ພາຍໃຕ້ຄຳຂວັນ: “ນະວັດຕະກຳ ເພື່ອສ້າງອະນາຄົດສີຂຽວ’’ ເພື່ອສະເຫຼີມສະຫຼອງວັນຊັບສິນທາງປັນຍາໂລກ 26 ເມສາ 2020
ທຸກໆວັນທີ 26 ເມສາ ພວກເຮົາຈະສະເຫຼີມສະຫຼອງວັນຊັບສິນທາງປັນຍາໂລກ ເພື່ອເປັນການເຜີຍແຜ່ໃຫ້ເຫັນເຖິງບົດບາດຂອງສິດຊັບສິນທາງປັນຍາຕໍ່ການສົ່ງເສີມນະວັດຕະກຳ ແລະ ຫົວຄິດປະດິດສ້າງ.
ຄຳຂວັນຂອງວັນຊັບສິນທາງປັນຍາໂລກໃນປີ 2020 ນີ້ ແມ່ນການນຳເອົານະວັດຕະກຳ ແລະ ສິດຂອງຊັບສິນທາງປັນຍາ ໃຫ້ກາຍເປັນໝາກຫົວໃຈໃນການຊຸກຍູ້ຄວາມພະຍາຍາມເພື່ອສ້າງອະນາຄົດສີຂຽວ ເນື່ອງຈາກວ່າການຕັດສິນໃຈຂອງພວກເຮົາໃນມື້ນີ້ຈະເປັນການກຳນົດອະນາຄົດຂອງພວກເຮົາ ໂລກເປັນບ້ານທີ່ພວກເຮົາອາໄສຢູ່ ສະນັ້ນ ພວກເຮົາຕ້ອງຊ່ວຍກັນເບິ່ງແຍງ ແລະ ຮັກສາໂລກໜ່ວຍນີ້.
ຄຳຂວັນຂອງວັນຊັບສິນທາງປັນຍາໂລກໃນປີນີ້ ຍັງເປັນການສັນລະເສີນໃຫ້ແກ່ຜູ້ສ້າງນະວັດຕະກຳ ແລະ ຜູ້ສ້າງສັນຜົນງານທີ່ດີເດັ່ນໃນທົ່ວໂລກ ໃນການຮ່ວມກັນສ້າງອະນາຄົດສີຂຽວ ທຸກຄົນໃນສັງຄົມ ທັງເພດຍິງ ເພດຊາຍ ແລະ ໄວໜຸ່ມທີ່ກຳລັງຊອກຫາທາງເລືອກທີ່ດີ ສະອາດກວ່າການນຳໃຊ້ເຕັກໂນໂລຊີເຊື້ອໄຟຟອດຊີວແບບດັ້ງເດີມ ລະບົບການຄຸ້ມຄອງຊັບພະຍາກອນທຳມະຊາດ ແລະ ອາຫານທີ່ຍືນຍົງກວ່າ ແລະ ຜູ້ທີ່ນຳໃຊ້ລະບົບຊັບສິນທາງປັນຍາເຂົ້າໃນການຜະລິດຂອງຕົນ ເພື່ອນຳເອົາ ແລະ ນຳໃຊ້ເຂົ້າໃນສັງຄົມ.
ພວກເຮົາກຳລັງຊອກຫາວິທີເຮັດໃຫ້ລະບົບຊັບສິນທາງປັນຍາມີຄວາມສົມດຸນ ແລະ ເຂັ້ມແຂງ ເພື່ອສົ່ງເສີມການຂະຫຍາຍຕົວຂອງ ເສດຖະກິດສີຂຽວ ທີ່ຮັກສາ ແລະ ບໍ່ທຳລາຍລະບົບຊັບພະຍາກອນທຳມະຊາດຂອງໂລກ.
ພວກເຮົາຊອກຫາວິທີການນຳໃຊ້ລະບົບສິດທິບັດ ເພື່ອສົ່ງເສີມການປ່ຽນແປງໃໝ່ໃນການພັດທະນາ ແລະ ການເຜີຍແຜ່ເຕັກໂນໂລຊີທີ່ເປັນມິດກັບສິ່ງແວດລ້ອມ ເພື່ອເຂົ້າຊ່ວຍໃນການແກ້ໄຂວິກິດການປ່ຽນແປງຂອງດິນຟ້າອາກາດ ແລະ ສ້າງອະນາຄົດສີຂຽວ.
ການຄິດຄົ້ນໃນການອອກແບບ ແລະ ສິດໃນການປົກປ້ອງແບບລວມເຂົ້າກັນ ເພື່ອເປັນການສົ່ງເສີມການນຳໃຊ້ຊັບພະຍາ ກອນທຳມະຊາດຢ່າງຄຸ້ມຄ່າ ແລະ ຊ່ວຍໃຫ້ນັກອອກແບບສາມາດນຳໃຊ້ເວລາ ແລະ ຄວາມສາມາດຂອງເຂົາເຈົ້າເຂົ້າໃນການສ້າງ ຜະລິດຕະພັນທີ່ເປັນປະໂຫຍດ ໜ້າສົນໃຈ ແລະ ເປັນມິດກັບສິ່ງແວດລ້ອມໃຫ້ແກ່ຜູ້ບໍລິໂພກ.
ພວກເຮົາພິຈາລະນາຊອກຫາວິທີການນຳໃຊ້ເຄື່ອງໝາຍການຄ້າ ແລະ ການບົ່ງຊີ້ຕ່າງໆ ເພື່ອຊ່ວຍຊຸກຍູ້ການຂະຫຍາຍຕົວ ແລະ ຈະເລີນເຕີບໂຕຂອງທຸລະກິດທີ່ມີພື້ນຖານໃນການຮັກສາສິ່ງແວດລ້ອມ ເພື່ອສົ່ງເສີມພວກເຂົາໃຫ້ສາມາດຜະລິດສິນຄ້າ ແລະ ການບໍລິການທີ່ເປັນມິດກັບສິ່ງແວດລ້ອມໃຫ້ຫຼາຍຂຶ້ນ.
ພວກເຮົາເຫັນວ່າສິດທິຕ່າງໆ ເຊັ່ນ: ການພັດທະນາສິນຄ້າຖິ່ນກຳເນິດ ເປັນການຊຸກຍູ້ສົ່ງເສີມການນຳໃຊ້ຊັບພະຍາກອນທຳມະຊາດແບບຍືນຍົງ ແລະ ສິດຂອງນັກປັບປຸງພັນພືດໃໝ່ ຊ່ວຍເປັນກຳລັງແຮງທີ່ສຳຄັນໃນການສົ່ງເສີມພັດທະນາພືດໃຫ້ທົນທານຫຼາຍຂຶ້ນ ເພື່ອຮອງຮັບຄວາມໝັ້ນຄົງດ້ານສະບຽງອາຫານຂອງໂລກ.
ພວກເຮົາຍັງສັງເກດເຫັນວ່າ ນັກປະດິດຄິດແຕ່ງຜູ້ທີ່ນຳໃຊ້ລະບົບຂອງລິຂະສິດ ສາມາດຫາລ້ຽງຊີບໄດ້ຈາກຜົນງານຂອງພວກເຂົາ ຊຶ່ງມີບົດບາດສຳຄັນໃນການສ້າງວິໄສທັດແຫ່ງອານາຄົດສີຂຽວ ແລະ ຜົນປະໂຫຍດຢ່າງຫຼວງຫຼາຍທີ່ບໍ່ສາມາດພັນລະນາ ແລະ ນັບໄດ້.
ດັ່ງຄຳເວົ້າຂອງ ທ່ານ ໄອສຕາຍ (Einstein) ໄດ້ກ່າວໄວ້ວ່າ: ພວກເຮົາບໍ່ສາມາດເຮັດສິ່ງດຽວຊ້ຳໄປຊ້ຳມາ ແລະ ຄາດຫວັງໃຫ້ໄດ້ຜົນຮັບທີ່ແຕກຕ່າງກັນໄດ້ ຖ້າພວກເຮົາຕ້ອງການຜົນຮັບທີ່ແຕກຕ່າງ ພວກເຮົາຕ້ອງມີນະວັດຕະກຳໃນວິທີການຄິດ ຂະບວນການຜະລິດ ແລະ ຮູບແບບທຸລະກິດຂອງພວກເຮົາ ພວກເຮົາມີຄວາມຮັບຜິດຊອບຕໍ່ທາງເລືອກທີ່ພວກເຮົາເລືອກໃນທຸກໆມື້ ຜະລິດຕະພັນທີ່ພວກເຮົາຊື້ ການວິໄຈທີ່ເຮົາໃຫ້ທຶນສະໜັບສະໜູນ ບໍລິສັດທີ່ເຮົາສະໜັບສະໜູນ ນະໂຍບາຍ ແລະ ກົດໝາຍທີ່ເຮົາສ້າງ ຈະເປັນໂຕກຳນົດອະນາຄົດສີຂຽວຂອງພວກເຮົາ. ດ້ວຍນະວັດຕະກຳແຫ່ງຫົວຄິດປະດິດສ້າງ ແລະ ຍຸດທະສາດການນຳໃຊ້ສິດຂອງຊັບສິນທາງປັນຍາ ກໍສາມາດເອື້ອມມືເຖິງອະນາຄົດທີ່ຍືນຍົງ ເຂົ້າມາຮ່ວມກັບພວກເຮົາໃນການຄົ້ນຫາບົດບາດຂອງນະວັດຕະກຳ ແລະ ສິດຂອງຊັບສິນທາງປັນຍາໃນການເປີດເສັ້ນທາງສູ່ອະນາຄົດສີຂຽວ ແບ່ງປັນນະວັດຕະກຳສີຂຽວທີ່ທ່ານມັກ ແລະ ບອກພວກເຮົາວ່າທ່ານຈະສົ່ງເສີມຄວາມສາມາດສີຂຽວຂອງທ່ານຄືແນວໃດ.