ທ່ານ ສົມພອນ ສອນດາລາ ຮອງຫົວໜ້າພະແນກສຶກສາທິການ ແລະ ກີລາ ນະຄອນຫຼວງວຽງຈັນ (ນວ) ກ່າວວ່າ: ຈາກຜົນສະຫຼຸບຂອງກອງປະຊຸມປຶກສາຫາລືໃນເບື້ອງຕົ້ນ ເຊິ່ງເປັນທີ່ຮັບຮູ້ວ່າຈະເປີດການຮຽນ-ການສອນຄືນໃໝ່ ໃນວັນທີ 11 ພຶດສະພາ 2020 ຖ້າຫາກສະຖານະການແຜ່ລະບາດໂຄວິດ-19 ເບົາບາງລົງ ດ້ວຍເຫດນັ້ນ ທາງກະຊວງສຶກສາທິການ ແລະ ກີລາ ໂດຍການເປັນປະທານຂອງທ່ານລັດຖະມົນຕີກະຊວງສຶກສາທິການ ແລະ ກີລາ ໄດ້ຈັດກອງປະຊຸມປຶກສາຫາລືກັນ ແລະ ເປັນເອກະພາບກັນ ໃນການເລື່ອນວັນເປີດການຮຽນ-ການສອນຄືນໃໝ່ ຂອງຂະແໜງການສຶກສາ-ກີລາ ໃນຂອບເຂດທົ່ວປະເທດ ເຊິ່ງທາງພະແນກສຶກສາທິການ ແລະ ກີລາ ນວ ກໍຈະໄດ້ອອກແຈ້ງການໃຫ້ກັບຂະແໜງການສຶກສາ-ກີລາ ທົ່ວ ນວ ຈັດຕັ້ງຜັນຂະຫຍາຍມະຕິຂອງກອງປະຊຸມດັ່ງກ່າວ.
ກອງປະຊຸມປຶກສາຫາລືກ່ຽວກັບແຜນການເປີດຮຽນຄືນໃໝ່ຂອງຂະແໜງການສຶກສາ ແລະ ກີລາ ຄັ້ງວັນທີ 27 ເມສາ 2020 ທີ່ຫ້ອງປະຊຸມ 425 ພາຍໃຕ້ການເປັນປະທານຂອງທ່ານນາງ ແສງເດືອນ ຫຼ້າຈັນທະບຸນ ລັດຖະມົນຕີກະຊວງສຶກສາທິການ ແລະ ກີລາ ພ້ອມດ້ວຍທ່ານຮອງລັດຖະມົນຕີ ຮັກສາການ ຫົວໜ້າຫ້ອງການກະຊວງ ຫົວໜ້າກົມ ວ່າການຫົວໜ້າກົມ ຣອງຫົວໜ້າກົມ ຫົວໜ້າຫ້ອງການ ຜູ້ອຳນວຍການ ແລະ ຮອງຜູ້ອຳນວຍການສະຖາບັນ ປະທານສະມາຄົມການສຶກສາພາກເອກະຊົນ ບັນດາຫົວຫນ້າພະແນກ ແລະ ວິຊາການ ເຂົ້າຮ່ວມ.
ກອງປະຊຸມເຫັນດີວ່າ: ການເປີດສະຖານການສຶກສາຄືນໃໝ່ ຕ້ອງໄດ້ອີງໃສ່ການປະເມີນຜົນຂອງຄະນະສະເພາະກິດແຫ່ງຊາດເພື່ອການປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແລະ ການອະນຸຍາດຂອງລັດຖະບານກ່ຽວກັບບັນຫາດັ່ງກ່າວເປັນວາລະລະດັບຊາດ ແລະ ຈະມີຜົນກະທົບກັບຫຼາຍພາກສ່ວນ ສະນັ້ນ ກອງປະຊຸມໄດ້ຄົ້ນຄວ້າປຶກສາຫາລືເປັນເອກະພາບຂອງຂະແຫນງການສຶກສາ ແລະ ກີລາ ເພື່ອສະເໝີໃຫ້ຄະນະສະເພາະກິດ ກໍຄືລັດຖະບານພິຈາລະນາໃນການຊີ້ນຳການອະນຸມັດ ໃຫ້ເປີດການຮຽນ-ການສອນຂະແໜງສຶກສາ ແລະ ກີລາ ອາດຈະໄດ້ເປີດຮຽນໃນສາຍສາມັນສຶກສາ ສ້າງຄູ ອາຊີວະສຶກສາ ການສຶກສາຊັ້ນສູງ ໃນວັນທີ 18 ພຶດສະພາ 2020 ສຳລັບນັກຮຽນປີສຸດທ້າຍ ໝາຍເຖິງ ປ5 ມ4 ມ7 ແລະ ປີສຸດທ້າຍຂອງບັນດາວິທະຍາໄລ ແລະ ມະຫາວິທະຍາໄລ ຈົນເຖິງກາງເດືອນກໍລະກົດ ສຳລັບຫ້ອງອື່ນໆນອກຈາກປີສຸດທ້າຍນັ້ນ ແມ່ນຈະເລີ່ມຮຽນໃນວັນທີ 2 ມິຖຸນາ 2020 ເປັນຕົ້ນໄປຈົນເຖິງທ້າຍເດືອນກໍລະກົດ 2020.
ສຳລັບການສຶກສາກ່ອນໄວຮຽນ ຈະໄດ້ໂຈະການຮຽນ-ການສອນຕະຫຼອດສົກຮຽນນີ້ ສຳລັບກີລາກາງ ແຈ້ງ ແລະ ກີລາໃນຮົ່ມ ໃຫ້ປະຕິບັດຕາມເງື່ອນໄຂຂອງຄະນະສະເພາະກິດຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 (COvi0 9) ໃຫ້ສະຖານການສຶກສາທັງພາກລັດ ແລະ ເອກະຊົນທີ່ມີເງື່ອນໄຂຈັດການຮຽນ-ການສອນທາງໄກ ແລະ ແບບອອນລາຍ ສືບຕໍ່ຈັດຕັ້ງປະຕິບັດການຮຽນ-ການສອນໄປຈົນໝົດຫຼັກສູດຂອງຕົນ ໃຫ້ສະຖານການສຶກສາສືບຕໍ່ປະຕິບັດຕາມມາດຕະການຂອງຄະນະສະເພາະກິດແຫ່ງຊາດເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ເຊັ່ນ: ຮັກສາໄລຍະຫ່າງທາງສັງຄົມ ຈັດໃຫ້ມີບ່ອນລ້າງມື ມີຜ້າອັດປາກ-ດັງ ເພື່ອຮັບປະກັນຄວາມປອດໄພຂອງນັກຮຽນ-ນັກສຶກສາ ຄູ-ອາຈານ ແລະ ຜູ້ບໍລິຫານການສຶກສາ ແລະ ກີລາ.
ການສະເໜີຂອງສະມາຄົມການສຶກສາພາກເອກະຊົນ ກະຊວງສຶກສາທິການ ແລະ ກີລາ ເຫັນໄດ້ສະພາບຄວາມຫຍຸ້ງຍາກຂອງພໍ່ແມ່ຜູ້ປົກຄອງ ຄູ-ອາຈານ ແລະ ຜູ້ປະກອບການສະຖານການສຶກສາພາກເອກະຊົນ ຈຶ່ງໄດ້ອອກແຈ້ງການສະບັບເລກທີ 1186/ຫກ ລົງວັນທີ 24 ເມສາ 2020 ວ່າດ້ວຍການຈ່າຍເງິນເດືອນຄູອາຈານ ພະນັກງານ ແລະ ການຈ່າຍພັນທະຄ່າຮຽນຂອງສະຖາບັນການສຶກສາພາກເອກະຊົນໃນຂອບເຂດທົ່ວປະເທດ ຜ່ານການລາຍງານຂອງສະມາຄົມການສຶກສາພາກເອກະຊົນ ເຫັນວ່າສະຖານການສຶກສາພາກເອກະ ຊົນມີຫຼາຍລະດັບ ແລະ ໄດ້ຮັບຜົນກະທົບທີ່ແຕກຕ່າງກັນ ດັ່ງນັ້ນ ກອງປະຊຸມຈຶ່ງເຫັນດີມອບໃຫ້ສະມາຄົມການສຶກສາພາກເອກະຊົນປຶກສາຫາລືກັບບັນດາຜູ້ປະກອບການເພື່ອປະສານສົມທົບກັບພໍ່ແມ່ຜູ້ປົກຄອງ ແລະ ຄູອາຈານເພື່ອຊອກຫາທາງອອກທີ່ເໝາະສົມຮ່ວມກັນຕາມແຕ່ລະກໍລະນີ.
# ຂ່າວ & ພາບ: ບຸນມີ