ບໍລິສັດລ້ານຊ້າງມີເນໂຣນສ໌ ລິມິເຕັດ (ລຊມລ) ບໍ່ຄຳ-ທອງເຊໂປນ ມອບຜ້າປິດປາກ ເຄື່ອງກວດອຸນຫະພູມຮ່າງກາຍ ນ້ຳຢາລ້າງມື ເຄື່ອງສະເປຢາຂ້າເຊື້ອໄຟຟ້າ ແລະ ນ້ຳຢາຂ້າເຊື້ອ ມູນຄ່າ 142.000.000 ກີບ ໃຫ້ເມືອງວິລະບູລີ ແລະ ແຂວງສະຫວັນນະເຂດ ເພື່ອປ້ອງກັນການລະບາດຂອງເຊື້ອ COVID-19.
ທ່ານ ສະໝານ ອະເນກາ ຜູ້ອຳນວຍການໃຫຍ່ ລຊມລ ກ່າວວ່າ: ລຊມລ ຫວັງເປັນຢ່າງຍິ່ງວ່າອຸປະກອນ-ເຄື່ອງມືເຫຼົ່ານີ້ ຈະປະກອບສ່ວນໃນການຕໍ່ສູ້-ຮັບມືກັບການລະບາດ COVID-19 ແລະ ຈະຊ່ວຍໃຫ້ພະນັກງານແພດໝໍ ປະຊາຊົນເມືອງວິລະບູລີ ແລະ ແຂວງສະຫວັນນະເຂດ ໄດ້ຮັບຄວາມສະດວກຍິ່ງຂຶ້ນ.
ໃນ 2 ເດືອນຜ່ານມາ ເຫັນວ່າການລະບາດຂອງພະຍາດ COVID-19 ໄດ້ແຜ່ລາມຢ່າງວ່ອງໄວໃນ ສປ ຈີນ ແລະ ໃນຫຼາຍກວ່າ 20 ປະເທດໃນໂລກ ບໍລິສັດ ລຊມລ ໄດ້ມອບເງິນ 15.000 ໂດລາສະຫະລັດ ຫຼື ປະມານ 134 ລ້ານກີບ ໃຫ້ກະຊວງພະລັງງານ ແລະ ບໍ່ແຮ່ ເພື່ອປະກອບສ່ວນຮ່ວມທຶນທີ່ສະມາຄົມມິດຕະພາບ ລາວ-ຈີນ ຮ່ວມກັບນະຄອນຫຼວງວຽງຈັນຈັດຂຶ້ນ ເພື່ອລະດົມທຶນໄປຊ່ວຍເຫຼືອຜູ້ປະສົບເຄາະຮ້າຍຈາກພະຍາດ COVID-19 ຢູ່ ສປ ຈີນ ປັດຈຸບັນ ພະຍາດດັ່ງກ່າວໄດ້ແຜ່ລາມໄປຫຼາຍກວ່າ 210 ປະເທດ ມີຜູ້ຕິດເຊື້ອຫຼາຍກວ່າ 1,6 ລ້ານຄົນ ແລະ ພາກຊີວິດຄົນເຮົາຫຼາຍກວ່າ 95.000 ຄົນ ໃນທົ່ວໂລກ.
ລຊມລ ມີຄວາມມຸ່ງໝັ້ນໃນການປົກປ້ອງພະນັກງານ ແລະ ຊຸມຊົນອ້ອມຂ້າງບໍ່ແຮ່ຂອງພວກເຮົາໃຫ້ມີຄວາມປອດໄພ ແລະ ບໍ່ສ່ຽງຕໍ່ການຕິດເຊື້ອພະຍາດ COVID-19 ໂດຍວັນທີ 10 ເມສາ 2020 ໄດ້ມອບອຸປະກອນເຄື່ອງມືປ້ອງກັນພະຍາດ COVID-19 ມູນຄ່າ 97.000.000 ກີບ ໃຫ້ຫ້ອງວ່າການປົກຄອງແຂວງສະຫວັນນະເຂດ ເຊິ່ງມອບໂດຍທ່ານນາງ ລັດສະນີ ສີສານ ຫົວໜ້າພົວພັນກັບລັດຖະບານ ບໍລິສັດ ລຊມລ ແລະ ຮັບໂດຍທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ ແລະ ທ່ານ ພູຂົງ ນາມມະຈັກ ຫົວໜ້າຫ້ອງວ່າການປົກຄອງແຂວງສະຫວັນນະເຂດ ແລະ ວັນທີ 9 ເມສາ 2020 ກໍໄດ້ມອບອຸປະກອນເຄື່ອງມືປ້ອງກັນພະຍາດ COVID-19 ມູນຄ່າ 44.500.000 ກີບ ໃຫ້ຫ້ອງວ່າການປົກຄອງເມືອງວິລະບູລີ ເຊິ່ງມອບໂດຍທ່ານ ພໍ ແຮຣິສ໌ ຜູ້ຈັດການໃຫຍ່ ລຊມລ ແລະ ຮັບໂດຍທ່ານ ຄຳຜຸຍ ສີບຸນເຮືອງ ເຈົ້າເມືອງວິລະບູລີ.