ທ່ານ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ແລະ ທ່ານ ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ ຕາງໜ້າກອງເລຂາຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂພະຍາດອັກເສບປອດ ທີ່ເກີດຈາກເຊື້ອຈຸລະໂຣກສາຍພັນໃໝ່ໂຄວິດ-19 ຮ່ວມກັນຖະແຫຼງຂ່າວປະຈຳວັນທີ 13 ກໍລະກົດ 2021 ຢູ່ກະຊວງສາທາລະນະສຸກ ກ່ຽວກັບການແຜ່ບາດຂອງພະຍາດໂຄວິດ-19 ໃນທົ່ວໂລກ ແລະ ຢູ່ ສປປ ລາວ.
ສະພາບການລະບາດພະຍາດໂຄວິດ-19 ຢູ່ ສປປ ລາວ ມາຮອດວັນທີ 12 ກໍລະກົດ 2021 ທົ່ວປະເທດໄດ້ເກັບຕົວຢ່າງມາກວດວິເຄາະທັງໝົດ 1.623 ຄົນ ໃນນັ້ນ ກວດພົບຜູ້ຕິດເຊື້ອໃໝ່ທັງໝົດ 76 ຄົນ ຈາກນະຄອນຫຼວງວຽງຈັນ 4 ຄົນ ແຂວງຫຼວງນ້ຳທາ 2 ຄົນ ຄຳມ່ວນ 6 ຄົນ ສະຫວັນນະເຂດ 21 ຄົນ ແລະ ແຂວງຈຳປາສັກ 43 ຄົນ ສຳລັບກໍລະນີນຳເຂົ້າມີຈຳນວນ 74 ຄົນ ຈາກນະຄອນຫຼວງວຽງຈັນ 4 ຄົນ ແຂວງຄຳມ່ວນ 6 ຄົນ ສະຫວັນນະເຂດ 21 ຄົນ ແລະ ແຂວງຈຳປາສັກ 43 ຄົນ (ກວດພົບຈາກແຮງງານລາວທີ່ກັບມາຈາກປະເທດເພື່ອນບ້ານ ຕາມຈຸດຜ່ານແດນຕ່າງໆໂດຍຖືກຕ້ອງຕາມກົດໝາຍ) ສ່ວນການຕິດເຊື້ອໃນຊຸມຊົນຈຳນວນ 2 ຄົນຈາກແຂວງຫຼວງນ້ຳທາ 2 ຄົນ (ກໍລະນີທີ່ມີປະຫວັດສຳຜັດໃກ້ຊິດນຳຜູ້ຕິດເຊື້ອເກົ່າ).
ປັດຈຸບັນ ທົ່ວປະເທດມີຈໍານວນຜູ້ຕິດເຊື້ອສະສົມທັງໝົດ 2.901 ຄົນ ເສຍຊີວິດສະສົມ 3 ຄົນ ແລະ ກໍາລັງປິ່ນປົວ 683 ກໍລະນີ ສຳລັບຈຳນວນບ້ານແດງຢູ່ໃນນະຄອນຫຼວງວຽງຈັນ ມີທັງໝົດ 2 ບ້ານ (ບໍ່ມີບ້ານແດງໃໝ່) ໃນ 2 ເມືອງຄື: ບ້ານໂນນສະອາດ ເມືອງໄຊທານີ ແລະ ບ້ານສີເກີດ ເມືອງນາຊາຍ ທອງ ແລະ ບ້ານທີ່ສິ້ນສຸດການເປັນບ້ານແດງມາເປັນບ້ານເຫຼືອງບໍ່ມີ.
ທົ່ວໂລກມີຜູ້ຕິດເຊື້ອໂຄວິດ-19 ສະສົມທັງໝົດ 188.021.553 ຄົນ (ໃໜ່ 366.407 ຄົນ) ເສຍຊີວິດສະສົມ 4.055.117 ຄົນ (ໃໝ່ 5.967 ຄົນ) ແລະ ປີ່ນປົວຫາຍດີ 171.970.184 ຄົນ (ໃໝ່ 376.158 ຄົນ).
# ຂ່າວ & ພາບ: ຊິລິການດາ