ວັນທີ 1 ພຶດສະພາ 2020 ທີ່ສູນປະຕິບັດງານຄະນະສະເພາະກິດ ຄວບຄຸມພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (COVID-19) ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈຳການຄະນະສະເພາະກິດ ໃຫ້ຮູ້ວ່າ: ສະພາບການເຝົ້າລະວັງ COVID-19 ຢູ່ ສປປ ລາວ ຮອດ 5 ໂມງແລງຂອງວັນທີ 30 ເມສາ 2020 ມີຈຳນວນຜູ້ເດີນທາງເຂົ້າມາມີທັງໝົດ 2.097 ຄົນ ຈຸດຜ່ານດ່ານລາວ-ໄທ 1.289 ຄົນ ໃນນັ້ນ ມີແຮງງານກັບມາແຕ່ໄທຜ່ານດ່ານຊ່ອງເມັກ ແຂວງຈຳປາສັກ 8 ຄົນ ເຫຼືອນັ້ນແມ່ນຜູ້ຂັບລົດຂົນສົ່ງສິນຄ້າ ຈຸດຜ່ານດ່ານລາວ-ຈີນ ທັງໝົດ 195 ຄົນ ທັງໝົດແມ່ນຜູ້ຂັບລົດຂົນສົ່ງສິນຄ້າ ຈຸດຜ່ານດ່ານລາວ-ຫວຽດ ທັງໝົດ 613 ຄົນ ທັງໝົດແມ່ນຜູ້ຂັບລົດຂົນສົ່ງສິນຄ້າ ຈຳນວນຜູ້ເດີນທາງຜ່ານສະໜາມບິນສາກົນວັດໄຕ 00 ຄົນ ເຊິ່ງໃນທຸກດ່ານແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້ ສຳລັບແຮງງານລາວຈຳນວນ 8 ຄົນທີ່ເຂົ້າມາໃໝ່ ຜ່ານດ່ານຊ່ອງເມັກ ແຂວງຈຳປາສັກນັ້ນ ແມ່ນມີຖິ່ນຖານຢູ່ແຂວງສະຫວັນນະເຂດ 2 ຄົນ ແລະ ຈຳປາສັກ 6 ຄົນ ເຊິ່ງໄດ້ນຳສົ່ງໄປຈຳກັດບໍລິເວນຢູ່ສູນຂອງແຂວງຈົນຄົບກຳນົດ 14 ວັນ.
ນອກນີ້ ໃນວັນທີ 30 ເມສາ 2020 ໄດ້ເກັບຕົວຢ່າງມາກວດທັງໝົດ 94 ຄົນ ໃນນັ້ນ ຜູ້ມີອາການສົງໄສມາກວດຢູ່ໂຮງໝໍ 79 ຄົນ ເກັບຕົວຢ່າງຜູ້ຕິດເຊື້ອທີ່ນອນປິ່ນປົວຢູ່ໂຮງໝໍມາກວດຄືນ 11 ຄົນ ແລະ ແຮງງານລາວທີ່ກັບມາຈາກປະເທດໄທ 4 ຄົນ ໃນຈຳນວນຜູ້ມີອາການສົງໄສ 79 ຄົນ ລາຍລະອຽດດັ່ງລຸ່ມນີ້: ນະຄອນຫຼວງວຽງຈັນ 2 ຄົນ ບໍລິຄຳໄຊ 1 ຄົນ ໄຊຍະບູລີ 50 ຄົນ (ຊ່າງແປງໄຟຟ້າຄົນໄທທີ່ເຂົ້າມາ) ໂຮງໝໍມິດຕະພາບ 26 ຄົນ ແພດໝໍທີ່ສຳເລັດໄລຍະການເຮັດວຽກປິ່ນປົວຄົນເຈັບ COVID-19 ຜົນກວດທັງໝົດ 94 ຄົນ ບໍ່ພົບເຊື້ອ ໝາຍຄວາມວ່າໃນວັນທີ 30 ເມສາ 2020 ບໍ່ມີກໍລະນີໃໝ່.
ນັບແຕ່ເດືອນມັງກອນ ຮອດວັນທີ 30 ເມສາ 2020 ໄດ້ເກັບຕົວຢ່າງມາກວດທັງໝົດ ມີ 2.021 ຕົວຢ່າງ ກວດພົບເຊື້ອສະສົມ 19 ຄົນ (19 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ). ສ່ວນການຕິດຕາມຢູ່ສະຖານທີ່ຈຳກັດບໍລິເວນຂອງແຂວງ ແລະ ຜູ້ຈຳກັດບໍລິເວນຢູ່ເຮືອນ ສຳລັບຜູ້ເດີນທາງມາຈາກຕ່າງປະເທດ ມາຮອດວັນທີ 30 ເມສາ 2020 ທົ່ວປະເທດຍັງມີສູນຈຳກັດບໍລິເວນທັງໝົດ 175 ສູນ ມີຜູ້ຈຳກັດບໍລິເວນຢູ່ສູນ 617 ຄົນ ຈຳກັດບໍລິເວນຢູ່ເຮືອນ 424 ຄົນ ເກັບຕົວຢ່າງມາກວດວິເຄາະຫາເຊື້ອ 568 ຄົນ ທັງໝົດບໍ່ພົບເຊື້ອ ແລະ ການຕິດຕາມປີ່ນປົວຄົນເຈັບຢູ່ໂຮງໝໍ ປັດຈຸບັນ ມີຜູ້ຕິດເຊື້ອນອນຕິດຕາມປິ່ນປົວຢູ່ໂຮງໝໍແຕ່ 11 ຄົນ (ຢູ່ໂຮງໝໍມິດຕະພາບ) ມີອາການເບົາບາງ ຍັງຕິດຕາມເພື່ອກວດວິເຄາະຢັ້ງຢືນການບໍ່ພົບເຊື້ອ ຈຶ່ງໃຫ້ອອກໂຮງໝໍ ສ່ວນຢູ່ໂຮງໝໍແຂວງຫຼວງພະບາງ ໄດ້ໃຫ້ອອກໂຮງໝໍໝົດແລ້ວ ແລະ ໄປຕິດຕາມຢູ່ເຮືອນ.
# ຂ່າວ & ພາບ: ຂັນທະວີ