ວັນທີ 7 ເມສາ 2020 ກົງກັບວັນສາທາລະນະສຸກໂລກ ປັດຈຸບັນທີ່ໂລກຂອງເຮົາ ກຳລັງປະເຊີນກັບພາວະສຸກເສີນດ້ານສາທາລະນະສຸກ ທີ່ຮ້າຍແຮງທີ່ສຸດ ອົງການກອງທຶນອະນຸຮັກທຳມະຊາດໂລກ (WWF) ໄດ້ເຜີຍແຜ່ບົດລາຍງານຈາກການສຳຫຼວດທີ່ພົບວ່າມີຫຼາຍກວ່າ 90% ຂອງຜູ້ຕອບແບບສອບຖາມໃນ 3 ປະເທດອາຊີຕາເວັນອອກສຽງໃຕ້ ລວມເຖິງຮົງກົງ ເຫັນດີໃຫ້ການສະໜັບສະໜູນແນວຄິດທີ່ນຳພາໂດຍລັດຖະບານ ຕໍ່ການປິດຕະຫຼາດຊື້-ຂາຍສັດທີ່ປ່າຜິດກົດໝາຍ ແລະ ບໍ່ມີການຄຸ້ມຄອງຢ່າງຖືກຕ້ອງ.
ການແຜ່ລະບາດຂອງພະຍາດ COVID-19 ເປັນການເຊື່ອມໂຍງກັນລະຫວ່າງພະຍາດຕິດຕໍ່ຈາກສັດສູ່ຄົນ ແລະ ຜູ້ທີ່ຕິດພະຍາດຈາກສັດ ແລ້ວສາມາດແຜ່ເຊື້ອໄປສູ່ຄົນອື່ນໄດ້ອີກ ຕະຫຼາດຊື້-ຂາຍສັດປ່າ ຖືວ່າເປັນແຫຼ່ງທີ່ມີຄວາມສ່ຽງຫຼາຍ ຈາກຜົນສຳຫຼວດໃນເດືອນມີນາ 2020 ຈາກຈຳນວນຜູ້ຮ່ວມແບບສຳຫຼວດ 5.000 ຄົນ ຈາກເຂດປົກຄອງພິເສດຮົງກົງ ຍີ່ປຸ່ນ ມຽນມາ ໄທ ແລະ ຫວຽດນາມ ພົບວ່າ 82% ມີຄວາມກັງວົນຫຼາຍຕໍ່ການລະບາດຂອງໂລກຕິດຕໍ່ນີ້ ໃນນີ້ 93% ຂອງຜູ້ຕອບແບບສອບຖາມຈາກ 3 ປະເທດໃນອາຊີຕາເວັນອອກສຽງໃຕ້ ແລະ ຮົງກົງ ຢາກສະໜັບສະໜູນໃຫ້ລັດຖະບານປິດຕະຫຼາດຊື້-ຂາຍສັດປ່າທີ່ຜິດກົດໝາຍ ແລະ ບໍ່ມີການຄຸມຄອງຢ່າງຖືກຕ້ອງ.
ຕົ້ນກຳເນີດ ຫຼືແຫຼ່ງທີ່ມາທີ່ແທ້ຈິງຂອງພະຍາດ COVID-19 ຍັງເປັນຂໍ້ສົງໄສ ແຕ່ອົງການອະນາໄມໂລກໄດ້ຢືນຢັນວ່າ ເປັນໂຣກຕິດຕໍ່ຈາກສັດສູ່ຄົນ ເພື່ອຕອບໂຕ້ກັບໂຣກລະບາດນີ້ ໃນວັນທີ 24 ກຸມພາຜ່ານມາ ລັດຖະບານຈີນໄດ້ປະກາດສັ່ງຫ້າມການຊື້-ຂາຍ ແລະ ກິນສັດປ່າເປັນອາຫານ ຜົນສຳຫຼວດຂອງ WWF ຍັງໃຫ້ຮູ້ອີກວ່າ ຄົນສ່ວນໃຫຍ່ຈາກປະເທດອື່ນໆໃນທົ່ວຂົງເຂດພາກພື້ນ ເຫັນດີໃຫ້ການສະໜັບສະໜູນມາດຕະການໃນຮູບແບບດຽວກັນ ຕໍ່ການປິດຕະຫຼາຍຊື້-ຂາຍສັດປ່າ ນີ້ຖືວ່າເປັນການສຳຫຼວດຄວາມຄິດເຫັນຂອງສັງຄົມຄັ້ງທຳອິດ ກ່ຽວກັບການເຊື່ອມໂຍງກັນລະຫວ່າງ COVID-19 ແລະ ການຄ້າ-ຂາຍສັດປ່າໃນທົ່ວພາກພື້ນອາຊີ.
ທ່ານ Christy Williams ຜູ້ອຳນວຍການ WWF ປະຈຳອາຊີ-ປາຊີຟິກ ກ່າວວ່າ: ຈີນໄດ້ປະຕິບັດຫຼາຍມາດຕະການ ເຊິ່ງເປັນບາດກ້າວທີ່ດີ ລວມເຖິງການຫ້າມລ່າ ຊື້-ຂາຍ ເຄື່ອນຍ້າຍ ແລະ ການກິນສັດປ່າ ປັດຈຸບັນ ຫວຽດນາມກໍກຳລັງດຳເນີນການໃນຮູບແບບທີ່ຄ້າຍຄືກັນ ລັດຖະບານໃນປະເທດສະມາຊິກອາຊຽນ ຄວນພິຈາລະນາຕໍ່ມາດຕະການປິດຕະຫຼາດຊື້-ຂາຍສັດປ່າທີ່ມີຄວາມສ່ຽງສູງ ແລະ ຢຸດຕິຂະບວນການຄ້າ-ຂາຍສັດປ່າ ເພື່ອອະນຸຮັກສັດປ່າ ແລະ ຊ່ວຍປ້ອງກັນການເກີດຂຶ້ນຊ້ຳຮອຍອີກ ຂອງໂຣກຕິດຕໍ່ຈາກສັດສູ່ຄົນ ທີ່ອາດກໍ່ບັນຫາການຢຸດສະງັກ ຄວາມວຸ່ນວາຍດ້ານເສດຖະກິດ-ສັງຄົມ ດັ່ງທີ່ພວກເຮົາກຳລັງປະເຊີນຢູ່ໃນທົ່ວໂລກ.
ສະເພາະຢູ່ ສປປ ລາວ ທ່ານ Francois Guegan ຫົວໜ້າຝ່າຍການອະນຸຮັກ WWF-Laos ໄດ້ໃຫ້ຮູ້ວ່າ: ຄຳສັ່ງຂອງທ່ານນາຍົກລັດຖະມົນຕີ ເລກທີ 05/ນຍ ປີ 2018 ຖືວ່າເປັນການແກ້ໄຂບັນຫາກ່ຽວກັບການຄ້າ-ຂາຍສັດປ່າທີ່ຜິດກົດໝາຍໃນລາວໄດ້ດີທີ່ສຸດ ແລະ ເຮັດໃຫ້ການຊົມໃຊ້ຜະລິດຕະພັນທີ່ເຮັດຈາກສັດປ່າ ການຄ້າ-ຂາຍສັດປ່າຫຼຸດລົງ ຄຳສັ່ງດັ່ງກ່າວ ຖືກນຳມາຈັດຕັ້ງປະຕິບັດໂດຍກົມກວດກາປ່າໄມ້ ຮ່ວມກັບພາກສ່ວນກ່ຽວຂ້ອງ ໃນບັນດາເຄືອຂ່າຍບັງຄັບໃຊ້ກົດໝາຍວ່າດ້ວຍສັດປ່າ ເພື່ອຮັບປະກັນໃຫ້ປະຊາຊົນລາວມີຄວາມປອດໄພ ແລະ ການແຜ່ລະບາດຂອງພະຍາດຕິດຕໍ່ຈາກສັດສູ່ຄົນນີ້ ຈະບໍ່ເກີດຂຶ້ນອີກ ການຄ້າ-ຂາຍສັດປ່າ ໂດຍສະເພາະສັດລ້ຽງລູກດ້ວຍນົມ ສັດປີກ ສັດເລືອຄານ ແລະ ອື່ນໆທີ່ມີຄວາມສ່ຽງສູງຕໍ່ການແຜ່ເຊື້ອພະຍາດສູ່ຄົນ ຈຳຕ້ອງຖືກປິດລົງ ແລະ ຢຸດຕິທັນທີ ຜົນການສຳຫຼວດໂດຍຜ່ານ GlobeScan ຍັງເຜີຍໃຫ້ຮູ້ວ່າ 9% ຂອງຄົນບາງກຸ່ມ ຫຼືຄົນທີ່ພວກເຂົາຮູ້ຈັກ ເຄີຍຊື້ສັດປ່າໃນ 12 ເດືອນຜ່ານມາ ຈາກຕະຫຼາດຊື້ຂາຍສັດປ່າ ແຕ່ 84% ຄິດວ່າຈະບໍ່ກັບໄປຊື້ ຫຼືຊົມໃຊ້ຜະລິດຕະພັນທີ່ເຮັດຈາກສັດປ່າໃນອະນາຄົດ ຫຼັງຈາກການແຜ່ລະບາດຂອງ COVID-19.
ທ່ານ Marco Lambertini ຜູ້ອຳນວຍການໃຫຍ່ WWF-ສາກົນ ໃຫ້ຮູ້ວ່າ: ປະຊາຊົນໃນເຂດອາຊີ ທີ່ອາໄສຢູ່ໃນປະເທດທີ່ມີຕະຫຼາດຄ້າ-ຂາຍສັດປ່າຫຼາຍທີ່ສຸດ ໄດ້ສະແດງອອກເຖິງການສະໜັບສະໜູນຕໍ່ການຢຸດກິນສັດປ່າ ແລະ ປິດຕະຫຼາດຄ້າ-ຂາຍສັດປ່າທີ່ຜິດກົດໝາຍ ຈາກຜົນການສຳຫຼວດຄົນສ່ວນໃຫຍ່ ມີຄວາມກັງວົນ ແລະ ພ້ອມສະໜັບສະໜູນລັດຖະບານຂອງຕົນ ໃນການປ້ອງກັນວິກິດດ້ານສາທາລະນະສຸກຂອງໂລກໃນອະນາຄົດ ທີ່ອາດມີມາຈາກຕະຫຼາດສັດປ່າ ເຖິງເວລາແລ້ວທີ່ຈະເຊື່ອມຕໍ່ຜົນກະທົບຈາກການຄ້າ-ຂາຍສັດປ່າ ທີ່ມີຕໍ່ຄວາມເສື່ອມໂຊມດ້ານສິ່ງແວດລ້ອມ ແລະ ຄວາມສ່ຽງອື່ນໆຕໍ່ສຸຂະພາບຂອງຄົນເຮົາ.
ອົງການອະນາໄມໂລກ ລາຍງານວ່າ ການແຜ່ລະບາດຂອງພະຍາດ COVID-19 ໃນປັດຈຸບັນ ລວມເຖິງເຊື້ອພະຍາດໃນມະນຸດຢ່າງໜ້ອຍ 61% ແມ່ນການແຜ່ເຊື້ອຈາກສັດສູ່ຄົນ ການຄ້າ-ຂາຍສັດປ່າເປັນຄວາມສ່ຽງທີ່ຮ້າຍແຮງ ຕໍ່ການແຜ່ລະບາດຂອງໂຣກຕິດຕໍ່ຈາກສັດສູ່ຄົນ ແລະ ຖືເປັນການທຳລາຍທີ່ຢູ່ອາໄສຂອງສັດປ່າ ເປັນການສູນເສຍທາງລະບົບນິເວດວິທະຍາ ພະຍາດຕິດຕໍ່ອື່ນໆທີ່ເກີດຂຶ້ນໃນໄລຍະຜ່ານມາ ໃນນີ້ລວມມີພະຍາດ SARS MERS ແລະ Ebola ລ້ວນແຕ່ເປັນການແຜ່ເຊື້ອຈາກສັດສູ່ຄົນ.
ການຄ້າ-ຂາຍສັດປ່າ ເປັນໄພຂົ່ມຂູ່ໂດຍກົງອັນດັບ 2 ຕໍ່ຊີວະນາໆພັນໃນທົ່ວໂລກ ຮອງຈາກການທຳລາຍຖິ່ນອາໄສຂອງສັດປ່າ-ຈຳນວນສັດປ່າ ໂດຍສະເພາະສັດທີ່ມີກະດູກສັນຫຼັງໃນທົ່ວໂລກ ຫຼຸດລົງປະມານ 60% ນັບແຕ່ປີ 1970 ແລະ ບົດລາຍງານປີ 2019 ຈາກນະໂຍບາຍທາງວິທະຍາສາດ ລະຫວ່າງລັດກ່ຽວກັບການຊົມໃຊ້ຄວາມຫຼວງຫຼາຍທາງຊີວະນາໆພັນ ແລະ ລະບົບນິເວດວິທະຍາ ສະຫຼຸບວ່າປັດຈຸບັນປະມານ 25% ຂອງສັດສາຍພັນຕ່າງໆທົ່ວໂລກ ກຳລັງຖືກຄຸກຄາມ ເຊິ່ງອາດນຳໄປສູ່ການສູນພັນ.