ອີງຕາມບົດສະຫຼຸບທີ່ລາຍງານຕໍ່ກອງປະຊຸມໃຫຍ່ ຄັ້ງທີ III ຂອງຄະນະພັກຮາກຖານພະແນກອຸດສາຫະກຳ ແລະ ການຄ້ານະຄອນຫຼວງວຽງຈັນ (ນວ) ຈັດຂຶ້ນເດືອນກຸມພາ 2020 ຜ່ານມາ ເຫັນວ່າໃນ 5 ປີຜ່ານມາ (2015-2019) ຂົງເຂດວຽກງານການຄ້າສາມາດຍາດຜົນງານໄດ້ຫຼາຍດ້ານ ເຊິ່ງມັນສະແດງອອກ ສາມາດປະຕິບັດຕົວເລກຈໍລະຈອນສິນຄ້າໄດ້ 36.141,66 ຕື້ກີບ ສົມທຽບໃສ່ 5 ປີຜ່ານມາເພີ່ມຂຶ້ນ 1,58 ເທົ່າ.
ໃນ 5 ປີຜ່ານມາ ຕົວເລກມູນຄ່າການສົ່ງອອກສິນຄ້າ 3.518 ລ້ານໂດລາສະຫະລັດ ທຽບໃສ່ 5 ປີຜ່ານມາເພີ່ມຂຶ້ນ 28,97% ການສົ່ງອອກສິນຄ້າປະເພດອຸດສາຫະກຳກວມ 35,5% ຖັດລົງມາແມ່ນແຮ່ທາດກວມ 34,9% ຜະລິດຕະພັນແຮ່ທາດ 26,2% ສຳລັບສິນຄ້າທີ່ສົ່ງອອກປະກອບມີຜະລິດຕະພັນໄມ້ສຳເລັດຮູບ ກະສິກຳ ສັດລ້ຽງ ອຸດສາຫະກຳ ຫັດຖະກຳ ເຄື່ອງປ່າຂອງດົງ ແຮ່ທາດ ຜະລິດຕະພັນແຮ່ທາດ ເພັດ ແກ້ວປະເສີດອື່ນໆ ໂລຫະ ແລະ ເສດຕ່າງໆ.
ສຳລັບມູນຄ່າການນຳເຂົ້າສິນຄ້າ 7.211 ລ້ານໂດລາ ທຽບໃສ່ 5 ປີຜ່ານມາ ເຫັນວ່າຫຼຸດລົງ 47% ໃນນັ້ນການນຳເຂົ້າສິນຄ້າຫຼາຍກວ່າໝູ່ແມ່ນສິນຄ້າປະເພດນ້ຳມັນເຊື້ອໄຟ-ອາຍແກ໊ສ ກວມ 21,5% ຖັດລົງມາແມ່ນສິນຄ້າປະເພດພາຫະນະ-ຊິ້ນສ່ວນອາໄຫຼ່ ກວມ 20,5% ແລະ ສິນຄ້າປະເພດໄຟຟ້າກວມ 12,4% ສາເຫດທີ່ພາໃຫ້ການນຳເຂົ້າຫຼຸດລົງ ເນື່ອງຈາກໃນເມື່ອກ່ອນ ສິນຄ້າທຸກປະເພດແມ່ນນຳເຂົ້າຜ່ານດ່ານນະຄອນຫຼວງວຽງຈັນ ແຕ່ຕົກມາໃນໄລຍະ 5 ປີນີ້ ໄດ້ມີດ່ານສາກົນເກີດຂຶ້ນຢູ່ຫຼາຍແຂວງທົ່ວປະເທດ ສະນັ້ນ ຈຶ່ງເຮັດໃຫ້ການນຳເຂົ້າ-ສົ່ງອອກສິນຄ້າຈຳນວນໜຶ່ງແມ່ນໄດ້ນຳໃຊ້ດ່ານສາກົນຕ່າງແຂວງ.
ມາຮອດປັດຈຸບັນ ທົ່ວນະຄອນຫຼວງວຽງຈັນມີຕະຫຼາດທັງໝົດ 101 ແຫ່ງ ຖ້າສົມທຽບໃສ່ 5 ປີ ຜ່ານມາ ແມ່ນເພີ່ມຂຶ້ນ 5,2% ໃນນັ້ນ ຕະຫຼາດໃຫຍ່ມີ 8 ແຫ່ງ ເປັນຕະຫຼາດຂາຍຍົກ-ຂາຍຍ່ອຍ 2 ແຫ່ງຄື: ຕະຫຼາດລາວ-ອົດຊີ ຢູ່ເມືອງສີໂຄດຕະບອງ ແລະ ຕະຫຼາດໄຮຄຳ ຢູ່ເມືອງໄຊເສດຖາ ຕະຫຼາດກາງຄືນມີ 29 ແຫ່ງ ຕະຫຼາດນ້ອຍ 64 ແຫ່ງ ໃນນັ້ນມີຕະຫຼາດນັດ 1 ແຫ່ງ ມີສູນການຄ້າທີ່ເປີດໃຫ້ບໍລິການແລ້ວ 14 ແຫ່ງ ປັດຈຸບັນມີ 5 ຕະຫຼາດທີ່ໄດ້ຮັບການຢັ້ງຢືນເປັນຕະຫຼາດມາດຕະຖານ.
ໂດຍລວມແລ້ວ ມາຮອດປັດຈຸບັນ ຈຳນວນຕະຫຼາດໄດ້ເກີດຂຶ້ນຫຼາຍແຫ່ງຢູ່ນະຄອນຫຼວງວຽງຈັນຂອງພວກເຮົາ ທີ່ໄດ້ສ້າງຄວາມສະດວກດ້ານຕ່າງໆໃຫ້ແກ່ການຊື້-ການຂາຍ ແລະ ການແລກປ່ຽນສິນຄ້າຕ່າງໆຂອງຊາວຄ້າຂາຍ ລວມໄປເຖິງອຳນວຍຄວາມສະດວກໃຫ້ແກ່ຜູ້ທີ່ໄປຈັບຈ່າຍຊື້ສິນຄ້າເພື່ອມາບໍລິໂພກ ແລະ ຮັບໃຊ້ການດຳລົງຊີວິດຂອງຕົນເອງແບບທີ່ວ່າໃກ້ບ່ອນໃດໄປໃຊ້ບໍລິການບ່ອນນັ້ນ ຫຼຸດຜ່ອນການເດີນທາງໄກທີ່ມີການໃຊ້ຈ່າຍເພີ່ມ ບັນຫາລົດແອອັດ ເວລາ ແລະ ອື່ນໆ.
# ຂ່າວ & ພາບ : ສົມສະຫວັນ