ພິທີເຊັນສັນຍາວ່າດ້ວຍການຮ່ວມມືສ້າງສູນບໍລິການໃຫ້ຄຳປຶກສາດ້ານຄວາມປອດໄພ ຂອງລະບົບເຕັກໂນໂລຊີຂໍ້ມູນຂ່າວສານ ລະຫວ່າງກົມເຕັກໂນໂລຊີດີຈິຕອນ ກະຊວງວິທະຍາດ ແລະ ເຕັກໂນໂລຊີ ແລະ ບໍລິສັດ ເຈເອວເອສໄອທີໂຊລູເຊີ້ນ ຈຳກັດຜູ້ດຽວ ຈັດຂຶ້ນວັນທີ 25 ກໍລະກົດ 2019 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ຮ່ວມລົງນາມຂອງທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີດີຈິຕ໋ອນ ແລະ ທ່ານ ວົງພູທອນ ສີຈັນທະລາດ ປະທານ ບໍລິສັດ ເຈເອວເອສໄອທີໂຊລູເຊີ້ນ ຈຳກັດຜູ້ດຽວ ມີທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ພ້ອມພາກສ່ວນກ່ຽວຂ້ອງເຂົ້າຮ່ວມ.
ການລົງນາມຄັ້ງນີ້ ເປັນການຜັນຂະຫຍາຍບົດບັນທຶກຄວາມເຂົ້າໃຈ ວ່າດ້ວຍການສຶກສາຄວາມເປັນໄປໄດ້ໃນການສ້າງ ແລະ ພັດທະນາຄວາມປອດໄພຂອງລະບົບເຕັກໂນໂລຊີ ຂໍ້ມູນຂ່າວສານທີ່ໄດ້ລົງນາມ ປີ 2017 ເຊິ່ງໄລຍະຜ່ານມາລັດຖະບານໄດ້ມີນະໂຍບາຍສົ່ງເສີມໃນການຫັນເປັນທັນສະໄໝ ແລະ ໄດ້ສ້າງນິຕິກຳຫຼາຍສະບັບ ກ່ຽວກັບວຽກງານໄອທີ-ດີຈິຕ໋ອນ ເຊັ່ນ: ກົດໝາຍວ່າດ້ວຍທຸລະກຳທາງເອເລັກໂຕຣນິກ ກົດໝາຍວ່າດ້ວຍປົກປ້ອງຂໍ້ມູນ ກົດໝາຍວ່າດ້ວຍການຕ້ານ ແລະ ສະກັດກັ້ນອາຊະຍາກຳທາງລະບົບຄອມພິວເຕີ ອັນເປັນເຄື່ອງມືພື້ນຖານໃນການປົກປ້ອງສິດຜົນປະໂຫຍດຂອງສັງຄົມ ເພື່ອຄຸ້ມຄອງການນຳໃຊ້ລະບົບໂອທີ-ດີຈິຕ໋ອນ ໃຫ້ມີຄວາມຖືກຕ້ອງ ປອດໄພ ແລະ ຍຸຕິທຳໃນສັງຄົມ.
ທ່ານ ສຸລິຍາ ແສງດາລາວົງ ຮອງຫົວໜ້າກົມເຕັກໂນໂລຊີ ດີຈິຕ໋ອນກ່າວວ່າ: ຜ່ານການສຶກສາເບື້ອງຕົ້ນເຫັນວ່າບໍລິສັດ ຫຼື ຜູ້ປະກອບການທີ່ໃຫ້ບໍລິການດ້ານລະບົບໄອທີ ອິນເຕີເນັດ ໂທລະຄົມ ແລະ ສະຖາບັນການເງິນໃນລາວ ຍັງກວມສ່ວນຫຼາຍທີ່ຍັງບໍ່ໃຫ້ຄວາມສຳຄັນດ້ານຄວາມປອດໄພລະບົບໄອທີເທົ່າທີ່ຄວນ ແລະ ຍັງບໍ່ທັນໄດ້ຮັບການຢັ້ງຢືນມາດຕະຖານຄວາມປອດໄພຂອງລະບົບໄອທີ (ISO:27001) ແລະ ISO ອື່ນໆກ່ຽວຂ້ອງ ເຊິ່ງເປັນຊ່ອງວ່າງໃຫ້ແກ່ກຸ່ມຄົນທີ່ບໍ່ຫວັງດີສາມາດເຈາະລະບົບ ເພື່ອໂຈນລະກຳຂໍ້ມູນສຳຄັນຂອງອົງກອນ ລວມທັງການເຈາະເຂົ້າໃນລະບົບຄອມພິວເຕີຂອງສະຖາບັນການເງິນ ທະນາຄານ ແລະອື່ນໆ ສະນັ້ນ ຄະນະນຳກະຊວງວິທະຍາສາດ ແລະ ເຕັກໂນໂລຊີ ຈຶ່ງຕົກລົງເຫັນດີໃຫ້ສ້າງສູນບໍລິການໃຫ້ຄຳປຶກສາດ້ານຄວາມປອດໄພ ຂອງລະບົບເຕັກໂນໂລຊີຂໍ້ມູນຂ່າວສານ ໂດຍສູນນີ້ຈະເຮັດໜ້າທີ່ຕົ້ນຕໍ ຄື: ຄົ້ນຄວ້າ ແລະ ພັດທະນາລະບົບຄວາມປອດໄພດ້ານໄອທີ ປະກອບມີດ້ານນິຕິກຳ ລະບຽບການກ່ຽວຂ້ອງ ດ້ານນະໂຍບາຍສົ່ງເສີມການພັດທະນາລະບົບເຕັກນິກ ບໍລິການໃຫ້ຄຳປຶກສາ ແລະ ເຝິກອົບຮົມກ່ຽວກັບລະບົບຄວາມປອດໄພ ດ້ານໄອທີໃຫ້ໄດ້ຕາມມາດຕະຖານສາກົນ.