ມູນນິທິເຮືອນເດັກ ໄດ້ຮັບການອະນຸມັດຢ່າງເປັນທາງການ ຈາກກະຊວງພາຍໃນ ວັນທີ 8 ມັງກອນ 2019 ຄວາມຄິດລິເລີ່ມໃນການສ້າງມູນນິທິຂອງຄະນະປະທານ ແມ່ນເພື່ອຢາກສືບຕໍ່ໃນການພັດທະນາເດັກທາງດ້ານການສຶກສາ ແລະ ວັດທະນະທຳທີ່ສະຫະພັນແຮງງານ JICHIRO ຂອງປະເທດຍີ່ປຸ່ນ ໄດ້ໃຫ້ການຊ່ວຍເຫຼືອພາຍໃຕ້ໂຄງການ ເຮືອນເດັກ ເພື່ອວັດທະນະທຳ ແລະ ການສຶກສາ ເຊິ່ງໄດ້ຮ່ວມວຽກນຳໃນເວລານັ້ນ ແມ່ນກະຊວງສຶກສາທິການ ແລະ ກະຊວງຖະແຫຼງຂ່າວ ແລະ ວັດທະນະທຳ ໃນປີ 1996-2010.
ເພື່ອເປັນການສືບຕໍ່ໃນການພັດທະນາເດັກທາງດ້ານການສຶກສາ ແລະ ວັດທະນະທຳ ຈາກຮູບແບບໂຄງການຮ່ວມມືກັບພາກລັດ ທີ່ມີຜົນສຳເລັດສູງໃນໄລຍະຜ່ານມາ ການຈັດຕັ້ງມູນນິທິໃນສະພາບການ ແລະ ເງື່ອນໄຂໃໝ່ຈະສາມາດເສີມສ້າງທ່າແຮງ ໃນການເຮັດວຽກຮ່ວມກັນ ໃນຮູບແບບໃໝ່ຂອງການພັດທະນາເດັກ ແລະ ການຊ່ວຍເຫຼືອສັງຄົມ ເພື່ອໃຫ້ສອດຄ່ອງກັບຄວາມຮຽກຮ້ອງຕ້ອງການໃນປັດຈຸບັນ ແລະ ສາມາດເສີມຂະຫຍາຍການຊ່ວຍເຫຼືອໃຫ້ເປັນລະບົບ ເປົ້າໝາຍ ແລະ ຮູບແບບການພັດທະນາການສຶກສາ ແລະ ວັດທະນະທຳຂອງມູນນິທິ ແມ່ນຄວາມມຸ້ງໝັ້ນໃນການນຳເອົານະໂຍບາຍ ແຜນການພັດທະນາຂອງລັດຖະບານທາງດ້ານການສຶກສາ ວັດທະນະທຳ ແລະ ສະຫວັດດີການສັງຄົມ ທີ່ມີແຜນຢ່າງຄົບຖ້ວນ ແຕ່ນີ້ຮອດປີ 2030 ເປັນຫຼັກ.
ສຳລັບຜູ້ໃຫ້ທຶນຫຼັກແກ່ມູນນິທິ ແມ່ນອົງການຊ່ວຍເຫຼືອອະນາຄົດເດັກນ້ອຍ ຍີ່ປຸ່ນ-ລາວ (NPO) ນຳໂດຍ ທ່ານ Taka shi SHIR AISHI ມູນນິທິເຮືອນເດັກກໍໄດ້ມີແຜນທີ່ຈະສ້າງຄວາມຍືນຍົງໃຫ້ແກ່ມູນນິທິເອງ ໜຶ່ງໃນແຜນການໄລຍະຍາວທີ່ຈະສ້າງຄວາມຍືນຍົງໃຫ້ແກ່ມູນນິທິໃນຂະແໜງການສຶກສາ ແມ່ນມູນນິທິມີຄວາມມຸ້ງໝັ້ນໃນການສ້າງສູນລ້ຽງເດັກ (ໂຮງຮຽນລ້ຽງເດັກ) ທີ່ສາມາດເປັນຕົວແບບທີ່ດີ ແລະ ເປັນບ່ອນຮຽນຮູ້ໃຫ້ແກ່ພໍ່ແມ່ ຜູ້ປົກຄອງໃນການລ້ຽງດູລູກແຕ່ຍັງນ້ອຍ ແລະ ຈະເປັນໂຮງຮຽນລ້ຽງເດັກຕົວແບບໃຫ້ແກ່ບັນດາຄູ ແລະ ວິຊາການຈາກໂຮງຮຽນຕ່າງໆທີ່ລ້ຽງເດັກ ສາມາດເຂົ້າມາສຶກສາ ແລະ ຖອດຖອນບົດຮຽນໄດ້ ເຊິ່ງສູນດັ່ງກ່າວ ຈະເປັນສູນທີ່ສາມາດລະດົມທຶນໃຫ້ມູນນິທິ ໃນການສ້າງຄວາມຍືນຍົງໃຫ້ຕົນເອງໃນອະນາຄົດ.
ພິທີເປີດມູນນິທິເຮືອນເດັກຈັດຂຶ້ນວັນທີ 26 ກໍລະກົດ 2019 ທີ່ຮ້ານອາຫານຄົວລາວ ນະຄອນຫຼວງວຽງຈັນ ເປັນປະທານຂອງທ່ານນາງ ສຸພາພອນ ວິຊາປຣາຄາວາມູຣະ ປະທານມູນນິທິເຮືອນເດັກ ມີຜູ້ຕາງໜ້າຈາກກະຊວງພາຍໃນ ກະຊວງສຶກສາທິການ ແລະ ກີລາ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ກະຊວງແຮງງານ ແລະ ສະຫວັດດີການສັງຄົມ ກະຊວງການຕ່າງປະເທດ ອົງການຈັດຕັ້ງຕ່າງປະເທດ ແລະ ມູນນິທິສະມາຄົມທີ່ເຄື່ອນໄຫວໃນຂົງເຂດດຽວກັນເຂົ້າຮ່ວມ ເຊິ່ງໃນພິທີໄດ້ມອບໃບຍ້ອງຍໍໃຫ້ຜູ້ສະໜັບສະໜູນ ມອບທຶນການສຶກສາໃຫ້ນັກຮຽນຊັ້ນປະຖົມ ມັດທະຍົມ ແລະ ໂຮງຮຽນວິຊາຊີບຜູ້ທີ່ຂາດເຂີນ ໃນສົກຮຽນ 2019-2020 ຕື່ມອີກ.