ທ່ານ ລັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຖະແຫຼງຂ່າວຕໍ່ສື່ມວນຊົນໃນວັນທີ 30 ເມສາ 2020 ທີ່ສູນປະຕິບັດຄະນະສະເພາະກິດຄວບຄຸມພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (Covid-19) ວ່າ: ສະພາບການເຝົ້າລະວັງ COVID-19 ຢູ່ ສປປ ລາວ ຮອດ 17:00 ໂມງຂອງວັນທີ 29 ເມສາ 2020 ຈຳນວນຜູ້ເດີນທາງເຂົ້າມາມີທັງໝົດ 1.797 ຄົນ ຈຸດຜ່ານດ່ານລາວ-ໄທ ທັງໝົດ 971 ຄົນ ທັງໝົດແມ່ນຜູ້ຂັບລົດຂົນສົ່ງສິນຄ້າ ຈຸດຜ່ານດ່ານລາວ-ຈີນ ທັງໝົດ 186 ຄົນ ທັງໝົດແມ່ນຜູ້ຂັບລົດຂົນສົ່ງສິນຄ້າ ຈຸດຜ່ານດ່ານລາວ-ຫວຽດທັງໝົດ 640 ຄົນ ທັງໝົດແມ່ນຜູ້ຂັບລົດຂົນສົ່ງສິນຄ້າ ຈຳນວນຜູ້ເດີນທາງຜ່ານສະໜາມບິນສາກົນວັດໄຕ 0 ຄົນ ໃນທຸກດ່ານແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້.
ການເຝົ້າລະວັງ ແລະ ວິເຄາະ ໃນວັນທີ 29 ເມສາ 2020 ໄດ້ເກັບຕົວຢ່າງມາກວດທັງໝົດ 10 ຄົນ ໃນນັ້ນ ຜູ້ມີອາການສົງໄສມາກວດຢູ່ໂຮງໝໍ 8 ຄົນ ເກັບຕົວຢ່າງຜູ້ຕິດເຊື້ອມາກວດຄືນ 2 ຄົນ ແລະ ແຮງງານລາວທີ່ກັບມາຈາກປະເທດໄທ 0 ຄົນ ໃນຈຳນວນຜູ້ມີອາການສົງໄສ 8 ຄົນ ຈາກນະຄອນຫຼວງວຽງຈັນ 6 ຄົນ ຈຳປາສັກ 1 ຄົນ ແລະ ບໍລິຄຳໄຊ 1 ຄົນ ເຊິ່ງຜົນກວດທັງໝົດ 10 ຄົນ ບໍ່ພົບເຊື້ອ ໝາຍຄວາມວ່າໃນວັນທີ 29 ເມສາ 2020 ບໍ່ມີກໍລະນີໃໝ່ ນັບແຕ່ເດືອນມັງກອນ ຮອດວັນທີ 29 ເມສາ 2020 ໄດ້ເກັບຕົວຢ່າງມາກວດທັງໝົດ ມີ 1.927 ຕົວຢ່າງ ກວດພົບເຊື້ອສະສົມ 19 ຄົນ (18 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ).
ການຕິດຕາມປີ່ນປົວຄົນເຈັບຢູ່ໂຮງໝໍ ປັດຈຸບັນມີຜູ້ຕິດເຊື້ອນອນຕິດຕາມປິ່ນປົວຢູ່ໂຮງໝໍແຕ່ 11 ຄົນ ທີ່ນອນປິ່ນປົວຢູ່ທັງໝົດມີອາການເບົາບາງ ຍັງຕິດຕາມເພື່ອກວດວິເຄາະຢັ້ງຢືນການບໍ່ພົບເຊື້ອ ຈຶ່ງໃຫ້ອອກໂຮງໝໍ.
ສຳລັບການຕິດຕາມສະພາບການລະບາດຂອງປະເທດໃກ້ຄຽງ ແລະ ສະພາບການລະບາດຢູ່ໃນທົ່ວໂລກ ເຫັນວ່າ: ມາຮອດເວລາ 6:00 ໂມງເຊົ້າຂອງວັນທີ 30 ເມສາ 2020 ທົ່ວໂລກມີການລາຍງານການລະບາດທັງໝົດ 210 (ປະເທດ/ເຂດ) ມີການຢັ້ງຢືນຜູ້ຕິດເຊື້ອພະຍາດ COVID-19 ແມ່ນ 3.208.509 (72.001 ໃໝ່) ເສຍຊິວິດ 227.549 (6.082 ໃໝ່) ປີ່ນປົວຫາຍດີ 997.178 (45.745 ໃໝ່) ມີບາງປະເທດ ຈຳນວນຜູ້ຕິດເຊື້ອມື້ດຽວມີເຖິງ 21.758 ຄົນ ແລະ ເສຍຊີວິດ 2.083 ຄົນຕໍ່ມື້ ອັດຕາຄວາມຮ້າຍແຮງຂອງມື້ນີ້ ແມ່ນເພິ່ມຂຶ້ນ 7,09% (ມື້ວານນີ້ 6.93 %).
ສະເພາະກຸ່ມປະເທດອາຊຽນກໍເຫັນວ່າມີການຜ່ອນຄາຍລົງ ແຕ່ຍັງມີບາງປະເທດທີ່ມີອັດຕາການຕິດເຊື້ອ ແລະ ເສຍຊີວິດສູງຢູ່ ມີບາງປະເທດຕິດເຊື້ອໃໝ່ໃນວັນທີ 30 ເມສາ 2020 ນີ້ ເຖິງ 690 ຄົນ ແລະ ເສຍຊີວິດໃນມື້ດຽວຢູ່ກຸ່ມປະເທດອາຊຽນ ເຖິງ 40 ຄົນ.
ແນວໃດກໍຕາມ ພວກເຮົາຍັງຈະໄດ້ສືບຕໍ່ປະຕິບັດຄຳສັ່ງເລກທີ 06/ນຍ ນີ້ ຈົນກວ່າຈະຮອດວັນທີ 3 ພຶດສະພາ 2020 ສະນັ້ນ ຈຶ່ງຮຽກຮ້ອງໃຫ້ພໍ່ແມ່ປະຊາຊົນບັນດາເຜົ່າ ອົງການຈັດຕັ້ງທຸກພາກສ່ວນ ຈົ່ງຮ່ວມມືກັນຈັດຕັ້ງປະຕິບັດໃຫ້ຖຶກຕ້ອງ ແລະ ເຂັ້ມງວດ ເພື່ອສະກັດກັ້ນບໍ່ໃຫ້ມີການລະບາດຄືນຄັ້ງທີ 2.
ບັນດາທ່ານໄດ້ຮັບຮູ້ຂໍ້ມູນຂ່າວສານສະພາບການລະບາດຂອງພະຍາດ ໂຄວິດ 19 ຢູ່ປະເທດເຮົາແລ້ວ ຂໍໃຫ້ບັນດາທ່ານຈົ່ງພ້ອມກັນປ້ອງກັນຕົນເອງ, ປ້ອງກັນຄອບຄົວ ແລະ ຜູ້ທີ່ຮັກແພງ ໃກ້ຊິດກັບບັນດາທ່ານຈາກການຕິດເຊື້ອພະຍາດ ໂຄວິດ 19 ຖືວ່າແມ່ນພັນທະ ແລະ ຄວາມຮັບຜິດຊອບຂອງບັນດາທ່ານ ແລະ ເປັນການປະກອບສ່ວນອັນສຳຄັນໃຫ້ແກ່ປະເທດຊາດ ເພື່ອຜ່ານວິກິດຂອງການລະບາດພະຍາດໂຄວິດ 19. ຖ້າວ່າບັນດາທ່ານ ຫຼື ຄົນໃນຄອບຄົວຂອງທ່ານມີອາການຄ້າຍຄືໄຂ້ຫວັດ ຫຼື ອາການອື່ນໆຜິດປົກກະຕິ ຂໍໃຫ້ມາກວດນຳແພດໝໍຢູ່ໂຮງໝໍ ບໍ່ໃຫ້ຢ້ານວ່າຈະມາຕິດເຊື້ອ ໂຄວິດ 19 ຢູ່ໂຮງໝໍ ເພາະວ່າ ແຕ່ລະໂຮງໝໍມີການຈັດສັນລະບົບ ຄັດແຍກຜູ້ສົງໃສເປັນພະຍາດ ໂຄວິດ 19 ແລະ ຜູ້ເຈັບເປັນທົ່ວໄປອອກຈາກກັນເປັນເຂດໜຶ່ງສະເພາະ.