ບໍລິສັດ ຈີດີບໍ່ແຮ່ຈຳກັດ ແລະ ບໍລິສັດ ເຊິນເຈິນ P-along capital ຈຳກັດ ນຳເອົາຜ້າອັດປາກ-ດັງ 200.000 ອັນ ມູນຄ່າ 60.000 ໂດລາສະຫະລັດ ຫຼື ປະມານ 537 ລ້ານກີບ ໄປມອບໃຫ້ຫ້ອງວ່າການສູນກາງພັກ ເພື່ອນຳໃຊ້ໃນການປ້ອງກັນ ຄວບຄຸມ ແລະ ສະກັດກັ້ນການແຜ່ລະບາດຂອງພະຍາດ COVID-19 ຢູ່ ສປປ ລາວ.
ພິທີມອບ-ຮັບເຄື່ອງຊ່ວຍເຫຼືອຄັ້ງນີ້ ຈັດຂຶ້ນວັນທີ 30 ເມສາ 2020 ຢູ່ຫ້ອງວ່າການສູນກາງພັກ ເຊິ່ງຕາງໜ້າມອບໂດຍທ່ານ ຊຸນຫົງເຖົາ ປະທານບໍລິສັດ ຈີດີບໍ່ແຮ່ຈຳກັດ ແລະ ຮັບໂດຍທ່ານ ທອງສະລິດ ມັງໜໍ່ເມກ ຫົວໜ້າຫ້ອງວ່າການສູນກາງພັກ ໂດຍມີທ່ານ ຈ່ຽງ ຈ້າຍຕົງ ເອກອັກຄະລັດຖະທູດ ສປ ຈີນ ປະຈຳ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂອກາດນີ້ ທ່ານ ທອງສະລິດ ມັງໜໍ່ເມກ ກໍໄດ້ສະແດງຄວາມຂອບໃຈມາຍັງ 2 ບໍລິສັດດັ່ງກ່າວ ທີ່ເຫັນຄວາມສຳຄັນໃນວຽກງານການປ້ອງກັນ ຄວບຄຸມ ແລະ ສະກັດກັ້ນການແຜ່ລະບາດຂອງເຊື້ອພະຍາດ COVID-19 ແລະ ປະກອບສ່ວນມອບຜ້າອັດປາກ-ດັງໃຫ້ຄັ້ງນີ້ ເຊິ່ງເຄື່ອງຊ່ວຍເຫຼືອດັ່ງກ່າວ ຫ້ອງວ່າການສູນກາງພັກຈະນຳໄປມອບຕໍ່ໃຫ້ກະຊວງສາທາລະນະສຸກ ອົງການກາແດງລາວ ແລະ ແຂວງໄຊສົມບູນ ເພື່ອນຳໃຊ້ໃນວຽກງານປ້ອງກັນ ຄວບຄຸມ ແລະ ສະກັດກັ້ນການແຜ່ລະບາດຂອງເຊື້ອພະຍາດ COVID-19.
