ເນື່ອງໃນໂອກາດວັນກຳມະກອນສາກົນ ຄົບຮອບ 134 ປີ (01/05/1886-01/05/2020) ສູນເລືອດແຫ່ງຊາດ ອົງການກາແດງລາວ ຈັດການຮັບບໍລິຈາກເລືອດຂຶ້ນທີ່ສູນເລືອດແຫ່ງຊາດ ນອກຈາກເປັນການປະກອບສ່ວນສ້າງຂະບວນເພື່ອວັນດັ່ງກ່າວ ຍັງປະກອບສ່ວນຈັດຕັ້ງປະຕິບັດຄຳສັ່ງແນະນຳເລກທີ 06/ນຍ ຂອງທ່ານນາຍົກລັດຖະມົນຕີ ຍົກເວັ້ນການຈັດກິດຈຳໃຫຍ່ທີ່ມີຄົນມາຮ່ວມຊຸມນຸມກັນເປັນຈຳນວນຫຼາຍ ແຕ່ຍ້ອນຄວາມຈຳເປັນໃນການນຳໃຊ້ເລືອດໃນແຕ່ລະວັນ ຈຶ່ງໄດ້ຈັດການຮັບບໍລິຈາກເລືອດແບບເປີດກວ້າງຂຶ້ນ.
ທ່ານ ແພງທອງ ບານຈັນທະວົງ ຮອງຫົວໜ້າສູນເລືອດແຫ່ງຊາດ ອົງການກາແດງລາວ ແຈ້ງໃຫ້ຊາບວ່າ: ພະຍາດໂຄວິດ-19 ກໍ່ຢ້ານ ແຕ່ຄວາມຕ້ອງການຊົມໃຊ້ເລືອດກໍ່ຈຳເປັນ ເຊິ່ງໃນແຕ່ລະວັນມີຜູ້ເຈັບທີ່ນອນປິ່ນປົວຢູ່ໂຮງໝໍແຫ່ງຕ່າງໆ ທີ່ຕ້ອງການຊົມໃຊ້ເລືອດມາຂໍເລືອດຢູ່ສູນສະເລ່ຍວັນລະ 100 ຖົງ ແຕ່ກົງກັນຂ້າມ ຜູ້ບໍລິຈາກເລືອດແບບສະໝັກໃຈຢູ່ທີ່ສູນເລືອດໃນແຕ່ລະວັນ ສະເລ່ຍບໍ່ເຖິງ 20 ຖົງ ຈຶ່ງເຮັດໃຫ້ສູນເລືອດບໍ່ສາມາດສະໜອງເລືອດໄດ້ຢ່າງພຽງພໍ ບວກກັບການລະບາດຂອງພະບາດໂຄວິດ-19 ຍິ່ງເປັນອຸປະສັກໃນການອອກເຄື່ອນໄຫວຮັບບໍລິຈາກເລືອດນອກສະຖານທີ່ ແລະ ຢູ່ໃນສູນເອງກໍ່ຍັງຕ້ອງພົບອຸປະສັກເຊັ່ນກັນ ຍ້ອນຍັງຢູ່ໄລຍະຈັດຕັ້ງຜັນຂະຫຍາຍຄຳສັ່ງແນະນຳເລກທີ 06/ນຍ ຂອງທ່ານນາຍົກລັດຖະມົນຕີ.
ແຕ່ຍ້ອນຄວາມຈຳເປັນ ທາງສູນເລືອດແຫ່ງຊາດ ຈຶ່ງເປີດຮັບການບໍລິຈາກເລືອດຂຶ້ນ ເຊິ່ງເລິ່ມແຕ່ວັນທີ 30 ເມສາ ຈົນເຖິງ 2 ພຶດສະພາ 2020 ມີຫຼາຍພາກສ່ວນທັງພາກລັດ-ເອກະຊົນ ແລະ ສ່ວນບຸກຄົນ ໄດ້ຖະຢ່ອຍເຂົ້າຮ່ວມບໍລິຈາກເລືອດຢູ່ທີ່ສູນເລືອດ ຈຳນວນ 80 ຄົນ ໂອກາດນີ້ ສູນເລືອດແຫ່ງຊາດ ຂອບໃຈທຸກພາກສ່ວນທີ່ໃຫ້ການປະກອບສ່ວນບໍລິຈາກເລືອດໃນຄັ້ງນີ້ ແລະ ສູນເລືອດແຫ່ງຊາດເອງຂໍຢືນຢັນອີກຄັ້ງ ໃນຄວາມສະອາດປອດໄພ ທຸກທ່ານທີ່ເຂົ້າມາບໍລິຈາກເລືອດຢູ່ສູນ ຈະຜ່ານການກວດກາຕາມຂັ້ນຕອນຢ່າງລະອຽດ ມີຄວາມປອດໄພໃນການບໍລິຈາກເລືອດ ແລະ ເຊີນຊວນທຸກທ່ານຮ່ວມບໍລິຈາກເລືອດ ເພື່ອຊ່ວຍເຫຼືອເພື່ອນມະນຸດດ້ວຍກັນ.
