ພິທີຮັບມະຫາຊົນກ້າວໜ້າເຂົ້າເປັນສະມາຊິກພັກສໍາຮອງ ເລື່ອນສະມາຊິກພັກສໍາຮອງຂຶ້ນເປັນສະມາຊິກພັກສົມບູນ ແລະ ມອບ-ຮັບໃບຢັ້ງຢືນໜ່ວຍພັກປອດໃສ ເຂັ້ມແຂງ ແລະ ໜັກແໜ້ນ ປະຈໍາປີ 2020 ຈັດຂຶ້ນວັນທີ 13 ກໍລະກົດ 2021 ຢູ່ຫ້ອງວ່າການສໍານັກງານປະທານປະເທດ (ຫສປທ) ມີສະຫາຍ ນາງ ເຂັມມະນີ ພົນເສນາ ກໍາມະການສູນກາງພັກ ເລຂາຄະນະພັກ ຫົວໜ້າ ຫສປທ ມີບັນດາສະຫາຍຄະນະພັກ ຄະນະໜ່ວຍພັກ ສະມາຊິກພັກສົມບູນ ແລະ ສໍາຮອງ ເຂົ້າຮ່ວມ.

ສະຫາຍ ລໍາເງິນ ບູລົມມະວົງ ເລຂາໜ່ວຍພັກກົມບໍລິຫານ ແລະ ຄຸ້ມຄອງ ຫສປທ ກ່າວວ່າ: ແຕ່ລະໜ່ວຍພັກໄດ້ເອົາໃຈໃສ່ຢ່າງຕັ້ງຫນ້າ ຕໍ່ກັບວຽກງານການເມືອງ-ແນວຄິດ ນໍາພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ກໍຄືມະຕິກອງປະຊຸມໃຫຍ່ ຄັ້ງທີ I ຂອງຄະນະພັກຫ້ອງວ່າການປະທານປະເທດ ເປັນເຈົ້າການໃນການປະຕິບັດມະຕິຄໍາສັ່ງ ຄໍາແນະນໍາຕ່າງໆທີ່ຂັ້ນເທິງວາງອອກ ເປັນເຈົ້າການໃນການຊີ້ນໍາ-ນໍາພາສ້າງແຜນການ ຕິດຕາມກວດກາວຽກງານເປັນແຕ່ລະໄລຍະ ສ່ອງແສງລາຍງານປະຈໍາອາທິດ ເພື່ອແກ້ໄຂວຽກງານໃຫ້ທັນເວລາ ປະຕິບັດຫຼັກການລວມສູນປະຊາທິປະໄຕຂອງພັກ ນໍາພາເປັນໝູ່ຄະນະ ມີການແບ່ງວຽກໃຫ້ບຸກຄົນຮັບຜິດຊອບ ປະຕິບັດລະບອບດໍາເນີນຊີວິດການເມືອງປະຈໍາເດືອນຂອງໜ່ວຍພັກ ເປັນເຈົ້າການປະຕິບັດກົດລະບຽບຂອງພັກ ຈັດຕັ້ງນໍາພາປະຕິບັດຕາມພາລະບົດບາດໜ້າທີ່ຄວາມຮັບຜິດຊອບຂອງຕົນ ເອົາໃຈໃສ່ກໍ່ສ້າງ ແລະ ຂະຫຍາຍມະຫາຊົນຜູ້ທີ່ກ້າວໜ້າເພື່ອຂະຫຍາຍເຂົ້າພັກ ເພື່ອເຮັດໃຫ້ພັກມີຄວາມເຂັ້ມແຂງ.


ແນວໃດກໍຕາມ ພະນັກງານ ສະມາຊິກພັກຈໍານວນໜຶ່ງ ຍັງບໍ່ທັນເປັນເຈົ້າການຄົ້ນຄວ້າເຊື່ອມຊຶມບັນດາແນວທາງນະໂຍບາຍຂອງພັກ ລະບຽບກົດໝາຍຕ່າງໆຂອງລັດທີ່ວາງອອກແຕ່ລະໄລຍະ ຄວາມເປັນແບບຢ່າງໃຫ້ແກ່ມະຫາຊົນຍັງບໍ່ທັນໄດ້ດີເທົ່າທີ່ຄວນ ແບບແຜນວິທີເຮັດວຽກບາງຄັ້ງຍັງປົນເປກັນລະຫວ່າງວຽກພັກກັບວຽກລັດ ການສຶກສາອົບຮົມທາງດ້ານແນວຄິດສະມາຊິກພັກ ພະນັກງານ-ລັດຖະກອນ ໄລຍະຜ່ານມາ ເຖິງວ່າໄດ້ເຮັດເປັນປົກກະຕິ ແຕ່ຄວາມເຂົ້າໃຈຕໍ່ເນື້ອໃນທີ່ສໍາຄັນຕ່າງໆຍັງບໍ່ທັນໄດ້ດີ ແລະ ເລິກເຊິ່ງເທົ່າທີ່ຄວນ.
# ຂ່າວ & ພາບ: ສີພອນ