ວັນທີ 29 ມິຖຸນາ 2021 ທ່ານ ບຸນເພັງ ສີນະວົງພອນ ເຈົ້າເມືອງຫາດຊາຍຟອງ ນະຄອນຫຼວງວຽງຈັນ ພ້ອມຄະນະ ໄດ້ລົງກວດກາເບິ່ງເສັ້ນທາງສາຍຖະໜົນທ່າເດື່ອ ເຂດບ້ານສົມຫວັງໃຕ້ ຫຼັກ 8 ຕໍ່ໜ້າບ່ອນຈອດລົດຂອງໂຮງງານຜະລິດຢາເລກ 3 ຫຼັງມີຝົນຕົກ ແລະ ເຮັດໃຫ້ເກີດນ້ຳອັ່ງ-ຂັງຢູ່ເສັ້ນທາງດັ່ງກ່າວ ພາຍຫຼັງໄດ້ລົງກວດກາຕົວຈິງ ເຫັນວ່າບ່ອນທີ່ມີນ້ຳອັ່ງ-ຂັງນັ້ນໄດ້ຍຸບຕົວລົງ ແລະ ບວມ ໃນເວລາທີ່ມີລົດບັນທຸກໜັກແລ່ນໄປມາ ຍ້ອນບໍ່ມີບ່ອນລະບາຍນ້ຳ ຈຶ່ງເຮັດໃຫ້ດິນຄ່ອຍໆຍຸບລົງເທື່ອລະໜ້ອຍ ຖ້າຫາກບໍ່ໄດ້ຮັບການປັບປຸງແກ້ໄຂຢ່າງຮີບດ່ວນ ຈະເຮັດໃຫ້ເສັ້ນທາງມີການເປ່ເພໜັກຂຶ້ນ ແລະ ຈະສູນເສຍງົບປະມານເພື່ອນຳມາສ້ອມແປງເປັນຈຳນວນຫຼາຍ.
ເພື່ອເປັນການຊອກຫາວິທີທາງໃນການແກ້ໄຂຢ່າງຮີບດ່ວນ ແລະ ສ້ອມແປງທາງອອກຂອງນ້ຳໄຫຼ ເພື່ອປ້ອງກັນບໍ່ໃຫ້ເສັ້ນທາງເປ່ເພໄດ້ງ່າຍຂຶ້ນ ທ່ານເຈົ້າເມືອງໄດ້ຊີ້ນຳໃຫ້ພາກສ່ວນກ່ຽວຂ້ອງລົງມາປັບປຸງແກ້ໄຂບັນຫານ້ຳອັ່ງ-ຂັງ ເປັນຕົ້ນ ໄດ້ຊີ້ນຳຫ້ອງການໂຍທາທິການ ແລະ ເມືອງ ສົມທົບກັບບ້ານ ແລະ ບໍລິສັດຜະລິດຢາເລກ 3 ຮ່ວມກັນແກ້ໄຂບັນຫາສະເພາະໜ້າ ເພື່ອພ້ອມກັນຄົ້ນຄ້ວາປະຕິບັດ ແລະ ນຳເອົາອຸປະກອນເຄື່ອງມື ການຂຸດເຈາະລົງຢູ່ໃນເຂດດັ່ງກ່າວ ເພື່ອສ້ອມແປງທາງໃຫ້ນ້ຳໄຫຼ ຫຼືຂຸດຮ່ອງວາງທໍ່ລະບາຍນ້ຳໃຫ້ໄຫຼລົງສູ່ທີ່ຕ່ຳເຂດນອກທາງ ເພາະປັດຈຸບັນ ບ່ອນທີ່ມີນ້ຳອັ່ງ-ຂັງນັ້ນບໍ່ມີທາງນ້ຳໄຫຼອອກ.
# ຂ່າວ – ພາບ: ສົມສະຫວັນ