ບໍລິສັດ ລັດວິສາຫະກິດຫວຍພັດທະນາ ໄດ້ປະກອບສ່ວນສະໜັບສະໜູນອຸປະຖຳສະມາຄົມຄົນພິການແຫ່ງຊາດລາວ ເປັນເງິນ 5 ລ້ານກີບ ເພື່ອເປັນຄ່າໃຊ້ຈ່າຍຊື້ອຸປະກອນລໍ້ເລື່ອນ ລໍ້ຍູ້ ອຸປະກອນການສຶກສາ ຄ່າໃຊ້ຈ່າຍເວລາເຈັບເປັນປິ່ນປົວນອນໂຮງໝໍ ແລະ ໃຊ້ໃນການເຜີຍແຜ່ຂໍ້ມູນຂ່າວສານວຽກງານການພັດທະນາຄົນພິການ ລວມທັງການບໍລິຫານພາຍໃນອົງກອນຂອງສະມາຄົມຄົນພິການແຫ່ງຊາດລາວ.
ພິທີມອບ ຈັດຂຶ້ນທ້າຍເດືອນສິງຫາ 2021 ທີ່ບໍລິສັດ ລັດວິສາຫະກິດຫວຍພັດທະນາ ສໍານັກງານໃຫຍ່ຕັ້ງຢູ່ບ້ານທົ່ງຂັນຄຳ ເມືອງຈັນທະບູລີ ນະຄອນຫຼວງວຽງຈັນ ກ່າວມອບໂດຍທ່ານ ນາງ ແກ້ວຄູນມີ ກົມມະເມືອງ ຮອງຜູ້ອຳນວຍການບໍລິສັດ ລັດວິສາຫະກິດຫວຍພັດທະນາ ແລະ ກ່າວຮັບໂດຍທ່ານ ສຳນຽງ ທຳມະວົງ ຜູ້ອຳນວຍການສະມາຄົມຄົນພິການແຫ່ງຊາດລາວ ມີພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ທ່ານ ນາງ ແກ້ວຄູນມີ ກົມມະເມືອງ ໄດ້ກ່າວວ່າ: ບໍລິສັດ ລັດວິສາຫະກິດຫວຍພັດທະນາ ເປັນທຸລະກິດຂອງລັດ ແລະ ກໍເປັນຫົວໜ່ວຍທຸລະກິດໜຶ່ງ ໃນຜ່ານມາໄດ້ປະກອບສ່ວນຢ່າງຕັ້ງໜ້າໃນການຊ່ວຍເຫຼືອສັງຄົມລາວ ໂດຍການບິແບ່ງເອົາຜົນກຳໄລທີ່ໄດ້ຈາກການດຳເນີນທຸລະກິດໄປຊ່ວຍເຫຼືອ ແລະ ການຊ່ວຍເຫຼືອສະມາຄົມຄົນພິການແຫ່ງຊາດລາວຄັ້ງນີ້ ກໍເປັນການປະກອບສ່ວນ ເຖິງວ່າມູນຄ່າມັນບໍ່ຫຼວງຫຼາຍ ແຕ່ກໍເປັນນໍ້າຈິດນໍ້າໃຈຂອງຜູ້ບໍລິຫານ ແລະ ພະນັກງານຂອງບໍລິສັດ ແລະ ໂອກາດໜ້າ ຖ້າມີເງື່ອນໄຂ ຈະສືບຕໍ່ໃຫ້ການຊ່ວຍເຫຼືອຕື່ມອີກ.
ໂອກາດນີ້ ທ່ານຜູ້ອຳນວຍການສະມາຄົມຄົນພິການແຫ່ງຊາດລາວ ໄດ້ສະແດງຄວາມຂອບອົກຂອບໃຈມາຍັງບໍລິສັດ ລັດວິສາຫະກິດຫວຍພັດທະນາ ທີ່ໄດ້ປະກອບສ່ວນຊ່ວຍເຫຼືອສະມາຄົມຄັ້ງນີ້ ແລະ ຈະໃຊ້ເງິນດັ່ງກ່າວຢ່າງຖືກເປົ້າໝາຍ ແລະ ມີປະສິດທິຜົນສູງສຸດ.
# ຂ່າວ – ຮູບ: ສົມສະຫວັນ