ວັນທີ 29 ມິຖຸນາ 2021 ທ່ານ Vladimir A.KALININ ເອກອັກຄະລັດຖະທູດສະຫະພັນຣັດເຊຍປະຈຳ ສປປ ລາວ ພ້ອມດ້ວຍຄະນະ ໄດ້ໄປຢ້ຽມຢາມໂຄງການພັດທະນາທ່າບົກທ່ານາແລ້ງ ແລະ ເຂດໂລຈິສຕິກນະຄອນຫຼວງວຽງຈັນ ຖືກຕ້ອນຮັບ ແລະ ຮັບຟັງການລາຍງານການຈັດຕັ້ງປະຕິບັດໂຄງການໂດຍທ່ານ ອາລຸນແກ້ວ ກິດຕິຄຸນ ອະດີດລັດຖະມົນຕີປະຈຳສຳນັກງານນາຍົກລັດຖະມົນຕີ ປະທານກຳມະການຍຸດທະສາດ ແລະ ການວາງແຜນບໍລິສັດ ພີທີແອວໂຣນດິ້ງ ຈຳກັດ ທ່ານ ສີລາ ວຽງແກ້ວ ອະດີດຮອງລັດຖະມົນຕີກະຊວງການເງິນ ທີ່ປຶກສາອາວຸໂສບໍລິສັດວຽງຈັນໂລຈິສຕິກພາກ ຈຳກັດ ພ້ອມດ້ວຍດ້ວຍຄະນະ.
ໂຄງການພັດທະນາທ່າບົກທ່ານາແລ້ງ ແລະ ເຂດໂລຈິສຕິກນະຄອນຫຼວງວຽງຈັນ ຖືເປັນໂຄງການການລົງທຶນພັດທະນາຂະໜາດໃຫຍ່ ທີ່ນອນຢູ່ໃນໂຄງການພັດທະນາພື້ນຖານໂຄງລ່າງຂອງລັດຖະບານລາວ ໂຄງການນີ້ ແມ່ນໜຶ່ງໂຄງການບູລິມະສິດຂອງຍຸດທະສາດພັດທະນາໂລຈິສຕິກແຫ່ງຊາດປີ 2016-2025 ໂດຍເປັນການຜັນຂະຫຍາຍດຳລັດຂອງລັດຖະບານ ວ່າດ້ວຍການຮັບຮອງ ແລະ ປະກາດໃຊ້ຍຸດທະສາດການພັດທະນາໂລຈິສຕິກຂົນສົ່ງສິນຄ້າຂອງລາວ ເຊິ່ງໂຄງການ ຕັ້ງຢູ່ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ແລະ ປັດຈຸບັນ ກຳລັງກໍ່ສ້າງພື້ນຖານໂຄງລ່າງ ເປັນຕົ້ນ ຖະໜົນຫົນທາງ ອາຄານ ປະຕູໂຂງ ແລະ ອື່ນໆ.
# ຂ່າວ – ພາບ: ສົມສະຫວັນ