ້າເຊື້ອ ຫຼື ເຊັດຖູດ້ວຍນ້ຳສະບູໄຮເຕີຕາມຕັ່ງນັ່ງ ຮາວຈັບ ແລະ ບ່ອນອື່ນໆທີ່ມີຄົນສຳຜັດເລື້ອຍໆ ຜູ້ຂັບລົດ ແລະ ຜູ້ຊ່ວຍຕ້ອງໄດ້ວັດແທກອຸນຫະພູມກ່ອນຂຶ້ນລົດ ຖ້າພົບວ່າມີອຸນຫະພູມສູງກວ່າ 37,5 ອົງສາ ແມ່ນເດັດຂາດບໍ່ໃຫ້ຂຶ້ນລົດ ແລະ ໃຫ້ໂທປຶກສາດ່ວນ 165 ຫຼື 166 ຕ້ອງໃສ່ຜ້າອັດປາກ-ດັງຕະຫຼອດເວລາ ຖ້າບໍ່ປະຕິບັດ ແມ່ນບໍ່ອະນຸຍາດໃຫ້ບໍລິການຂົນສົ່ງເດັດຂາດ ຕ້ອງໝັ່ນລ້າງມືດ້ວຍເຈວລ້າງມື ຫຼື ສະບູ ແລະ ນ້ຳສະອາດທຸກຄັ້ງທີ່ໄດ້ສຳຜັດບ່ອນຕ່າງໆ ຕ້ອງນັ່ງຕາມບ່ອນທີ່ໄດ້ກຳນົດໄວ້ຢູ່ໃນລົດ ໂດຍຮັກສາໄລຍະຫ່າງຢ່າງໜ້ອຍ 1 ແມັດຂຶ້ນໄປ ຕ້ອງຮັກສາມາລະຍາດໃນການໄອ-ຈາມ ຕ້ອງອັດປາກ ແລະ ຖິ້ມຂີ້ເຫຍື້ອຕ້ອງຮັບປະກັນ (ບໍ່ໃຫ້ຖິ້ມຊະຊາຍ) ຕ້ອງຮັກສາໄລຍະຫ່າງ 1 ແມັດຂຶ້ນໄປໃນເວລາຢືນ ຫຼື ນັ່ງລໍຖ້າຢູ່ສະຖານີ ແລະ ບ່ອນລໍຖ້າຂຶ້ນລົດ.
ສຳລັບຍານພາຫະນະຂົນສົ່ງ ຕ້ອງມີການອະນາໄມຂ້າເຊື້ອກ່ອນໃຫ້ການບໍລິການປະຈຳວັນ ໂດຍການຂ້າເຊື້ອ ຫຼື ເຊັດຖູດ້ວຍນ້ຳສະບູໄຮເຕີ ຕາມຕັ່ງນັ່ງ ຮາວຈັບ ບ່ອນໄຂປະຕູລົດ ພວງມະໄລ ແລະ ບ່ອນອື່ນໆທີ່ມີການສຳຜັດເລື້ອຍໆ ຕ້ອງມີເຈວລ້າງມື ຫຼື ເຫຼົ້າຂ້າເຊື້ອປະຈຳລົດ ຕ້ອງກຳນົດ ແລະ ໝາຍບ່ອນນັ່ງຜູ້ໂດຍສານ ໂດຍຮັກສາໄລຍະຫ່າງຢ່າງໜ້ອຍ 1 ແມັດຂຶ້ນໄປ ຕ້ອງເປີດປະຕູ ຫຼື ແວ່ນຂ້າງ ເພື່ອລະບາຍອາກາດ ເວລາຈອດລົດຖ້າບໍ່ປະຕິບັດຕາມຄຳແນະນຳ ທີ່ຄະນະສະເພາະກິດວາງອອກ ຈະບໍ່ອະນຸຍາດໃຫ້ດຳເນີນການຂົນສົ່ງໂດຍສານ ແລະ ໃສ່ວິໄນຕາມລະບຽບກົດໝາຍຂອງ ສປປ ລາວ.
# ຂ່າວ & ພາບ : ເພັດສະໝອນ