ເພື່ອເປັນການສ້າງຂວັນ ແລະ ກຳລັງໃຈໃຫ້ແກ່ປະຊາຊົນທີ່ໄດ້ຮັບຜົນກະທົບຈາກການລະບາດ ຂອງພະຍາດໂຄວິດ-19 ໃນວັນທີ 3 ພຶດສະພາ 2020 ທ່ານ ສອນສິນໄຊ ພົມສຸວັນ ນາຍບ້ານສະພານທອງເໜືອ ເມືອງສີສັດຕະນາກ ນະຄອນຫຼວງວຽງຈັນ (ນວ) ຮ່ວມກັບຄະນະສະເພາະກິດ ປ້ອງກັນ ຄວບຄຸມ ສະກັດກັ້ນ ຮອງຫົວໜ້າຫ້ອງວ່າການປົກຄອງ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນເມືອງ ນຳໂດຍທ່ານ ວິລະສັກ ໂສແສງຈັນ ຮອງຫົວໜ້າຫ້ອງວ່າການປົກຄອງເມືອງ ພ້ອມອົງການຈັດຕັ້ງ ມະຫາຊົນພາຍໃນບ້ານ ນຳເຂົ້າສານ ແລະ ນ້ຳດື່ມທີ່ໄດ້ຈາກການປະກອບສ່ວນຂອງນັກທຸລະກິດຜູ້ໃຈບຸນທີ່ບໍ່ປະສົງອອກນາມ ໄປມອບໃຫ້ປະຊາຊົນຈຳນວນ 80 ຄົນ ພາຍໃນບ້ານສະພານທອງເໜືອ.
ເຂົ້າສານທີ່ນຳມາມອບຄັ້ງນີ້ ມີທັງໝົດ 1.600 ກິໂລ ແລະ ນ້ຳດື່ມ 480 ຕຸກ ມອບໃຫ້ປະຊາຊົນ ຈຳນວນ 80 ຄົນ ແຕ່ລະຄົນຈະໄດ້ຮັບເຂົ້າສານຜູ້ລະ 20 ກິໂລ ແລະ ນ້ຳດື່ມຜູ້ລະ 6 ຕຸກ ເຊິ່ງເປັນກຸ່ມ ເປົ້າໝາຍທີ່ຂາດເຂີນ ແລະ ໄດ້ຮັບຜົນກະທົບຈາກພະຍາດໂຄວິດ-19.
ໂອກາດນີ້ ທ່ານ ວິລະສັກ ໂສແສງຈັນ ໄດ້ສະແດງຄວາມຂອບໃຈນຳຜູ້ປະກອບການທີ່ໃຈບຸນ ໃຫ້ ການປະກອບສ່ວນຊຸກຍູ້ໃນຄັ້ງນີ້ ແລະ ຍ້ອງຍໍຊົມເຊີຍຕໍ່ຄວາມສາມັກຄິຂອງອຳນາດການປົກຄອງ ກໍຄືພໍ່ແມ່ປະຊາຊົນທີ່ເອົາໃຈໃສ່ໃນການປະຕິບັດຄຳສັ່ງເລກທີ 06/ນຍ ຂອງທ່ານນາຍົກລັດຖະມົນຕີ ພ້ອມກ່າວເນັ້ນໃຫ້ແຕ່ລະຄອບຄົວ ກໍຄືປະຊາຊົນພາຍໃນເມືອງ ຈົ່ງສຶບຕໍ່ເອົາໃຈໃສ່ຈັດຕັ້ງຜັນຂະຫຍາຍຄຳສັ່ງແນະນຳ ເລກທີ 06/ນຍ ຂອງທ່ານນາຍົກລັດຖະມົນຕີ ໃຫ້ປະສົບຜົນສຳເລັດຕາມລະດັບຄາດໝາຍ.
# ຂ່າວ & ພາບ: ບຸນມີ