ເປີດນຳໃຊ້ແອັບ what’s Up laos ແລະ ບົດເພງລາວທ່ຽວລາວ

ພິທີເປີດນຳໃຊ້ແອັບ what’s Up laos ແລະ ບົດເພງລາວທ່ຽວລາວ ຈັດຂຶ້ນວັນທີ 26 ສິງຫາ 2021 ທີ່ໂຮງແຮມແລນມາກ ແມ່ຂອງລີເວີໄຊ ເປັນກຽດເຂົ້າຮ່ວມຂອງທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວ ທ່ານ ຄຳແສງ ພິນິດ ຜູ້ແຕ່ງບົດເພງລາວທ່ຽວລາວພ້ອມດ້ວຍຂະແໜງການກ່ຽວຂ້ອງເຂົ້າຮ່ວມ.

ທ່ານນາງ ຈັນທະຈອນ ວົງໄຊ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ກ່າວວ່າ: ເພື່ອເປັນການເຜີຍແຜ່ຂໍ້ມູນກ່ຽວກັບການໃຊ້ງານຂອງແອັບພລີເຄເຊິນ (what’s Up laos) ຄຸນສົມບັດຂອງແອັບ ແລະ ກິດຈະກຳການທ່ອງທ່ຽວທີ່ຈະເກີດຂຶ້ນໃນປະເທດລາວ ໂດຍຈະໄດ້ຮວບຮວມເອົາບັນດາຂະແໜງອຸດສາຫະກຳທີ່ປິ່ນອ້ອມການທ່ອງທ່ຽວເຊັ່ນ: ຮ້ານອາຫານ ໂຮງແຮມ ສະຖານທີ່ທ່ອງທ່ຽວ ແລະ ການບໍລິການຕ່າງໆເຂົ້າໃນ what’s Up laos ປັດຈຸບັນ ມີຜູ້ສະໝັກ 200 ກວ່າຫົວໜ່ວຍ ຄາດວ່າຮອດປີ 2028 ຈະມີຜູ້ສະໝັກ 1.000 ກວ່າຫົວໜ່ວຍ.

ປັດຈຸບັນ ການສົ່ງເສີມການທ່ອງທ່ຽວພາຍໃຕ້ໂຄງການ “ລາວທ່ຽວລາວ” ແມ່ນສືບຕໍ່ເປັນໄລຍະ 2 ໂດຍໄດ້ຈັດຕັ້ງປະຕິບັດນັບແຕ່ເດືອນສິງຫາ 2020 ຫາເດືອນມັງກອນ 2021 ແລະ ສືບຕໍ່ໄລຍະ 2 ນັບແຕ່ເດືອນກຸມພາ 2021 ຫາທ້າຍເດືອນສິງຫາ 2021 ໂດຍໄດ້ຮັບການສະໜັບສະໜູນຈາກໂຄງການທັກສະສຳລັບວຽກງານການທ່ອງທ່ຽວ (ລາວ/029) ເຊິ່ງເປັນທຶນຮ່ວມຂອງລັດຖະບານລາວ ລຸກຊຳບວກ ແລະ ສະວິດ ເຊິ່ງກະຊວງສຶກສາທິການ ແລະ ກີລາ ຮ່ວມກັບອົງການຮ່ວມມືເພື່ອການພັດທະນາລຸກຊຳບວກເປັນຜູ້ຈັດຕັ້ງປະຕິບັດໂຄງການລາວທ່ຽວລາວ ແລະ ໄດ້ສະແດງເຖິງຜົນໄດ້ຮັບທີ່່ດີຕໍ່ກັບການສົ່ງເສີມການໂຄສະນາຜ່ານສື່ອອນລາຍ ແລະ ການພັດທະນາ what’s Up laos ກໍເປັນກິດຈະກຳໜຶ່ງທີ່ນອນໃນວຽກງານສົ່ງເສີມລາວທ່ຽວລາວ ສົ່ງເສີມການຕະຫຼາດອອນລາຍ ທີ່ເປັນຊ່ອງທາງໜຶ່ງຈະຊ່ວຍຟື້ນຟູຂະ ແໜງທີ່ປິ່ນອ້ອມການທ່ອງທ່ຽວ ຈາກຜົນກະທົບການລະບາດຂອງພະຍາດໂຄວິດ-19 ໃນໄລຍະ 2 ໃຫ້ດີຂຶ້ນ what’s Up laos ບໍ່ພຽງແຕ່ເປັນບາດກ້າວທີ່ສຳຄັນໃນການຮັກສາຄວາມນິຍົມຂອງໂຄງການ “ລາວທ່ຽວລາວ” ແຕ່ຍັງຈະເປັນການປູທາງໄປສູ່ໂຄງການໃນພາກພື້ນອີກດ້ວຍ.