ຄະນະສະເພາະກິດ ເພື່ອຄວບຄຸມ ປ້ອງກັນ ຕ້ານ ສະກັດກັ້ນການແຜ່ລະບາດພະຍາດໂຄວິດ-19 ເມືອງຫາດຊາຍຟອງ ນະຄອນຫຼວງວຽງຈັນ ໄດ້ປະຕິບັດລະບຽບການ ມາດຕະການທາງດ້ານກົດໝາຍ ຕໍ່ຜູ້ທີ່ລະເມີດຂໍ້ຫ້າມຝືນຕໍ່ແຈ້ງການຂອງຂັ້ນເທີງວາງອອກ ກໍຄືແຈ້ງການຂອງຫ້ອງວ່າການສຳນັກງານນາຍົກລັດມົນຕີ ເລກທີ 595/ຫສນຍ ເຊິ່ງໄດ້ລະບຸຢ່າງຊັດເຈນກ່ຽວກັບຂໍ້ມຫ້າມຕ່າງໆ ໃນໄລຍະທີ່ພະຍາດໂຄວິດໄດ້ລະບາດຢ່າງແຮງ ໂດຍບໍ່ອະນຸຍາດໃຫ້ຫົວໜ່ວຍທຸລະກິດກິນດື່ມມີການຈຳໜ່າຍເຫຼົ້າເບຍ ແລະ ຕັ້ງວົງຊຸມແຊວກິນດື່ມສີ່ງມຶນເມົາ ທີ່ມີຜູ້ຄົນເຕົ້າໂຮມເປັນຈຳນວoຫຼາຍ ເຊິ່ງຈະສົ່ງຜົນເຮັດໃຫ້ຂາດສະຕິ ທີ່ສຳຄັນ ເຊື້ອພະຍາດຈະມີການລະບາດເພີ່ມຂື້ນຢ່າງງ່າຍດາຍ ແລະ ໄວທີ່ສຸດ ຖ້າຫາກບໍ່ມີການປ້ອງກັນໃນທາງທີ່ຖືກຕ້ອງ ແລະ ຖ້າຫາກບໍ່ປະຕິບັດຕາມ ກໍຈະຖືກປະຕິບັດມາດຕະການປັບໃໝໃນຂັ້ນເດັດຂາດ
ວັນທີ 13 ກໍລະກົດ 2021 ຄະນະສະເພາະກິດດັ່ງກ່າວ ໄດ້ປະຕິບັດຕາມທິດຊີ້ນຳຂອງເຈົ້າເມືອງຫາດຊາຍຟອງ ແລະ ທິດຊີ້ນຳຂອງຫົວໜ້າ ປກສ ເມືອງ ໃຫ້ອອກກວດກາລາດຕະເວນ ພົບເຫັນ ໃຫ້ເຊີນເອົາຜູ້ກະທຳຝ່າຝືນຂື້ນມາສຶກສາອົບຮົມຢູ່ທີ່ກອງບັນຊາການ ປກສ ເມືອງ ໂດຍສົມທົບກັບຂະແໜງການກ່ຽວຂ້ອງ ໃຫ້ປະຕິບັດລະບຽບ ໃຊ້ມາດຕະການປັບໃໝ.
ຜ່ານມາ ຄະນະສະເພາະກິດໄດ້ແຈ້ງເຕືອນໃຫ້ບັນດາຫົວໜ່ວຍຕ່າງໆຊາບແລ້ວ ແຕ່ພວກກ່ຽວບໍ່ໃຫ້ຄວາມຮ່ວມມືປະຕິບັດຕາມ ມີ 10 ຫົວໜ່ວຍ ຄື: ທ້າວ ສຸລິຍາ ບ້ານແກ້ງປາຢ້າງ ເປີດຮ້ານຂາຍປີ້ງແບ້ ແລະ ດື່ມເບຍໃນຮ້ານມີ 10 ຄົນ ນາງ ຄຳຫຼ້າ ວິລະຫານ ບ້ານໜອງໄຮ ເປີດຮ້ານອາຫານຕາມສັ່ງ ຂາຍ ແລະ ດື່ມເບຍໃນຮ້ານມີ 7 ຄົນ ນາງຄຳ ບ້ານດົງໂພສີ ຮ້ານຂາຍເຄື່ອງຍ່ອຍ ຂາຍ ດື່ມເບຍໃນຮ້ານ 5 ຄົນ ນາງ ວຽງໂຂງ ວົງຄຳຈັນ ບ້ານນາໄຫ ຮ້ານຂາຍເຄື່ອງຍ່ອຍ ຂາຍ ດື່ມເບຍໃນຮ້ານ 9 ຄົນ ນາງ ຊົນ ສຸວັນນະລາດ ບ້ານຄວາຍແດງ ເຮືອນບຸກຄົນ ຊຸມແຊວດື່ມເບຍໃນຮ້ານ 7 ຄົນ ທ້າວ ຕາມົນ ບ້ານຄວາຍແດງ ເຮືອນບຸກຄົນ ຈັດງານຜູກແຂນມີ 30-40 ຄົນ ນາງ ນ້ອຍ ແກ້ວແກ່ນຈັນ ບ້ານດົງໂພສີ ຮ້ານອາຫານຕາມສັ່ງ ຂາຍ ພ້ອມດື່ມເບຍໃນຮ້ານ 6 ຄົນ ເຮືອນທ້າວ ສຸພາສິດ ບ້ານຊຽງຄວນ ຈັດງານໝັ້ນຜູກແຂນຜົວ-ເມຍ ມີຜູ້ຄົນ 70-80 ຄົນ ຮ້ານ ປີ້ງເປັດ ທ້າວ ຢັດ ນາງ ທິດ ບ້ານທ່າພະ ຂາຍ ດື່ມເບຍມີ 18 ຄົນ ແລະ ຮ້ານ ບາບີຄິວ ທ້າວ ສອນ ບ້ານທ່າມ່ວງ ຂາຍ ແລະ ດື່ມເບຍມີ 28 ຄົນ
ພວກກ່ຽວທັງໝົດ ໄດ້ລະເມີດຂໍ້ຫ້າມ ແລະ ຝ່າຝືນຕໍ່ລະບຽບແຈ້ງການທີ່ກ່າວມາ ບໍ່ເຫັນຄວາມສໍາຄັນ ແລະ ບໍ່ໃຫ້ການຮ່ວມມືກັບເຈົ້າໜ້າທີ່ໃນການປ້ອງກັນ ຕ້ານ ສະກັດກັ້ນການລະບາດພະຍາດໂຄວິດ ຢູ່ໃນໄລຍະທີ່ບ້ານເມືອງ ກໍຄືປະເທດຊາດທີ່ກຳລັງປະເຊີນໜ້າກັບໂຣກລະບາດທີ່ມີຄວາຍຮ້າຍແຮງຢ່າງໜ້າເປັນຫ່ວງໃນປັດຈຸບັນ.
# ຂ່າວ & ພາບ: ສົມສະຫວັນ