ໃນຕອນເຊົ້າຂອງວັນທີ 28 ເມສາ 2020 ທີ່ສຳນັກງານນາຍົກລັດຖະມົນຕີ ໄດ້ຈັດກອງປະຊຸມນາຍົກ-ຮອງນາຍົກລັດຖະມົນຕີ ເພື່ອປຶກສາຫາລືກ່ຽວກັບວຽກງານສະກັດກັ້ນ ຄວບຄຸມ ແລະ ແກ້ໄຂການແຜ່ລະບາດຂອງໂຄວິດ 19 ແລະ ການແກ້ໄຂຜົນກະທົບທາງດ້ານເສດຖະກິດຈາກການລະບາດຂອງພະຍາດ COVID-19 ໂດຍການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ມີບັນດາທ່ານຮອງນາຍົກລັດຖະມົນຕີ ບັນດາທ່ານ ລັດຖະມົນຕີກະຊວງກ່ຽວຂ້ອງ ຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ແລະ ຄະນະສະເພາະກິດດ້ານເສດຖະກິດ ເພື່ອແກ້ໄຂຜົນກະທົບຈາກການແຜ່ລະບາດຂອງພະຍາດ COVID-19 ເຂົ້າຮ່ວມ.
ກອງປະຊຸມ ໄດ້ພິຈາລະນາ ແລະ ມີທິດຊີ້ນຳຕໍ່ບັນຫາສຳຄັນ ດັ່ງນີ້:
ກອງປະຊຸມ ໄດ້ພິຈາລະນາບົດລາຍງານກ່ຽວກັບສະພາບການປ້ອງກັນ ຄວບຄຸມ ແລະ ມາດຕະການຮັບມືການລະບາດຂອງພະຍາດ COVID-19 ທິດທາງໃນຕໍ່ໜ້າ ການປະເມີນຄວາມສ່ຽງແຕ່ລະແຂວງ ແຜນການຜ່ອນຜັນບາງມາດຕະການ ແລະ ການສືບຕໍ່ປະຕິບັດບາງມາດຕະການ ພາຍຫຼັງວັນທີ 03 ພຶດສະພາ 2020 ໂດຍຈະຈັດຕັ້ງປະຕິບັດເປັນແຕ່ລະໄລຍະ ເປັນຕົ້ນ ການອະນຸຍາດໃຫ້ສຳນັກງານ, ອົງການ ບັນດາບໍລິສັດ ເປີດດຳເນີນການ ການອະນຸຍາດໃຫ້ປະຊາຊົນ ພະນັກງານ-ລັດຖະກອນ ທະຫານຕຳຫຼວດ ສາມາດອອກຈາກເຮືອນ ແລະ ເດີນທາງພາຍໃນແຂວງ ໂດຍຮັບປະກັນມາດຕະການປ້ອງກັນການຕິດເຊື້ອ ການຈັດຝຶກອົບຮົມ ການປະຊຸມທາງການ ກິດຈະກຳທາງສາສະໜາ ແລະ ກິດຈະກຳອື່ນໆ ການອະນຸຍາດໃຫ້ເປີດດຳເນີນກິດຈະການຂອງບັນດາບໍລິສັດ ໂຮງງານ ແລະ ໂຄງການໃຫຍ່ທີ່ປະຕິບັດຖືກຕ້ອງສອດຄ່ອງຕາມເງື່ອນໄຂ ແລະ ມາດຕະການປ້ອງກັນ ຕາມຂໍ້ແນະນຳຂອງ ຄະນະສະເພາະກິດ ເລກທີ 031/ສພກ ການສືບຕໍ່ປິດບາງກິດຈະການ ການເປີດໂຮງຮຽນ ການປິດດ່ານຊາຍແດນ ແລະ ອື່ນໆ.
ກອງປະຊຸມ ສະແດງຄວາມຊົມເຊີຍຕໍ່ຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງເຊື້ອພະຍາດ COVID-19 ແລະ ທຸກພາກສ່ວນທີ່ກ່ຽວຂ້ອງ ທີ່ໄດ້ເອົາໃຈໃສ່ປະຕິບັດວຽກງານຂອງຕົນ ດ້ວຍຄວາມຮັບຜິດຊອບສູງ ແລະ ໄດ້ສຸມໃສ່ຄົ້ນຄວ້າກະກຽມມາດຕະການຕ່າງໆທີ່ຈະປະຕິບັດພາຍຫຼັງວັນທີ 03 ພຶດສະພາ 2020. ພ້ອມກັນນີ້ ກອງປະຊຸມໄດ້ຊີ້ນຳໃຫ້ຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງເຊື້ອພະຍາດ COVID-19 ປັບປຸງລາຍງານດັ່ງກ່າວໃຫ້ມີເນື້ອໃນລະອຽດ ຄົບຖ້ວນ ຈະແຈ້ງ ຕາມການປະກອບຄຳເຫັນຂອງກອງປະຊຸມ ໂດຍສະເພາະກ່ຽວກັບການປະເມີນຄວາມສ່ຽງ ທິດທາງໃນຕໍ່ໜ້າ ໃຫ້ກຳນົດ ລະອຽດຊັດເຈນ ບໍ່ໃຫ້ມີຊ່ອງຫວ່າງໃນການຕີຄວາມໝາຍ ບັນດາມາດຕະການຜ່ອນຜັນຊົ່ວຄາວ ທີ່ຈະຈັດຕັ້ງປະຕິບັດພາຍຫຼັງວັນທີ 03 ພຶດສະພາ 2020 ໂດຍກຳນົດເປັນແຕ່ລະໄລຍະ ໃນເງື່ອນໄຂບໍ່ມີກໍລະນີຕິດເຊື້ອໃໝ່ ແລະ ມາດຕະການຈະສືບຕໍ່ປະຕິບັດ ຖ້າມີກໍລະນີຕິດເຊື້ອໃໝ່ເກີດຂຶ້ນ. ຫຼັງຈາກນັ້ນ ນຳສະເໜີລາຍງານຕໍ່ກອງປະຊຸມກົມການເມືອງສູນກາງພັກພິຈາລະນາ ແລະ ມີທິດຊີ້ນຳໃນຂັ້ນຕໍ່ໄປ.
ກອງປະຊຸມ ໄດ້ພິຈາລະນາຮ່າງບົດລາຍງານກ່ຽວກັບມາດຕະການ ແກ້ໄຂຜົນກະທົບທາງດ້ານເສດຖະກິດ ຈາກການແຜ່ລະບາດເຊື້ອພະຍາດ COVID-19 ໂດຍລົງເລິກບາງນະໂຍບາຍ ແລະ ມາດຕະການທີ່ຍັງບໍ່ທັນໄດ້ກຳນົດອອກຢ່າງຊັດເຈນ ຕາມການຊີ້ນຳຂອງກອງປະຊຸມລັດຖະບານຄັ້ງວັນທີ 23 ເມສາ 2020 ເປັນຕົ້ນ ນະໂຍບາຍອຸດໜູນແຮງງານ ຢູ່ໃນ ແລະ ນອກລະບົບປະກັນສັງຄົມ ນະໂຍບາຍພາກປະຊາຊົນ ທີ່ຕິດພັນກັບການຫຼຸດຄ່າໄຟຟ້າ ແລະ ນ້ຳປະປາ ການແກ້ໄຂອຸປະສັກການຂົນສົ່ງ ແລະ ຈໍລະຈອນສິນຄ້າພາຍໃນປະເທດ ແລະ ການນຳເຂົ້າ-ສົ່ງອອກສິນຄ້າຢູ່ບັນດາດ່ານຊາຍແດນ ການຊຸກຍູ້ການຜະລິດກະສິກຳ ປູກຝັງ ແລະ ລ້ຽງສັດ ເພື່ອເປັນສະບຽງອາຫານ ແລະ ເປັນສິນຄ້າ ການຟື້ນຟູຂະແໜງການບໍລິການ ແລະ ການທ່ອງທ່ຽວ ນະໂຍບາຍດ້ານການເງິນ ເງິນຕາ ລວມທັງການສົ່ງເສີມທຸລະກິດຂະໜາດນ້ອຍ ແລະ ຂະໜາດກາງ ການແກ້ໄຂໜີ້ສິນຕ່າງປະເທດ ແລະ ຂໍ້ສະເໜີຈຳນວນໜຶ່ງ ຂອງພາກທຸລະກິດ.
ກອງປະຊຸມໄດ້ມີທິດຊີ້ນຳ ໃຫ້ຄະນະສະເພາະກິດດ້ານເສດຖະກິດເພື່ອແກ້ໄຂຜົນກະທົບຈາກການແຜ່ລະບາດຂອງພະຍາດ COVID-19 ສົມທົບກັບພາກສ່ວນກ່ຽວຂ້ອງ ຄົ້ນຄວ້າ ລົງເລິກລາຍລະອຽດບາງຈຸດ ເພື່ອຮັບປະກັນວ່ານະໂຍບາຍທີ່ວາງອອກ ສາມາດຈັດຕັ້ງປະຕິບັດໄດ້ຢ່າງມີປະສິດທິຜົນ ແລ້ວປັບປຸງຮ່າງບົດລາຍງານດັ່ງກ່າວ ຕາມການປະກອບຄຳເຫັນຂອງກອງປະຊຸມໃຫ້ມີເນື້ອໃນ ກະທັດຮັດ ຄົບຖ້ວນ ແລະ ຈະແຈ້ງ ເພື່ອນຳສະເໜີຕໍ່ກອງປະຊຸມກົມການເມືອງສູນກາງພັກ ພິຈາລະນາ ແລະ ມີທິດຊີ້ນຳໃນຂັ້ນຕໍ່ໄປ.