ລັດຖະບານຍີ່ປຸ່ນ ໄດ້ສະໜອງວັກຊີນ Astra Zeneca 616.820 ໂດສ໌ ຜ່ານໂຄງການ COVAX Facility ໃຫ້ແກ່ ລັດຖະບານລາວ ພາຍໃຕ້ການຮ່ວມມືລະຫວ່າງອົງການພັນທະມິດຮ່ວມມືດ້ານນະວັດຕະກໍາເພື່ອຮັບມືກັບພະຍາດລະບາດ ທີ່ເປັນພັນທະມິດວັກຊີນ ອົງການອະນາໄມໂລກ (WHO) ເພື່ອໃຫ້ ສປປ ລາວ ນໍາໃຊ້ເຂົ້າໃນການປະຕິບັດການສັກວັກຊີນປ້ອງກັນພະຍາດໂຄວິດ-19 ແກ່ປະຊາຊົນໃຫ້ໄດ້ 300.000 ກ່ວາຄົນໃນປີ 2021ນີ້ ເພື່ອແນໃສ່ສ້າງຄວາມເຂັ້ມແຂງ ແລະ ປະກອບສ່ວນໃນການຕ້ານພະຍາດດັ່ງກ່າວຂອງ ສປປ ລາວ ມີຜົນສຳເລັດຍິ່ງຂຶ້ນ.
ພິທີມອບ-ຮັບວັກຊິນດັ່ງກ່າວ ໄດ້ຈັດຂຶ້ນວັນທີ 5 ສິງຫາ 2021 ຢູ່ສະໜາມບິນສາກົນວັດໄຕ ເປັນກຽດກ່າວຮັບໂດຍທ່ານ ນາງ ປານີ ຢາທໍ່ຕູ້ ຮອງປະທານປະເທດ ແລະ ກ່າວມອບໂດຍທ່ານ ເຄໂຊ ທາເກວະກະ ເອກອັກຄະລາຊະທູດຍີ່ປຸ່ນ ປະຈໍາລາວ ມີທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ປານີ ຢາທໍ່ຕູ້ ກ່າວວ່າ: ລັດຖະບານແຫ່ງ ສປປ ລາວ ຂໍສະແດງຄວາມຂອບໃຈ ແລະ ຕີລາຄາສູງຕໍ່ການຊ່ວຍເຫຼືອວັກຊີນ Astra Zeneca ຈາກລັດຖະບານ ແລະ ປະຊາຊົນຍີ່ປຸ່ນ ໃຫ້ແກ່ ສປປ ລາວ ໃນຄັ້ງນີ້ ເຊິ່ງເປັນການສະແດງເຖິງຄວາມພະຍາຍາມຂອງລັດຖະບານ ແລະ ປະຊາຊົນຍີ່ປຸ່ນ ເພື່ອຊ່ວຍລັດຖະບານ ແລະ ປະຊາຊົນລາວ ໃນການສະກັດກັ້ນ ແລະ ຄວບຄຸມການແຜ່ລະບາດຂອງພະຍາດໂຄວິດ -19 ຢູ່ ສປປ ລາວ ໃຫ້ກ້າວໄປຂ້າງໜ້າ ແລະ ເຮັດໃຫ້ພວກເຮົາຫຍັບເຂົ້າໃກ້ເປົ້າໝາຍການສັກວັກຊີນກັນພະຍາດໂຄວິດ-19 ໃຫ້ໄດ້ 50% ຂອງຈຳນວນປະຊາກອນໃນທ້າຍປີ 2021 ນີ້.
ລັດຖະບານແຫ່ງ ສປປ ລາວ ຈະນໍາໃຊ້ວັກຊີນຈາກການບໍລິຈາກຄັ້ງນີ້ ເພື່ອສືບຕໍ່ສັກວັກຊີນໃຫ້ແກ່ກຸ່ມບູລິມະສິດ ລວມທັງຜູ້ທີ່ມີອາຍຸ 60 ປີຂຶ້ນໄປ ຜູ້ທີ່ມີພະຍາດປະຈໍາຕົວ ແລະ ພະນັກງານສາທາລະນະສຸກໃນຂອບເຂດທົ່ວປະເທດ ໂດຍສອດຄ່ອງກັບແຜນປະຕິບັດການສັກວັກຊີນກັນພະຍາດໂຄວິດ-19 ແຫ່ງຊາດ ແລະ ເພື່ອສະໜັບສະໜູນເປົ້າໝາຍຂອງລັດຖະບານແຫ່ງ ສປປ ລາວ ໃນການສັກວັກຊີນກັນພະຍາດໃຫ້ໄດ້ 50% ຂອງປະຊາກອນພາຍໃນທ້າຍປີ 2021.
ທ່ານ ເຄໂຊ ທາເກວະກະ ກ່າວຕື່ມວ່າ: “ລັດຖະບານຍີ່ປຸ່ນ ເປັນຜູ້ສະໜັບສະໜູນທີ່ໃກ້ຊິດຂອງລັດຖະບານແຫ່ງ ສປປ ລາວ ໃນການຕອບໂຕ້ກັບພະຍາດໂຄວິດ-19 ເຊິ່ງນັບຕັ້ງແຕ່ການລະບາດຂອງເຊື້ອໂຄວິດ-19 ໃນເບື້ອງຕົ້ນ ໄດ້ສະໜັບສະໜູນ ສປປ ລາວ ດ້ວຍອຸປະກອນປ້ອງກັນສ່ວນຕົວສໍາລັບພະນັກງານແພດໝໍຢູ່ແຖວໜ້າ ແລະ ອຸປະກອນອົກຊີເພື່ອປິ່ນປົວຄົນເຈັບທີ່ຕິດເຊື້ອພະຍາດ ໂຄວິດ-19 ແລະ ໄດ້ຊ່ວຍສ້າງຄວາມເຂັ້ມແຂງດ້ານລະບົບການແພດຕ່າງໆຂອງລາວ ຂ້າພະເຈົ້າຫວັງຢ່າງຍິ່ງວ່າ ການບໍລິຈາກວັກຊີນຄັ້ງນີ້ ຈະຊ່ວຍໃຫ້ ສປປ ລາວ ບັນລຸເປົ້າໝາຍການສັກວັກຊີນມີຜົນສຳເລັດຍິ່ງຂຶ້ນ.
# ຂ່າວ & ພາບ: ລັດເວລາ