ໄດ້ຮັບການສະໜັບສະໜູນຈາກອົງການພັດທະນາກະສິກໍາ ແລະ ປ່າໄມ້ ພະແນກກະສິກໍາ ແລະ ປ່າໄມ້ ນະຄອນຫຼວງວຽງຈັນ (ນວ) ອົງການປົກຄອງເມືອງຫາດຊາຍຟອງ ແລະ ໂຄງການສົ່ງເສີມການບໍລິຫານຄຸ້ມຄອງທີ່ດີນເຂດດິນບໍລິເວນນໍ້າໜອງຄໍາແສນ ໄດ້ຈັດພິທີປ່ອຍປາ ເນື່ອງໃນໂອກາດວັນປ່ອຍປາ ແລະ ວັນອະນຸຮັກສັດນໍ້າ-ສັດປ່າແຫ່ງຊາດ ວັນທີ 13 ກໍລະກົດ 2021 ທີ່ໜອງຄໍາແສນ ບ້ານສີຖານໃຕ້ ເມືອງຫາດຊາດຟອງ ນວ ມີທ່ານ ບຸນຂວາງ ຄໍາບຸນເຮືອງ ຮອງລັດຖະມົນຕີກະຊວງກະສິກໍາ ແລະ ປ່າໄມ້ ທ່ານ ພູຂົງ ບັນນະວົງ ຮອງເຈົ້າຄອງນະຄອນຫຼວງວຽງຈັນ ທ່ານ ຫຼ້າສາຍ ນວນທາສິງ ຫົວໜ້າພະແນກກະສິກໍາ ແລະ ປ່າໄມ້ ນະຄອນຫຼວງວຽງຈັນ ແລະ ທ່ານ ບຸນເພັງ ສີນະວົງພອນ ເຈົ້າເມືອງຫາດຊາຍຟອງ ນອກນີ້ຍັງມີຜູ້ຕາງໜ້າຈາກກົມ ພະແນກການກ່ຽວຂ້ອງ ຫ້ອງການອ້ອມຂ້າງຕະຫຼອດຮອດພໍ່ແມ່ປະຊາຊົນບ້ານໃກ້ຄຽງເຂົ້າຮ່ວມ.
ໃນປີ 2021 ນະຄອນຫຼວງວຽງຈັນຈະປ່ອຍຄືນສູ່ທໍາມະຊາດປະມານ 2 ລ້ານໂຕ ສະເພາະປ່ອຍປາຢູ່ໜອງຄໍາແສນຄັ້ງນີ້ ມີປະມານ 3 ແສນໂຕ ນອກນີ້ ໃນວັນດຽວກັນ ເມືອງນາຊາຍທອງ ນະຄອນຫຼວງວຽງຈັນ ກໍໄດ້ຈັດພິທີປ່ອຍປາຢູ່ທີ່ອ່າງນໍ້າຊວງ ບ້ານສີວິໄລ ໂດຍມີທ່ານ ວຽງຄໍາ ສີຫາໂຄດ ເຈົ້າເມືອງນາຊາຍທອງ ທ່ານ ພຸດ ອິນທະວົງ ຮອງຫົວໜ້າກົມລ້ຽງສັດ ແລະ ການປະມົງ ກະຊວງກະສິກໍາ ແລະ ປ່າໄມ້ ແລະ ທ່ານ ສີສະຫວັດ ສິນທະວີ ຮອງຫົວໜ້າພະແນກກະສິກໍາ ແລະ ປ່າໄມ້ ນວ ຕະຫຼອດຮອດຫ້ອງການອ້ອມຂ້າງ ອໍານາດການປົກຄອງບ້ານກຸ່ມໂພນທອງ ແລະ ພາກສ່ວນກ່ຽວຂ້ອງເຂົ້າຮ່ວມ ເຊິ່ງປາທີ່ນໍາປ່ອຍຄັ້ງນີ້ ປະກອບມີ ປາປາກ ປານິນ ປາໄນ ແລະ ປາຊະນິດອື່ນໆ ລວມທັງໝົດ 218.000 ໂຕ ທີ່ໄດ້ຮັບການປະກອບສ່ວນຈາກກົມລ້ຽງສັດ ແລະ ການປະມົງ ທີ່ເປັນທຶນສະໜັບສະໜູນຈາກໂຄງການລາວ-ຮົງກາຣີ ເພື່ອພັດທະນາພື້ນຖານໂຄງລ່າງທາງດ້ານກະສິກໍາ 70 ພັນໂຕ ຫ້ອງການກະສິກໍາ ແລະ ປ່າໄມ້ ເມືອງນາຊາຍທອງ 70 ພັນໂຕ ຄະນະຄຸ້ມຄອງການປະມົງ 50 ພັນໂຕ ນອກນັ້ນຍັງມີສູນ ສະຖານີຕ່າງໆອ້ອມຂ້າງ ເມືອງ ແລະ ພໍ່ແມ່ປະຊາຊົນຈໍານວນໜຶ່ງປະກອບສ່ວນ.
# ຂ່າວ & ພາບ: ຂັນທະວີ