ໃນວັນທີ 16 ກັນຍາ 2021 ຜ່ານມາ ຊາຈາກສວນຊາ 36 ຈາກ ສປປ ລາວ ໄດ້ຮັບຫຼຽນຄຳ ຫຼື ລາງວັນຊະນະເລີດຈາກການແຂ່ງຂັນຊາໂລກ 2021 (World Tea Championship 2021) ໃນສາຂາຊາແດງ ເຊິ່ງເປັນຜະລິດຕະພັນຊາບູຮານຂອງບໍລິສັດ ລາວ ທີຊິກ ມາເນີ ການຄ້າ ຂາອອກ-ຂາເຂົ້າ ຈໍາກັດຜູ້ດຽວ ພ້ອມກັນນັ້ນ ຍັງຖືກເຊີນເຂົ້າຮ່ວມພິທີມອບລາງວັນ ແລະ ງານວາງສະແດງອຸດສາຫະກໍາຊາໂລກ ທີ່ຈະຈັດຂຶ້ນທີ່ນະຄອນນິວຢອກ ປະເທດສະຫະລັດອາເມຣິກາ ໃນມໍ່ໆນີ້.
![](https://v2.vientianemai.net/wp-content/uploads/2021/09/242346103_397334825113723_6035910082668762167_n.jpg)
ຄະນະກຳມະການຈັດການແຂ່ງຂັນຊາໂລກ ໄດ້ກ່າວໃນຈົດໝາຍວ່າ: “ ສວນຊາ 36 ເຊິ່ງຕັ້ງຢູ່ເມືອງປາກຊ່ອງ ແຂວງຈຳປາສັກ ພາກໃຕ້ຂອງປະເທດລາວ ໄດ້ມີສ່ວນຮ່ວມໃນງານວາງສະແດງຊາສາກົນທຸກປະເພດຢ່າງຫ້າວຫັນ ຄະນະກຳມະການຈັດງານນີ້ ໄດ້ເຫັນ ແລະ ຮັບຮູ້ເຖິງປະຫວັດຂອງສວນຊາ 36 ມາດຕະຖານຂອງຂະບວນການຜະລິດຊາ ຄຸນນະພາບຂອງຊາ ສະພາບແວດລ້ອມທີ່ເປັນເອກະລັກຂອງທ້ອງຖິ່ນລາວ ພາຊະນະບັນຈຸ ແລະ ອື່ນໆ ທີ່ໄດ້ຜ່ານການກວດສອບຢ່າງລະອຽດທີ່ຖ້ວນ ຫຼັງຈາກການພິຈາລະນາຂອງຄະນະກຳມະການ ສຸດທ້າຍ ໄດ້ຕັດສິນໃຫ້ຊາສວນຊາ 36 ຈາກ ສປປ ລາວ ຊະນະລາງວັນຊະນະເລີດໃນສາຂາຊາແດງຂອງການແຂ່ງຂັນຊາໂລກປະຈຳປີ 2021 ”.
![](https://v2.vientianemai.net/wp-content/uploads/2021/09/242228680_905257566747796_4783109587433614164_n.jpg)
ຈາກການລາຍງານວ່າ: ງານວາງສະແດງອຸດສາຫະກຳຊາໂລກ ໄດ້ຈັດຂຶ້ນທຸກປີ ຕັ້ງແຕ່ປີ 2003 ແລະ ເປັນໜຶ່ງໃນ 50 ງານວາງສະແດງສາກົນທີ່ສຳຄັນຢູ່ໃນອາເມຣິກາເໜືອ.
![](https://v2.vientianemai.net/wp-content/uploads/2021/09/242260973_1996305767200989_8590984806098560732_n.jpg)
ງານດັ່ງກ່າວ ດຶງດູດຜູ້ນຳສິນຄ້າມາວາງສະແດງຫຼາຍຮ້ອຍຄົນ ແລະ ດຶງດູດຊ່ຽວຊານຫຼາຍກວ່າ 5.000 ຄົນ ຈາກຫຼາຍກວ່າ 50 ປະເທດ ແລະ ພາກພື້ນໃນແຕ່ລະປີ ເຮັດໃຫ້ງານວາງສະແດງອຸດສາຫະກຳຊາໂລກ ກາຍເປັນງານວາງສະແດງພິເສດຂອງອຸດສາຫະກໍາຊາສາກົນທີ່ມີຈໍານວນປະເທດເຂົ້າຮ່ວມຫຼາຍທີ່ສຸດໃນໂລກ.
![](https://v2.vientianemai.net/wp-content/uploads/2021/09/242258946_1253454895096860_7486326064602817652_n-1024x696.jpg)
ງານດັ່ງກ່າວ ໄດ້ຮັບການສະໜັບສະໜູນຈາກງານວາງສະແດງຊາໂລກ ແລະ ຮ່ວມຈັດໂດຍມູນນິທິ Desert Oasis ທີ່ຈະຈັດຂຶ້ນທີ່ນະຄອນນິວຢອກ ແລະ ເມືອງອື່ນໆໃນສະຫະລັດອາເມຣິກາ.
![](https://v2.vientianemai.net/wp-content/uploads/2021/09/242258610_387808046118452_3102743087954610132_n.jpg)
ໃນງານວາງສະແດງສິນຄ້າຈີນ-ອາຊຽນ ຄັ້ງທີ 18 ທີ່ຈັດຂຶ້ນຢູ່ນະຄອນໜານໜິງ ເຂດປົກຄອງຕົນເອງກວາງຊີ ສປ ຈີນ ໃນວັນທີ 10 ກັນຍາ 2021 ຜ່ານມາ ບໍລິສັດ ສວນຊາ 36 ກໍໄດ້ນໍາຜະລິດຕະພັນຊາຂອງລາວເຮົາເຂົ້າຮ່ວມວາງສະແດງອີກດ້ວຍ.
![](https://v2.vientianemai.net/wp-content/uploads/2021/09/242308874_421815632836777_6213776348951792612_n.jpg)