ວັນທີ 1 ພຶດສະພາ 2020 ທີ່ກະຊວງສາທາລະນະສຸກ ໄດ້ມີ 2 ບໍລິສັດມອບເຄື່ອງຊ່ວຍເຫຼືອໃຫ້ແກ່ລັດຖະບານ ເພື່ອປະກອບສ່ວນເຂົ້າໃນວຽກງານຕ້ານ ແລະ ສະກັດກັ້ນພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (COVID-19) ຕາງໜ້າຮັບຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ມີບັນດາຄະນະສະເພາະກິດຄວບຄຸມໂຄວິດ-19 ເຂົ້າຮ່ວມ.
ພາກສ່ວນທີ່ມອບຄັ້ງນີ້ປະກອບມີ ກຸ່ມບໍລິສັດ ດີເອຊເຄ ຈຳກັດ (ບໍລິສັດ ນ້ຳຜາໃຫຍ່ຮາຍໂດຣພາວເວີ) ມອບເງິນ 100.000.000 ກີບ ໂດຍການມອບຂອງທ່ານ ໄຊຍະສິດ ຊະນະແກ້ວ ອຳນວຍການກຸ່ມບໍລິສັດ ດີເອຊເຄ ຈຳກັດ ແລະ ບໍລິສັດ ເອັສທີກຣຸບ ແລະ ທະນາຄານເອັສທີ ຈຳກັດ ມອບກ້ອງຈັບອຸນຫະພູມ ຈຳນວນ 5 ຊຸດ ມູນຄ່າ 650.000.000 ກີບ ໂດຍການມອບຂອງທ່ານ ຈິຣັດຊະຍຸດ ອຳຍົງ ຜູ້ອຳນວຍການໃຫຍ່ ກຸ່ມບໍລິສັດ ເອັສທີກຣຸບ ແລະ ທະນາຄານເອັສທີ ຈຳກັດ.
# ຂ່າວ & ພາບ: ຂັນທະວີ