ວັນທີ 24 ເມສາ 2020 ຜ່ານມານີ້ ທ່ານພົນຕີ ທອງເຫຼັກ ມັງໜໍ່ເມກ ຮອງລັດຖະມົນຕີກະຊວງປ້ອງກັນຄວາມສະຫງົບ ໄດ້ລົງຊີ້ນຳວຽກງານປ້ອງກັນໄລຍະເຝົ້າລະວັງການແຜ່ລະບາດພະຍາດໂຄວິດ-19 ຢູ່ກອງບັນຊາການ ປກສ ນະຄອນຫຼວງວຽງຈັນ ໂດຍທ່ານກ່າວເນັ້ນໃຫ້ກອງບັນຊາການ ປກສ ນະຄອນຫຼວງວຽງຈັນ ເພີ່ມທະວີໃນການຈັດຕັ້ງປະຕິບັດຄຳສັ່ງ ເລກທີ 06/ນຍ ໃຫ້ເຂັ້ມງວດຂຶ້ນກວ່າເກົ່າ ໂດຍໃຫ້ເອົາໃຈໃສ່ໃນການກວດກາລາດຕະເວນຕາມເສັ້ນທາງ ແລະ ກວດກາການເຂົ້າ-ອອກເມືອງ ໃນຂອບເຂດທີ່ຕົນຮັບຜິດຊອບ ພ້ອມທັງສົມທົບກັບຄະນະສະເພາະກິດ ອົງການປົກຄອງທ້ອງຖິ່ນທຸກຂັ້ນ ແລະ ພາກສ່ວນທີ່ກ່ຽວຂ້ອງ ສືບຕໍ່ໂຄສະນາເຜີຍແຜ່ໃຫ້ປະຊາຊົນເຂົ້າໃຈກ່ຽວກັບຜົນຮ້າຍ ແລະ ຜົນກະທົບຈາກພະຍາດໂຄວິດ-19 ໂດຍສະເພາະຜູ້ທີ່ຖືກກັກກັນຢູ່ເຮືອນ ຢູ່ບ້ານ ຫຼື ສູນ ແລະ ຜູ້ທີ່ໄປ-ມາຫາກັນ ຕ້ອງເຂົ້າໃຈສະພາບການໃຫ້ດີ ບໍ່ໃຫ້ປະໝາດເດັດຂາດ ໄລຍະນີ້ໃຫ້ງົດອອກຈາກບ້ານຈົນເຖິງວັນທີ 03 ພຶດສະພາ 2020 ທຸກຄົນຕ້ອງມີຄວາມຮັບຜິດຊອບຕໍ່ຕົນເອງ ຄອບຄົວ ສັງຄົມ ແລະ ປະເທດຊາດ.
ໂອກາດນີ້ ພັນໂທ ສຸກພະຈັນ ບຸດດາຄຳ ຮັກສາການຫົວໜ້າກອງບັນຊາການ ປກສ ນວ ກໍໄດ້ລາຍງານການຈັດຕັ້ງປະຕິບັດ 10 ແຜນວຽກໃນໄລຍະຜ່ານມາ ໂດຍໄດ້ຍົກໃຫ້ເຫັນດ້ານດີ-ດ້ານອ່ອນ ແລະ ຂໍ້ຄົງຄ້າງໃນການປະຕິບັດໜ້າທີ່ຕາມພາລະບົດບາດທີ່ໄດ້ຮັບຜິດຊອບ ນອກນັ້ນ ບັນດາຄະນະກອງບັນຊາການ ປກສ ນວ ກໍໄດ້ປະກອບຄຳຄິດເຫັນ ໂດຍຍົກໃຫ້ເຫັນບາງບັນຫາທີ່ພົ້ນເດັ່ນ ເປັນຕົ້ນແມ່ນການແກ້ໄຂປາກົດການຫຍໍ້ທໍ້ ການລົງເຮັດບົດບັນທຶກກ່າວເຕືອນຜູ້ທີ່ລະເມີດ ບັນດາຫົວໜ່ວຍທຸລະກິດທີ່ຍັງດື້ດ້ານລະເມີດຄຳສັ່ງ 06/ນຍ.
ຕອນທ້າຍ ພົນຕີ ທອງເຫຼັກ ມັງໜໍ່ເມກ ຮອງລັດຖະມົນຕີກະຊວງ ປກສ ໄດ້ຕາງໜ້າໃຫ້ກະຊວງປ້ອງກັນຄວາມສະຫງົບ ມອບເງິນຈຳນວນ 50 ລ້ານກີບ ແລະ ຜ້າອັດປາກ 50 ກັບ ໃຫ້ ປກສ ນະຄອນຫຼວງວຽງຈັນ ເພື່ອຊຸກຍູ້ການປະຕິບັດໜ້າທີ່ຂອງກຳລັງປ້ອງກັນຄວາມສະຫງົບ ນວ ຕາງໜ້າຮັບໂດຍທ່ານ ພັນໂທ ສຸກພະຈັນ ບຸດດາຄຳ ຮັກສາການຫົວໜ້າກອງບັນຊາການ ປກສ ນວ.
# ຂ່າວ & ພາບ: ຊິລິການດາ