ຕາມການລາຍງານຂອງອົງການປົກຄອງບ້ານດອນດູ່ ເມືອງຫາດຊາຍຟອງ ນະຄອນຫຼວງວຽງຈັນ ໃນວັນທີ 29 ມິຖຸນາ 2021 ໂອກາດທີ່ທ່ານ ບຸນເພັງ ສີນະວົງພອນ ເຈົ້າເມືອງຫາດຊາຍຟອງ ພ້ອມພາກສ່ວນກ່ຽວຂ້ອງ ໄດ້ລົງຕິດຕາມຊີ້ນຳວຽກງານປ້ອງກັນ ສະກັດກັ້ນ ຕ້ານພະຍາດພະຍາດໂຄວິດ-19 ຢູ່ບ້ານດອນດູ່ ໂດຍສົມທົບກັບອົງການປົກຄອງບ້ານດັ່ງກ່າວ ແລະ ໄດ້ຮັບຟັງການລາຍງານໃຫ້ຊາບຕໍ່ສະພາບການລະບາດພະຍາດໂຄວິດ-19 ໂດຍພົບວ່າບ້ານດອນດູ່ມີຜູ້ຕິດເຊື້ອພະຍາດໂຄວິດ ຄັ້ງທີ 2 ຈຳນວນ 1 ຄົນ ເຊິ່ງໄດ້ນຳເຊື້ອມາຈາກຕ່າງເມືອງ ແລະ ພົບວ່າມີບຸກຄົນກຸ່ມສ່ຽງທີ່ໄດ້ພົວພັນໃກ້ຊິດກັບ 13 ຄົນ ແລະ ໄດ້ໃຫ້ພວກກ່ຽວກັກໂຕເອງ ປັດຈຸບັນບ້ານດັ່ງກ່າວໄດ້ມີການປິດບ້ານ ປິດເສັ້ນທາງເຂົ້າ-ອອກທາງຮ່ອມເຮືອນຂອງຜູ້ຕິດເຊື້ອແລ້ວ ຈົນກ່ວາຈະຮອດ 14 ວັນ ເພື່ອຄວບຄຸມເຊື້ອພະຍາດບໍ່ໃຫ້ກະຈາຍແຜ່ລາມ
ພ້ອມນີ້ ທ່ານເຈົ້າເມືອງຫາດຊາຍຟອງໄດ້ຄົ້ນຄວ້າປຶກສາຫາລືຮ່ວມກັບບ້ານ ເພື່ອຫາວິທີທາງປ້ອງກັນ ແລະ ຄວບຄຸມ ໂດຍເນັ້ນໃຫ້ປະຕິບັດມາດຕະການປ້ອງກັນຢ່າງເຂັ້ມງວດ ໂດຍສະເພາະ ຕໍ່ກຸ່ມທີ່ມີຄວາມສ່ຽງ ເພື່ອໃຫ້ກັກບໍລິເວນເພື່ອຢຸດເຊື້ອ ແລະ ໃຫ້ເອົາໃຈໃສ່ຕິດຕາມຢ່າງໃກ້ຊິດ ຕໍ່ບຸກຄົນທີ່ມີຄວາມສ່ຽງ ສ້າງຄວາມເຂົ້າໃຈວຽກງານມາດຕະການປ້ອງກັນຢ່າງເຂັ້ມງວດ ພ້ອມດຽວກັນນັ້ນ ທ່ານເຈົ້າເມືອງຍັງໄດ້ນຳເອົາເຄື່ອງອຸປະກອນປ້ອງກັນພະຍາດໂຄວິດ ແລະ ມອບເງິນຈຳນວນໜຶ່ງໃຫ້ຄະນະບ້ານ ເພື່ອນຳໃຊ້ເຂົ້າໃນວຽກງານການປ້ອງກັນ ຈາກນັ້ນ ທ່ານເຈົ້າເມືອງ ແລະ ຄະນະໄດ້ລົງຕິດຕາມເບິ່ງ ແລະ ໃຫ້ກຳລັງໃຈຕໍ່ຄອບຄົວຂອງຜູ້ຕິດເຊື້ອ ເພື່ອຕໍ່ສູ້ຕ້ານກັບພະຍາດໂຄວິດໃຫ້ສຳເລັດ.
# ຂ່າວ – ພາບ: ສົມສະຫວັນ